މިލާން (އޮގަސްޓް 12) - ޗިލީގެ ތަޖުރިބާކާރު ފޯވާޑް، އަލެކްސިސް ސަންޗޭޒް 18 އަހަރަށް ފަހު ކުރިން އޭނާ ކުޅުނު އިޓަލީގެ އުދިނޭޒީ އަށް ބަދަލުވެއްޖެ އެެވެ.

ސަންޗޭޒް، ޗިލީގެ ކޮބްރެލޯއާ އަށް ކުޅުމަށް ފަހު، ޔޫރަޕަށް އައިސް ފުރަތަމަ ކުޅެފައިވަނީ އުދިނޭޒީ އަށެވެ. އެ ގޮތުން، ސަންޗޭޒް، 35، އުދިނޭޒީ އަށް ކުޅެފައިވަނީ 2006-2011 އަށެވެ. އޭނާ 18 އަހަރަށް ފަހު، އަލުން އެ ޓީމަށް ބަދަލުވެ، ސޮއިކޮށްފައިވަނީ ދެ އަހަރުގެ ކޮންޓްރެކްޓެއްގަ އެވެ.

އެ ފަަހަރު އޭނާ ވަނީ އުދިނޭޒީ އަށް 112 މެޗުން ސަންޗޭޒް ވަނީ 21 ގޯލު ޖަހައިފަ އެވެ.

މިިދިޔަ ސީޒަނުގައި ސަންޗޭޒް ކުޅެފައިވަނީ އިންޓަ މިލާނަށެވެ. މިދިޔަ ޖޫން މަހުގެ ނިޔަލަށް ސަންޗޭޒާއި އިންޓަ އިން ހަދާފައި އޮތް އެއްބަސްވުމުގެ މުއްދަތުވަނީ ހަމަވެފަ އެވެ.

ސަންޗޭޒް، އުދިނޭޒީ އަށް ކުޅުނު މެޗެއްގެ ތެރެއިން.

އުދިނޭޒީ ދޫކޮށް، ސަންޗޭޒް ބަދަލުވެފައިވަނީ، 2011 ވަނަ އަހަރު ބާސެލޯނާ އަށެވެ. އެ ގޮތުން، 2011 އިން 2014 އަށް އެ ޓީމަށް ކުޅުމަށް ފަހު، ދެން ގުޅުނީ އާސެނަލާ އެވެ. އާސެނަލަށް 166 މެޗުން 80 ގޯލު ޖަހައިދިން ސަންޗޭޒް ވަނީ 2018 ވަނަ އަހަރު މެންޗެސްޓާ ޔުނައިޓެޑަށް ސޮއިކޮށްފަ އެވެ. އެ ޓީމަށް 45 މެޗުން ޖަހައިދިނީ ފަސް ގޯލެވެ.

ޔުނައިޓެޑް ދޫކޮށް، 2019 ވަނަ އަހަރު އިންޓަ މިލާނަށް ލޯނަކަށް ބަދަލުވި ސަންޗޭޒް ފަހުން އެ ޓީމުގެ އެއްބަސްވުން ދާއިމީ ކުރި އެެވެ. އިންޓައާ އެކު އޮތް އެއްބަސްވުން 2022 ވަނަ އަހަރު ބާތިލް ކުރުމުން، އެއް ސީޒަނުގައި ފްރާންސްގެ މާސޭ އަށް ކުޅުނެވެ. އެކަމަކު، މިދިޔަ ސީޒަނުގައި އަލުން އިންޓައާ ގުޅި، އެ ޓީމަށް ލީގު ޗެމްޕިއަންކަން ހޯދައިދޭން އެހީވި އެވެ.