މަސްތުވާތަކެތީގެ އައްޑާއެއްގެ ގޮތުގައި ބޭނުންކުރަމުންދާ ފަޅު ގެ، މ. ރަބީއުވިލާ ތަޅައިލުމުގެ މަސައްކަތް، ސީދާ ރައީސް ޑރ. މުހައްމަދު މުއިއްޒު އަންގަވައިގެން ފަށައިފި އެވެ.

ލޯކަލް ގަވަނަންސް މިނިސްޓަރު އާދަމް ޝަރީފް ވިދާޅުވި ގޮތުގައި އެ ގޮތަށް ރައީސް މުއިއްޒު ނިންމެވީ އެ އިމާރާތުގެ ސަބަބުން މީހަކަށް ނުރައްކަލެއް ކުރިމަތިވެދާނެ ކަމަށް އެމަނިކުފާނަށް ފެނިވަޑައިގެން ކަމަށެވެ.

މީގެ ކުރިން އެ އިމާރާތުގައި ވަނީ ވަރަށް ބޮޑަށް ރޯވެފަ އެވެ. އެއިރު ވެސް އެ ގޭގައި މީހަކު ނުއުޅެ އެވެ.

ރައީސް މުއިއްޒުގެ އިރުޝާދުގެ ދަށުން އެ ގެ ތަޅާލުމުގެ މަސައްކަތް ކުރަމުން ދަނީ ލޯކަލް ގަވަނަންސް މިނިސްޓްރީން ކަމަށް އާދަމް ޝަރީފް ވިދާޅުވި އެވެ.

މާލޭގައި ހުންނަ ފަޅުގެތަކުގައި މަސްތުވާތަކެއްޗާއި ހަށިވިއްކުން ފަދަ ގާނޫނާ ހިލާފު ކަންކަން ހިންގާ މައްސަލަ ފަހަކަށް އައިސް ވަރަށް ބޮޑެވެ. ފަސް ފަންގިފިލާގެ ރަބީއުވިލާއަކީ ވެސް އެފަދަ އެއް އައްޑާ އެވެ.

މިދިޔަ އޭޕްރީލް މަހު އެ އިމާރާތުގެ ހަތަރުވަނަ ފަންގިފިލާގައި ރޯވެ މީހުން ހުސްކުރި ފަހުން އެ ތަނުގައި އެފަދަ އަމަލުތައް ހިންގާ ކަމުގެ ވާހަކަތައް ސޯޝަލް މީޑިއާގައި ވަރަށް ބޮޑަށް ދެކެވުނެވެ. މިދިޔަ މެއި މަހު މަރުވެ ކުނިވެފައިވާ ހަށިގަނޑެއް ވެސް އެ ގެއިން ފެނުނެވެ. އޭނާ މަރުވީ މަސްތުވާތަކެއްޗަށް އޯވަޑޯސްވެގެން ކަމަށް ބެލެވެ އެވެ.

ރަބީއުވިލާއަކީ ބާވެ އާންމުނަށް ނުރައްކަލެއް ކުރިމަތިވެދާނެކަމަށް ބެލެވޭތީ 2019 ވަނަ އަހަރު އާންމު ކުރި ލިސްޓުގައި ހިމެނޭ 11 އިމާރާތުގެ ތެރޭގައި ވެސް ހިމެނޭ ތަނެކެވެ.