މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ފަސް މެނޭޖިން ޑިރެކްޓަރުން ހޯދަން އިއުލާނުކޮށްފި އެވެ.

އެ އިދާރާއިން މިއަދު ގެޒެޓުކުރި އިއުލާނެއްގައި ބުނީ ފަސް އެމްޑީންގެ ގޮތުގައި ބޭނުންވަނީ ހިދުމަތްކުރުމަށް ހުނަރުވެރި ގާބިލު އަދި އިހުލާސްތެރިކަމާއި ތެދުވެރިކަމާއެކު ކުރިއަށް ދިއުމަށް ޝައުގުވެރިވާ މީހުން ކަމަށެވެ. އަދި މި ވަޒީފާތަކައް ދެ ޖިންސުގެ މީހުންނަށް ވެސް ހަމަހަމަ ފުރުސަތު އޮތް ކަމަށްވެސް އެމްއެމްއޭ އިން ބުންޏެވެ.

އެމްއެމްއޭ އެމްޑީން ހޯދަން އިއުލާނުކުރި ދާއިރާތައް

• މަނިޓަރީ ޕޮލިސީ، ރިސަރޗް އެންޑް ސްޓެޓިސްޓިކްސް
• ފައިނޭންޝަލް ސްޓެބިލިޓީ
• ބޭންކިންގ އޮޕަރޭޝަންސް
• ކޯޕޮރޭޓް ސަރވިސަސް
• ފައިނޭންޝަލް ސެކްޓަރ ޑިވަލަޕްމަންޓް

ޝައުގުވެރިވާ ފަރާތްތަަކުން މި މަގާމަށް ކުރިމަތިލުމުގެ ފުރުސަތު އޮގަސްޓު 22، ގެ މެންދުރު 1:00 އާ ހަމައަށް ވަނީ ހުޅުވާލާފަ އެވެ. މެނޭޖިން ޑިރެކްޓަރުންގެ މުސާރައަކީ 50،000ރ. އާއި 55،000ރ. އާ ދެމެދުގެ އަދަދެކެވެ. އެކަކަށް މި މަގާމު އަދާކުރެވޭނީ ފަސް އަހަރުގެ ދެ ދައުރަށެވެ.

މި މަގާމާބެހޭ އިތުރު ތަފުސީލުތައް އެމްއެމްއޭއިން ގެޒެޓުކުރި އިއުލާނުގައި ހިމަނާފައިވެ އެވެ.

މަރުކަޒީ ބޭންކުން ހޯދާ އެމްޑީގެ މަގާމަކީ އެމްއެމްއޭގައި މީގެ ކުރިން ތިބި އެސިސްޓަންޓު ގަވަރުނަރުގެ މަގާމު އުވާލައި އެ މަގާމުގައި ތިބި މީހުން އެޑްވައިޒަރުންގެ މަގާމާށް ޕްރޮމޯޓުކުރުމަށްފަހު އަލަށް އުފެއްދި މަގާމެކެވެ.

އެމްއެމްއޭގެ އޮނިގަނޑަށް ބޮޑު ބަދަލެއް ގެންނަން ނިންމެވީ އަަލަށް އައްޔަންކުރި ގަވަރުނަރު، ކުރީގެ ފިނޭންސް މިނިސްޓަރު އަހުމަދު މުނައްވަރު މަގާމާ ހަވާލުވެވަޑައިގެންނެވުމާ އެކުގަ އެވެ.

މިފަަދަ މަގާމުތަކެއް އުފައްދާފައި މިވަނީ ރާއްޖޭގެ މާލީ ހާލަތު ވެސް ވަރަށް ގޯސްވެފައިވާ ވަގުތެއްގަ އެވެ.

އެގޮތުން މިދިޔަ މަހުުގެ ތެރޭގައި ޖުލްމަ ޑޮލަރު ރިޒާވުން 113 މިލިއަން ޑޮލަރު މަދުވުމާ ގުޅިގެން، ވޭތުވި ދިހަ އަހަރުގެ ތެރޭގައި ނުދާހާ ދަށަށް ރިޒާވު ވެއްޓިއްޖެ ކަމަށް އެމްއެމްއޭއިން އެންމެ ފަހުން އާންމުކުރި ތަފާސްހިސާބުތަކުން ދައްކަ އެވެ.