ބަންގްލަދޭޝްގެ ދަރިވަރުން އިސްވެ ތިބެ ފެށި މުޒާހަރާއެއްގެ ތެރެއިން އެ ގައުމުގެ ބޮޑުވަޒީރު ޝެއިހް ހަސީނާ އިސްތިއުފާ ދެއްވި ގޮތަށް ރާއްޖޭގައި މިހާރު އޮތް ވެރިކަން ބަދަލު ނުކުރެވޭނެ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މިއަދު ވިދާޅުވެއްޖެ އެވެ.

ވެރިކަންކުރާ ޕީއެންސީން ރޭ އެ ޕާޓީގެ ޖަގަހާގައި ބޭއްވި ޖަލްސާއެއްގައި ވާހަކަ ދައްކަވަމުން އެމަނިކުފާނު ވިދާޅުވީ، މުޒާހަރާގެ ސަބަބުން ބަންގްލަދޭޝްގެ ބޮޑުވަޒީރު ޝެއިހް ހަސީނާ އިސްތިއުފާ ދެއްވި މަންޒަރު ފެނިގެން އިދިކޮޅު ސިޔާސީ ލީޑަރުން އެގޮތަށް ކަންކުރަން ބޭނުންވިޔަސް އެ ފުރުސަތު ނުލިބޭނެ ކަމަށެވެ.

"މަޑުމަޑުން އަޅުގަނޑުމެން ނުތިބޭނަމޭ، އަޅުގަނޑުމެންނަށް ކެރޭނެއޭ މި ދަންނަވަނީ ކުރިމަތިލާން ޖެހުނު ކޮންމެ މީހަކާ ކުރިމަތިލާން. ބުނަން ޖެހުނު ކޮންމެ ބަހެއް ބުނަން،" އަބްދުއްރަހީމް ވިދާޅުވި އެވެ.

އަބްދުއްރަހީމް ރައްދު ދެއްވީ ކުރީގެ ރައީސް އަބްދުﷲ ޔާމީނާއި ޕީއެންއެފްގެ އިސް ބޭފުޅުންގެ ވާހަކަތަކަށެވެ. ޕީއެންއެފުން ހޯމަ ދުވަހުގެ ރޭ ބޭއްވި ޖަލްސާއެއްގައި އެ ޕާޓީގެ ލީޑަޝިޕުގެ އެކި ބޭފުޅުން ވަނީ ބަންގްލަދޭޝް ދިޔަ ހާލަތަށް ރާއްޖެ ނުދަނީސް ގައުމު ސަލާމަތް ކުރަންޖެހޭ ކަމަށް ވިދާޅުވެފަ އެވެ.

ނަމަވެސް، ޕީއެންސީގެ ޗެއާޕާސަންކަން ވެސް ކުރައްވާ އަބްދުއްރަހީމް ދެކެވަޑައިގަންނަވާ ގޮތުގައި އެބޭފުޅުންގެ ކިބައިގައި އެފަދަ މުޒާހަރާއެއް ޖެއްސުމުގެ ފެންވަރެއް ނެތެވެ.

"ހިތްވަރެއް ނުހުންނާނޭ، މުޒާހަރާއަށް ނުކުންނަށް ބުނެފިއްޔާ ޖަމީލެއް ނުފެންނާނެ. މަލީހެއް ނުފެންނާނެ. ހުސެއިން ވަހީދެއް ނުފެންނާނެ. ރައީސް ޔާމީނެއް ނުނިކުންނަވާނެ މަގުމައްޗަކަށް. ރައީސް ޔާމީނު އެއީ އާންމުކޮށް މިހެން މަގުމައްޗަށް ނިކުމެ ސިޔާސީ ކަންކަމުގަ އުޅުއްވާ ބޭފުޅެއް ނޫނޭ. އަޅުގަނޑުމެންނަށް ނޫންތޯ އިނގޭނީ. ސޯޓުބުރި ލައްވައިގެން ގޭގަ އިންނަވާނީ،" އެމަނިކުފާނު ވިދާޅުވި އެވެ.

"ބަންގްލަދޭޝްއަށް ހެދި ގޮތް" މި ގައުމަށް ނުހެދޭނެ އަނެއް ސަބަބަކީ "ދިވެހި ލޭ" ހިނގާ "ދިވެހި ދަރިން" މިތަނުގައި ތިބުން ކަމަށާއި ގައުމުގެ މިނިވަންކަމާއި އަމާންކަމާއި ރައްކާތެރިކަމާއި ރައްޔިތުންގެ ފުދުންތެރިކަމާ ކުޅޭ ހިސާބަށް ދިޔައިމާ އެ މީހުން މަޑުން ނުތިބޭނެތީ ކަމަށް ވެސް އަބްދުއްރަހީމް ވިދާޅުވި އެވެ.

ސިޔާސީ ހަމަނުޖެހުންތަކުގެ ތެރެއިން ވެރިކަން ބަދަލުކުރާ މޭރުމަކުން ޕީއެންއެފްގެ އިސް ލީޑަރު އަދި މަޖިލީހުގެ ރައީސް ވާހަކަ ދެއްކެވި ނަމަވެސް ބަންގްލަދޭޝްގައި ކުރިއަށް ދިޔައީ ދާހިލީ ހަމަނުޖެހުމެކެވެ. އެ މުޒާހަރާތައް ލީޑުކުރީ އެ ގައުމުގެ ދަރިވަރުންނެވެ.

މީގެ ދެތިން ހަފުތާ ކުރިން ޔުނިވާސިޓީ ދަރިވަރުންނާއި އާންމުން މުޒާހަރާ ކުރަން ފެށީ ސިވިލް ސާވިސްގެ ވަޒީފާ އެ ގައުމުގެ ވަކި ބަޔަކަށް ރިޒާވްކޮށްފައި އޮންނަ އުސޫލު ބަދަލު ކުރުމަށް ގޮވާލަ އެވެ.

މި މުޒާހަރާތަކުގެ ބައިވެރިންނާ ދެކޮޅަށް އެ ގައުމުގެ ސިފައިން ބާރުގެ ބޭނުންކުރުމުގެ ސަބަބުން 300 އަށްވުރެ ގިނަ މީހުން މަރުވި އެވެ. ހަސީނާ އިސްތިއުފާ ދެއްވުމުގެ ކުރިއަށް ހިނގި 24 ގަޑިއިރުގެ ތެރޭގައި އެކަނިވެސް 100 މީހުން މަރުވި އެވެ.

މުޒާހަރާގެ ބައިވެރިން ރިޔާސީ ގަނޑުވަރަށް ވަދެގަތުމުން ފިއްލާވައި، އިސްތިއުފާ ދެއްވި ހަސީނާ މިހާރު ހުންނެވީ އިންޑިއާގަ އެވެ. ބަންގްލަދޭޝްގެ މަސްރަހު އަދިވެސް ރަނގަޅު ނުވާއިރު އެ ގައުމުގެ މަޖިލިސް އުވާލާ އާ ސަރުކާރެއް އެކުލަވާލުމުގެ މަސައްކަތް އަސްކަރިއްޔާއިން ދަނީ ކުރަމުންނެވެ.