ރެސްޓޯރެންޓަކުން ކެއުމަށްފަހު ބިލު ނުދެއްކި މައްސަލާގައި ދެ މީހަކު ދޫނި ކޮށްޓެއްގައި ރަހީނުކޮށްފި އެވެ.

އާޓިފިޝަލް ބީޗުގައި ހުރި ބޮޑު ދޫނި ކޮށްޓެއްގައި އެ ދެ މީހުން ބަންދުކޮށްފައި ތިބި ވީޑިއޯއެއް އިއްޔެ ސޯޝަލް މީޑިއާގައި ވަނީ ދައުރުވެފަ އެވެ. އެ ކޮށީގައި އެ ދެމީހުން ތިބީ ހުސްގަޔާ އެވެ.

ފުލުހުންގެ އެސިސްޓެންޓް ކޮމިޝަނާ އަދި ތަރުޖަމާނު އަހުމަދު ޝިފާން މި ނޫހާ ވާހަކަ ދައްކަވަމުން ވިދާޅުވީ ދެ މީހަކު ކޮށްޓެއްގައި ބަންދު ކުރި މައްސަލައެއް ފުލުހުން ބަލަމުންދާ ކަމަށެވެ.

އެ ވީޑިއޯއިން ފެންނަނީ އާޓިފިޝަލް ބީޗު ކަމަށާއި އެ ދެ މީހުން އެ ތަނުގައި ބަންދުކުރީ ރެސްޓޯރަންޓަކުން ކެއުމަށްފަހު ބިލު ދައްކަން ދެކޮޅު ހެދުމުން ޖެހުނު މައްސަލައެއްގެ ތެރޭގައި ކަމަށް ވެސް ޝިފާން ވިދާޅުވި އެވެ.

ނަމަވެސް އެ މައްސަލައިގެ އިތުރު ތަފުސީލެއް ފުލުހުން ނުދެ އެވެ. ދޫނި ކޮށީގައި އެ ދެ މީހުން ހައްޔަރު ކުރި މައްސަލައިގައި މީހަކު ހައްޔަރު ކުރި ކަމެއް ނުވަތަ ނުކުރާ ކަމެއް ވެސް ފުލުހުން ނުބުނެ އެވެ.