ލަންޑަން (އޮގަސްޓް 5) - ޗެލްސީ ދޫކޮށްލުމަށް ފަހު ސްޕެއިނުގެ އެތުލެޓިކޯ މެޑްރިޑަށް ބަދަލުވާން އިނގިރޭސި މިޑްފީލްޑަރު، ކޮނާ ގެލަގާ އެއްބަސްވެފައިވާ ކަމަށް މީޑިއާ ރިޕޯޓްތައް ބުނެފި އެވެ.

ގެލަގާ، 24، އަށް ޗެލްސީން އެންމެ ފަހުން ކޮންޓްރެކްޓް އާ ކުރަން ހުށަހެޅި ދެ ޕްރޮޕޯސަލަށް ވެސް އޭނާ ވަނީ ފުރަގަސްދީފަ އެވެ. އެހެންވެ، ޗެލްސީން ވަނީ އެތުލެޓިކޯ އިން ގެލަގާ ގަންނަންް ހުށަހެޅި 40 މިލިއަން ޑޮލަރުގެ ޑީލަށް އެއްބަސްވެފަ އެވެ.

އެކަމަކު، އެ ޑީލް ކުރިއަށް ނުގޮސް އޮތީ، ގެލަގާ ބައެއް ކަންކަން ޔަގީންކުރުމަށް ފަހު ކްލަބް ބަދަލުކުރަން ވިސްނާތީ އެވެ. ސްޕެއިނުގެ މީޑިއާ ރިޕޯޓްތައް ބުނާގޮތުން، ގެލަގާ ވަނީ އެތުލެޓިކޯގެ އޮފާ ގަބޫލުކުރަން ނިންމައިފަ އެވެ. އަދި އެތުލެޓިކޯގެ މެޑިކަލް ޓެސްޓްތަކުގައި ބައިވެރިވުމާއި ކޮންޓްރެކްޓްގައި ސޮއިކުރަން މެޑްރިޑަށް ވަރަށް އަވަހަށް ގެލަގާ އާއި އޭނާގެ އޭޖެންޓް ދަތުރުކުރާނެ އެވެ.

އިނގިރޭސި ބައެއް މީޑިއާ ރިޕޯޓްތައް ބުނާގޮތުން، ގެލަގާ ވަނީ އެތުލެޓިކޯ މެޑްރިޑަށް ދިއުމާ ގުޅޭގޮތުން، އިނގިރޭސި ފުލްބެކް، ކިއެރަން ޓްރިޕިއޭއާ ވާހަކަ ދައްކައިފަ އެވެ. ނިއުކާސަލް ޔުނައިޓެޑަށް މި ވަގުތު ކުޅެމުން އަންނަ ޓްރިޕިއޭ ވަނީ މީގެ ކުރިން 2021 ވަނަ އަަހަރު އެތުލެޓިކޯ މެޑްރިޑަށް ކުޅެފަ އެވެ. ޓްރިޕިއޭ ވަނީ އެތުލެޓިކޯ މެޑްރިޑަށް ދިއުމަކީ ގެލަގާ އަށް ރަނގަޅު ނިންމުމަކަށްވާނެ ކަމަށް ބުނެފަ އެވެ.

ޗެލްސީ އެކަޑަމީން ފެށި، ގެލަގާ ވަނީ ލޯން އުސޫލުން، ޗާލްޓަން އެތުލެޓިކް، ސްވަންސީ ސިޓީ، ވެސްޓް ބްރޮމްވިޗް އަލްބިއަން އަދި ކްރިސްޓަލް ޕެލަސް އަށް ކުޅެފަ އެވެ. މިދިޔަ ސީޒަނުގައި ޗެލްސީގެ ކެޕްޓަން ބޭންޑް އަޅައިގެން ގިނަ މެޗުތަކުގައި ކުޅުނު ގެލަގާ ވަނީ ޗެލްސީ އަށް ކުޅެދިން 95 މެޗުން އެ ޓީމަށް 10 ލަނޑު ޖަހައި، 10 ލަނޑު ޖަހަން ފުރުސަތު ތަނަވަސްކޮށްދީފަ އެވެ.