ފަލަސްތީނުގެ ކުރީގެ ބޮޑުވަޒީރު އަދި ހަމާސް ޖަމާއަތުގެ ލީޑަރު އިސްމާއިލް ހަނިއްޔާ ޝަހީދުކޮށްލި މައްސަލާގައި ދިވެހި ސަރުކާރުން އަމަލުކުރި ގޮތުން ފާޑުކިޔުން އަމާޒުވެފައިވަނިކޮށް، އެ ގައުމުގެ އިސްލާމިކް މިނިސްޓަރު ރާއްޖެ އައުމަށް ދައުވަތު ދީފި އެވެ.

ހަނިއްޔާ ޝަހީދުކޮށްލުމާއެކު އިސްލާމީ ދުނިޔޭގެ ގިނަ ގައުމުތަކުން މަދު ގަޑިއިރުކޮޅެއްގެ ތެރޭގައި އިޒްރޭލުގެ އަމަލު ކުށްވެރިކޮށް ތައުޒިޔާ ކިޔެވެ. ނަމަވެސް ދިވެހި ސަރުކާރުން އެކަމާ ގުޅިގެން ބަޔާނެއް ނެރުނީ ހަމަލާއަށް 24 ގަޑިއިރުވީފަހުންނެވެ.

އެ ބަޔާނުގައި އިޒްރޭލުގެ ނަން ބޭނުން ނުކުރުމުންނާއި ގާޒާގައި ކުރިއަށްދަނީ ކާރިސާއެއް ކަމަށާއި "ޖެނޮސައިޑް" އެއް ކަމަށް ނުބުނާތީ ވެސް ފާޑުކިޔުން އަމާޒުވި އެވެ. އަދި އޭނާގެ މައްޗަށް ގައިބަށް ކަށުނަމާދު ކުރަން އިސްލާމިކް މިނިސްޓްރީން ނޭންގި މައްސަލާގައި ވެސް ފާޑުކިޔެވެ.

ފަލަސްތީނުގެ ހާރިޖީ ވަޒީރަށް ރާއްޖެ އައުމަށް ދައުވަތު ދިންކަން އިއުލާނުކުރެއްވީ މިކަމުގައި އެންމެ ބޮޑަށް ފާޑުކިޔުން އަމާޒުވި އިސްލާމިކް މިިނިސްޓަރު ޑރ. މުހައްމަދު ޝަހީމް އެވެ. އޭނާ ސޯޝަލް މީޑިއާގައި ވިދާޅުވީ ފަލަސްތީނުގެ އިސްލާމިކް މިނިސްޓަރު ޑރ. މުހައްމަދު މުސްތަފާއާ ބައްދަލުކުރެއްވި ކަމަށެވެ.

"އަޅުގަނޑު ވާނީ އެމަނިކުފާނު ރާއްޖެ ވަޑައިގެން، އިސްލާމީ މަރުކަޒުގައި ހުތުބާއެއް ދެއްވުމަށް ދައުވަތު އަރުވާފަ، އިންޝާ ﷲ އެމަނިކުފާނު ރާއްޖެ ވަޑައިގަންނަވާނެ،" ޝަހީމު ލިޔުއްވާފައިވެ އެވެ.

ހަނިއްޔާގެ މައްޗަށް އިސްލާމީ ގައުމުތަކުގައި ގައިބަށް ކަށުނަމާދު ކުރީ ހުކުރު ދުވަހު ހުކުރު ނަމާދަށްފަހު އެވެ. ނަމަވެސް އިސްލާމިކް މިނިސްޓްރީން އެ ކަން ދޫކޮށްލީ އިމާމުންގެ އިހުތިޔާރަށެވެ.

މި ނިންމުމަށް ފާޑުކިޔުން އަމާޒުވުމުން ޝަހީމް ވިދާޅުވީ އެގޮތަށް ނިންމީ ގައިބަށް ކަށު ނަމާދު ކުރުމަކީ ވާޖިބަކަށް ނުވާތީ ކަމަށެވެ. އަދި އެކަމާ ފާޑުކީ ދީނީ އިލްމުވެރިންނާ އޭނާ ވަނީ ސޯޝަލް މީޑިއާގައި ޖަދަލުކުރައްވާފަ އެވެ.

"ދީނީ ކަމެއް ތި ގޮތަށް ސިޔާސީ ކޮށްލުމަކީ ވަރަށް ބޮޑު ނުބައެއް، ސަރުކާރާ މެދު ނަފުރަތު އުފައްދަން ތި ކުރާ މަސައްކަތް ހުއްޓާލަން ޖެހޭ،" ކުރީގެ އިސްލާމިކް މިނިސްޓަރުގެ ފާޑުކިޔުމަށް ރައްދު ދެއްވާ ޝަހީމު ލިޔުއްވި އެވެ.

އިތުރަށް ކިޔާލަން