މެޑްރިޑް (އޮގަސްޓް 1) - ޔޫރަޕްގެ ޗެމްޕިއަން ރެއާލް މެޑްރިޑަށް މިހާރު ޓްރާންސްފާ މާކެޓް ބަންދުވެފައިވާ ކަމަށާއި, އަންނަ ސީޒަނަށް އެ ކުލަބުން އިތުރު ކުޅުންތެރިޔަކު ނުގެންނާނެ ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.

ރެއާލުން އަންނަ ސީޒަނަށް ތައްޔާރުވުމުގެ ގޮތުން ވަނީ ހިލޭ އެއްބަސްވުމެއްގެ ދަށުން ފްރާންސްގެ ތަރި ކީލިއަން އެމްބާޕޭގެ ސޮއި ހޯދައިފަ އެވެ. ރެއާލަށް އެމްބާޕޭ ބަދަލުވީ ޕީއެސްޖީއާ އެކު އެމްބާޕޭ ހަދާފައިވާ އެއްބަސްވުން ނިމުމުންނެވެ. މިދިޔަ ތިން ސީޒަނުގައި ވެސް ރެއާލުން ވަނީ އެމްބާޕޭގެ ސޮއި ހޯދަން މަސައްކަތް ކޮށްފަ އެވެ.

މީގެ އިތުރުން އަންނަ ސީޒަނުގައި ރެއާލުގެ ސްކޮޑުން ފެންނާނެ އިތުރު ކުޅުންތެރިޔަކީ ބްރެޒިލްގެ ޒުވާން ފޯވާޑް އެންޑްރިކް އެވެ. އަންޗެލޮޓީ ދެކޭ ގޮތުގައި މި ޓްރާންސްފާ މާކެޓުގައި މި ދެ ކުޅުންތެރިން ޓީމާ ގުޅުމުން އިތުރު ކުޅުންތެރިޔަކު ދެން ސްކޮޑަށް ބޭނުން ނުވެ އެވެ.

"އަހަރެމެންގެ ސްކޮޑު މިހާރު މި އޮތީ އަންނަ ސީޒަނަށް ތައްޔާރުވެފައި، މި ސްކޮޑަށް އިތުރު ކުޅުންތެރިޔަކު ބޭނުމެއް ނުވޭ. ވެލޯހޯ އަހަރެމެންނާ ގުޅިއްޖެ. ދެން ޑޭވިޑް އަލަބާ ވެސް އަންނަނީ ރަނގަޅުވަމުން. އަހަރެމެންގެ އެބަތިބި ޒުވާން ތަރިން." އަންޗެލޮޓީ ބުންޏެވެ.

މީގެ އިތުރުން އެންޑްރިކް މިހާރު އަންނަނީ ރެއާލްގެ ފަރިތަކުރުންތަކުގައި ބައިވެރިވަމުން ކަމަށާއި، ރެއާލްގެ ޖާޒީގައި ފުރަތަމަ ފަހަރަށް އެންޑްރިކް މިއަދު ފެންނާނެ ކަމަށް އަންޗެލޮޓީ ބުންޏެވެ. އެންޑްރިކްގެ ފަރާތުން ފަރިތަކުރުންތަކުގައި ފެންނަނީ ޕޮޒިޓިވް ކަންތައްތަކެއް ކަމަށާއި ރެއާލްގެ ޖާޒީގައި އެންޑްރިކްގެ ހުނަރު ފެނިގެންދާނެ ކަމުގެ ޔަގީންކަން އަންޗެލޮޓީ ދިނެވެ.

މިދިޔަ އަހަރުތަކުގައި ރެއާލުން ފެނުނު ކުޅުންތެރިންގެ ތެރެއިން އަންނަ ސީޒަނުގައި ނުހުންނާނެ އެންމެ ބޮޑު ނަމަކީ، ޖަރުމަނުގެ ތަރި ޓޯނީ ކްރޫސް އެވެ. ކްރޫސް ވަނީ މި ފަހަރުގެ ޔޫރޯ އަށް ފަހު ފުޓްބޯޅައިން ރިޓަޔާކޮށްފަ އެވެ.