އިންޑޮނޭޝިއާގެ ބަތަމްގައި މިހާރު ކުރިއަށްދާ 56 ވަނަ އޭޝިއާ ބޮޑީބިލްޑިން އެންޑް ފިޒީކް ޗެމްޕިއަންޝިޕް މުބާރާތުގައި ވާދަކުރާ ރާއްޖޭގެ ޝާހީން އިބްރާހިމް ދީދީ (ޝާންޓެ) ރިހި މެޑަލެއް ހޯދައިފި އެވެ.

ޝާހީން، ރިހި މެޑަލް ހޯދީ 60 ކިލޯ ކެޓަގަރީންނެވެ. މި ކެޓަގަރީން، އެއް ވަނަ ހޯދީ އިންޑިއާގެ ތަންގަދުރާޖް ޖަޔަޕްރަކާޝް އެވެ. ދެ ވަނަ އަށް ޝާހީން ދިޔައިރު، ތިން ވަނަ ހޯދީ އިންޑިއާގެ ސޯރާ އަލްމާން އެވެ. އަދި ދެން ވާދަކުރި މެލޭޝިއާގެ މުހައްމަދު ހަމްރުއްދީން ދިޔައީ ހަތަރު ވަނަ އެވެ.

މިއީ، އޭޝިއާގެ މުބާރާތަކުން ޝާހީން އަށް ލިބުނު ދެ ވަނަ މެޑަލް އެވެ. މީގެ ކުރިން ޝާހީން ވަނީ، 2017 ވަނަ އަހަރުގެ އޭޝިއާ ބޮޑީބިލްޑިން އެންޑް ފިޒީކް ޗެމްޕިއަންޝިޕުން ރަން މެޑަލް ހޯދައިފަ އެވެ. އެެއާ އެކު، އޭނާ ވެފައިވަނީ އޭޝިއާ ބައްރުގެ މުބާރާތަކުން ރަން މެޑަލެއް ހޯދައިދިން ރާއްޖޭގެ ފުރަތަމަ އެތުލީޓަށެވެ.

އޭގެ ކުރިން، ޝާހީން ވަނީ 2014 ވަނަ އަހަރު މަކާއޫގައި ބޭއްވި އޭޝިއަން ބޮޑީބިލްޑިން އެންޑް ފިޒީކް ޗެމްޕިއަންޝިޕުގެ 160 ސެންޓިމީޓަރު ފިޓްނަސް ކެޓަގަރީން ލޯ މެޑަލް ހޯދައިފަ އެވެ.

ދިމާވި މައްސަލައެއްގެ ސަބަބުން، ބޮޑީބިލްޑިން ދުރުގައި މުއްދަތެއް ހޭދަކުރުމަށް ފަހު، އަލުން އެނބުރި އައިސް ޝާހީން ރިހި މެޑަލެއް ހޯދުމާ އެކު، ކެރިއަރުގައި ކުރިއަށްދާން އޭނާ އަށް އަނެއްކާ ވެސް ފުރުސަތު ހުޅުވުނީ އެވެ.

ޝާހީންގެ އިތުރުން، އޭޝިއާ މުބާރާތަކުން ދެން ރާއްޖެ އަށް ރަން މެޑަލް ހޯދައިދިނީ، މުހައްމަދު މޫސާ (މޯޑް) އެވެ. އެއީ، ކ. މާފުށީގައި 2022 ވަނަ އަހަރު ހޯސްޓްކުރި އޭސިއާ ބޮޑީބިލްޑިން މުބާރާތުގެ 55 ކިލޯ ކެޓަގަރީންނެވެ.