ރާއްޖެއަށް ޓޫރިސްޓުން އަންނަ އަދަދު އިތުރުވިޔަސް ޓޫރިޒަމްގެ ސިނާއަތުން ލިބޭ އާމްދަނީ ދަށްވަމުން ދަނީ ޓޫރިސްޓުން އަންނަނީ ޑިސްކައުންޓް އަގުތަކެއްގައި ކަމަށްވާތީ ކަމަށް މޯލްޑިވްސް މާކެޓިން އެންޑް ޕީއާރް ކޯޕަރޭޝަން ( އެމްއެމްޕީއާރުސީ) އިން މިއަދު ބުނެފި އެވެ.

އިންޑިއާއިން ރާއްޖެއަށް އަންނަ ޓޫރިސްޓުން އިތުރުކުރަން އިންޑިއާގައި ހިންގި "ވެލްކަމް އިންޑިއާ" ކެމްޕެއިން ނިންމަވައިލުމަށް ފަހު ޓޫރިޒަމް މިނިސްޓަރު އިބްރާހީމް ފައިސަލާއި އެމްއެމްޕީއާރުސީގެ އިސްވެރިން މިއަދު ބޭއްވި ނޫސްވެރިންގެ ބައްދަލުވުމުގައި ފައިސަލް ވިދާޅުވީ ރާއްޖެއަށް މިއަހަރުގެ މިހައިތަނަށް ރާއްޖެއަށް 1.2 މިލިޔަން ޓޫރިސްޓުން އައިސްފައިވާ ކަމަށެވެ. ސަރުކާރުގެ އަމާޒަކީ މިއަހަރު ރާއްޖެއަށް ދެ މިލިޔަން ޓޫރިސްޓުން ގެނައުން ކަމަށް ވެސް އޭނާ ވިދާޅުވި އެވެ.

"ފަތުވެރިން އަދި އަންނަ އަދަދު އިތުރުވިޔަސް، ރެވެނިއު އެބަ ދަށްވޭ، މިއީ އިންޑަސްޓްރީން ވެސް ދައްކާ ވާހަކައެއް، ދެން އަދި އަޅުގަނޑުމެންނަށް ވެސް މިކަން އޮތީ އައިޑެންޓިފައި ކުރެވިފައި،" ފައިސަލް ވިދާޅުވި އެވެ.

އޭނާ ވިދާޅުވި ގޮތުގައި އެކަން ރަނގަޅުކުރާނީ ކިހިނެތްތޯ ބަލަން ސަރުކާރުން އަންނަނީ މަސައްކަތް ކުރަމުންނެވެ. އެގޮތުން މިއަހަރާ އަޅާ ބަލާއިރު އަންނަ އަހަރުގެ ލޯ ސީޒަންގައި ލިބޭ އާާމްދަނީ 15 ނުވަތަ 20 ޕަސެންޓަށް އިތުރުކުރުމަކީ އަމާޒެއް ކަމަށް ވެސް ވިދާޅުވި އެވެ.

"އެންމެން އެކަކުގައި މަސައްކަތްކުރީމާ އަޅުގަނޑުމެންނަށް މިކަމުގެ ހައްލު ހޯދޭނެ،" މިނިސްޓަރު ވިދާޅުވި އެވެ.

އެ ބައްދަލުވުމުގައި އެމްއެމްޕީއާރްސީގެ ޗެއާމަން އަދި ރައީސް ޑރ.މުހައްމަދު މުއިއްޒުގެ ޓޫރިޒަމް އެޑްވައިޒަރު މުހައްމަދު ހަލީލު ވިދާޅުވީ ޓޫރިސްޓް ރޫމަކަށް ދުވާލަކު އެވްރެޖްކޮށް ލިބޭ އާމްދަނީ (އޭޑީއާރް) ބޮޑުކޮށްގެން ކަމަށާއި އެހެން ނޫނީ ޓޫރިސްޓުންގެ އަދަދު އިތުރު ވިޔަސް އާމްދަނީ އިތުރު ނުވާނެ ކަމަށެވެ.

"ނަމްބަރު އޮފް ޕެކްސް ކިތަންމެ ވަރަކަށް އަދި އިތުރުކުރިޔަސް، އަޅުގަނޑުމެން ހެވިލީ ޑިސްކައުންޓްކުރަންޏާ، ރިސޯޓްތައް ފިލްކުރަންޏާ ނޫނީ ގެސްޓްހައުސްތައް ފިލްކުރާ ކަމަށް ވަންޏާ ދައުލަތަށް ލިބޭ އާމްދަނީއެއް އަސްލުގައި ނާންނާނެ،" ހަލީލު ވިދާޅުވި އެވެ.

ޓޫރިސްޓުން އަންނަ އަދަދު އިތުރުވާ އިރު ޓެކްސްގެ ގޮތުގައި ދައުލަތަށް ލިބޭ އާމްދަނީ އިތުރުނުވަނީ ކީއްވެތޯ މީހުން ސުވާލުކުރާ ކަން އޭނާ ފާހަގަ ކުރެއްވި އެވެ.

"އަސްލު ޓެކްސް އިތުރުނުވާ އެއް ސަބަބަކަށް ވާ ކަމަކީ އަޅުގަނޑުމެން 100 ޑޮލަރަށް ވިއްކި އެތި 80 ޑޮލަރަށް ޑިސްކައުންޓް ކޮށްފައި ވިއްކީމާ، އަދި [ޓޫރިސްޓުންގެ އަދަދު] ފަސް ޕަސެންޓް އިތުރުވިޔަސް، ޓެން ޕަސެންޓް ޑިސްކައުންޓް ކުރީމާ އޭގެ ލިބޭ ޓެކްސް ޕޯޝަން ކުޑަވާނެ ނޫންތޯ،" ހަލީލު ވިދާޅުވި އެވެ.

އޭނާ ވިދާޅުވީ ރާއްޖެއަށް އަންނަ ޓޫރިސްޓުންގެ އަދަދާއި ދައުލަތަށް ލިބޭ އާމްދަނީ އާ ދެމެދު ފަރަގެއް ހުންނަނީ އެހެންވެ ކަމަށާއި އެކަން ހައްލު ކުރުމަށް ޓަކައި އަންނަ މީހުންގެ އަދަދު އިތުރުކޮށް، ޑިމާންޑް އިތުރުކުރަން ޖެހޭ ކަމަށެވެ. އެ މަސައްކަތް އެމްއެމްޕީއާރުސީން ވަރަށް ރަނގަޅަށް ކުރަމުން އަންނަ ކަމަށް ވެސް ވިދާޅުވި އެވެ.