މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ބެ ބޯޑަށް ދެ މެންބަރަކު އައްޔަންކޮށްފި އެވެ.

އެ ކުންފުނީގެ ސޯޝަލް މީޑިއާ އެކައުންޓުތަކުން ހާމަކޮށްފައިވާ ގޮތުގައި އަލަށް އައްޔަންކޮށްފައިވަނީ އަބްދުލް ސަމީއު އިމާދު އާއި އައިޝަތު ހަމީދު އެވެ.

ސަމީއު އަކީ މީގެކުރިން އުކުޅަސް ޓޫރިޒަމް ބޯޑުގެ ރައީސް ކަމާއި ނޭޝަނަލް ހޮޓެލްސް އެންޑް ގެސްޓުހައުސް އެސޯސިއޭޝަންގެ ރައީސްކަންވެސް ކުރައްވާފައިވާ ބޭފުޅެކެވެ. އޭނާ އަކީ ފަތުރުވެރިކަމުގެ ދާއިރާގެ ގެސްޓްހައުސް ވިޔަފާރިތައް ކުރިއަރުވަން ގިނަ މަސައްކަތްތަކެއް ކުރައްވަމުން ގެންދަވާ ބޭފުޅެއް މެ އެވެ.

މި އަހަރު ޖަރުމަނުގެ ބާލިންގައި ބޭއްވި އައިޓީބީ ފެއާގައި ބައިވެރިވި ވަފުދުގައި ވެސް އޭނާ ބައިވެރިވެވަޑައިގެންނެވި އެވެ. އެ ފެއާގައި ކުރިއަށް ގެންދިޔަ މޯލްޑިވްސް މީޓް ޕެނަލް ޑިސްކަޝަންގެ ޕެނަލުގައިވެސް ބައިވެރިވެވަޑައިގެންނެވި އެވެ.

ބޯޑަށް ދެން އައްޔަންކުރި އައިޝަތު ހަމީދު އެންމެ ފަހުން ހުރީ މޯލްޑިވްސް ގޭސްގެ ސީނިއާ މާކެޓިން އޮފިޝަލެއްގެ ގޮތުގަ އެވެ. އޭގެ ކުރިން އޭނާ ވަނީ އެފްއެސްއެމްގައިވެސް މަސައްކަތް ކުރައްވައިފަ އެވެ. ނަމަވެސް ފަތުރުވެރިކަމުގެ ދާއިރާގައި އޭނާ މިހައިތަނަށް އެއްވެސް މަސައްކަތެއް ކުރެއްވިކަން އެނގޭކަށް ނެތެވެ.

އެމްއެމްޕީއާރުސީގެ ބޯޑަށް އާ ދެ މެންބަރަކު އައްޔަންކޮށްފައި މިވަނީ އެ ކުންފުނީގެ ބޯޑުގެ ގިނަ މެންބަރުންތަކެއް އެއްފަހަރާ މަގާމާ ދުރުވެ، ކުންފުނީގެ ކުރިމަގާމެދު ސުވާލުތަކެއް އުފެދިފައިވަނިކޮށެވެ.

އެގޮތުން ކުންފުނި ތެރޭ ހައިޖާނެއް އުފެދި، މެއި 21، ގައި އެ ކޯޕަރޭޝަނުގެ ޗެއާޕާސަން އަައިޝާ ނޫރައިން ނަޖާހު އަދި ބޯޑު މެމްބަރު ރާފިލް މުހައްމަދު އިސްތިއުފާދެއްވި އެވެ. ޖެހިގެން އައި ދުވަހު މެނޭޖިން ޑިރެކްޓަރުގެ މަގާމުގައި ހުންނެވި ފާތިމަތު ތައުފީގު (ކުޑީ) ވަނީ މަގާމުން ވަކިކޮށްފަ އެވެ.

ހުސްވެފައިވާ ޗެއާޕާސަންގެ މަގާމަށް މިހާތަނަށް އެއްވެސް ފަރާތެއް އައްޔަންކޮށްފައި ނުވާއިރު، ކުންފުނީގެ އެމްޑީގެ މަގާމަށް ރާއްޖޭގެ މަޝްހޫރު ޓޭބަލް ޓެނިސް ކުޅުންތެރިޔާ އިބްރާހިމް ޝިއުރީ ވަނީ އައްޔަންކޮށްފަ އެވެ.