ކުރީ ސަރުކާރުގެ ދުވަސްވަރު ރާއްޖޭގައި އެއްވެސް ރިސޯޓެއް ހުޅުވާފައިވާ ނުވާ ކަމަށް ވިދާޅުވެ، ރައްޔިތުންގެ މަޖިލީހުގެ މެޖޯރިޓީ ލީޑަރު އަދި އިނގުރައިދޫ މެމްބަރު އިބްރާހިމް ފަލާހު މަޖިލީހުގެ ތަޅުމުގައި އިތުރުފުޅު ހައްދަވައިފި އެވެ.

ރައްޔިތުންގެ މަޖިލީހުގެ އިއްޔެގެ ޖަލްސާގައި ފަލާހު މިހެން ވިދާޅުވީ މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު ކަމުން އަލީ ހާޝިމް ވަކިކުރަން ރައީސަށް ލަފާ ދިނުމާ ގުޅޭގޮތުން މާލިއްޔަތު ކޮމިޓީގެ ރިޕޯޓަށް ބަހުސްކުރައްވަމުންނެވެ.

"އެއްވެސް ކަމެއް، ރާއްޖެއަށް އާމްދަނީއެއް ލިބޭނެ އެއްވެސް ސިނާއަތެއް އުފެއްދިފަ ނެތް. އެއްވެސް ކަމެއް ނެތް ކުރެވިފައި. އެންމެ ކުޑަމިނުން ރާއްޖޭގެ އަތޮޅެއްގައި ރިސޯޓެއް ވެސް ހުޅުވާލެވިފަކާ ނެތް." ފަލާހު ވިދާޅުވި އެވެ.

ފަލާހު މިހެން ވިދާޅުވި ނަމަވެސް، ތަފާސްހިސާބުތައް އެކުލަވާލާއި އާންމުކުރުމުގެ ޒިންމާ މަތިކުރެވިފައިވާ ދައުލަތުގެ އިދާރާ، މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް ނުވަތަ ސްޓެޓިސްޓިކްސް ބިއުރޯ) އިން ހާމަކޮށްފައި ހުރި ރަސްމީ ތަފާސްހިސާބުތަކުން ފަލާހު ވާހަކަ ދެއްކެވީ ހަގީގަތާ ހިލާފަށް ކަން އެނގެ އެެވެ.

ސްޓެޓިސްޓިކްސް ބިއުރޯގެ ވެބްސައިޓުގައި ޝާއިއުކޮށްފައިވާ ރެކޯޑުތަކުން އެނގޭ ގޮތުގައި 2018 (ކުރީ ސަރުކާރުގެ ދައުރު ފެށުނު އަހަރު) ގެ ނިޔަލަށް، ރިސޯޓުތަކާއި މެރީނާތައް ހިމެނޭހެން، ރާއްޖޭގައި ރަޖިސްޓްރީކޮށްފައި ހުރީ 145 ރިސޯޓެވެ. އަދި އޮޕަރޭޓުކުރަމުން އައީ 130 ރިސޯޓެވެ.

މިދިޔަ އަހަރު (ކުރީ ސަރުކާރުގެ ދައުރު) ނިމުނުއިރު، ރަޖިސްޓްރީކޮށްފައި ހުރީ 180 ރިސޯޓެވެ. އަދި އޮޕަރޭޓުކުރަނީ 176 ރިސޯޓެވެ.

ހުސްވި އަހަރުގެ ނިޔަލަށް ރަޖިސްޓްރީކޮށްފައި ހުރި ރިސޯޓުތުތަކާއި އޮޕަރޭޓުކުރަމުން އައި ރިސޯޓުތަކުން ކުރީ ސަރުކާރުގެ ދައުރު ފެށުނު އަހަރު ހުރި ރިސޯޓުތަކުގެ އަދަދު ގެއްލުމުން، ނިމުނު ސަރުކާރުގެ ފަސް އަހަރުގެ ދައުރުގެ ތެރޭގައި 35 ރިސޯޓު ރަޖިސްޓްރީކޮށް، 46 ރިސޯޓެއްގެ އޮޕަރޭޝަން ފަށާފައިވާކަމަށް ދައްކަ އެވެ.

2018 އާއި 2023 އާ ދެމެދު ހުޅުވި ބައެއް ރިސޯޓުތައް

• ޕަޓީނާ މޯލްޑިވްސް (2021)
• ޖާވާކަރަ މޯލްޑިވްސް (2023)
• ދެ ޗެޑީ ކުޑަ ވިލިނގިލި (2021)
• ހިލްޓަން އަމީންގިރި (2022)
• އޮބްލޫ އެކްސްޕީރިއަންސް އާއިލާފުށި އަދި ލޯބިގިލި (2022)
• ރިޓްޒް ކާލްޓަން ފަރި އައިލެންޑްސް (2021)
• އިފުރު އައިލެންޑް މޯލްޑިވްސް (2023)
• އަވާނީ ފަރެސް (2023)
• އަމާރީ ރާޔާ މޯލްޑިވްސް (2023)
• ބްރެނިއާ ކޮއްޓަފަރު (2020)
• ޔޫ އެންޑް މީ ބައި ކޮކޫން މޯލްޑިވްސް (2019)
• އެމެރަލްޑް މޯލްޑިވްސް (2019)
• ވޮލްޑޯފް އެސްޓޯރިއާ މޯލްޑިވްސް (2019)

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ދުވަސްވަރު ހުޅުވި ރިސޯޓުތަކުގެ އަދަދާއި ކުރީގެ ރައީސް އަބްދުﷲ ޔާމީންގެ ދުވަސްވަރު ރަޖިސްޓްރީ ކުރި އަދަދުތައް އަޅާބަލާއިރު، ރަޖިސްޓްރީ ކުރި ރިސޯޓުތަކުގެ އަދަދު (35) އެއްވަރެވެ.

މިހެން ނަމަވެސް އޮޕަރޭޓުކުރަން ފެށި ރިސޯޓުތަކުގެ އަދަދު ގިނައީ ސޯލިހު ސަރުކާރުގަ އެވެ. އެ ފަސް އަހަރުގެ ތެރޭގައި މުޅިން އަލަށް 46 ރިސޯޓު އޮޕަރޭޓުކުރަން ފެށިއިރު، ޔާމީންގެ ސަރުކާރުގައި އޮޕަރޭޓުކުރަން ފެށީ 29 ރިސޯޓެވެ.