އިނގިރޭސިވިލާތުގެ އިންތިހާބީ ބޮޑުވަޒީރު، އެ ގައުމުގެ ލޭބާ ޕާޓީގެ ލީޑަރު ކިއޭ ސްޓާމާ އަށް ރައީސް ޑރ. މުހައްމަދު މުއިއްޒު މަރުހަބާ ދަންނަވައިފި އެވެ.

އެމަނިކުފާނުގެ ރަސްމީ އެކްސް އެކައުންޓުން ކުރެއްވި ޕޯސްޓެއްގައި ރައީސް މުއިއްޒު ވަނީ، ލޭބާ ޕާޓީގެ ވެރިކަމުގައި އެ ގައުމަށް އިތުރު ކުރިއެރުމާ ފާގަތިކަން ގެނެސްދޭނެ ކަމުގެ ޔަގީންކަން އެބައޮތްކަމުގައި ވިދާޅުވެފައިވެ އެވެ.

އަދި، އިނގިރޭސިވިލާތާއި ރާއްޖެއާ ދެމެދު އޮތް ގުޅުން އިތުރަށް ބަދަހިކުރަން ސްޓާމާ އެކު ގުޅިގެން މަސައްކަތް ކުރައްވާނެ ކަމަށް ރައީސް މުއިއްޒު ލިޔުއްވާފައިވެ އެވެ.

ސާދަ އަހަރަށްފަހު ލޭބާ ޕާޓީ އިނގިރޭސިވިލާތުގެ އާންމު އިންތިހާބު ކާމިޔާބުކުރީ 409 ގޮނޑި ކާމިޔާބުކޮށްގެންނެވެ. އެ ޕާޓީއާ އެންމެ ގާތުން ވާދަކުރި މިހާރު ވެރިކަމުގައި އޮތް ކޮންޒަވޭޓިވްއަށް ކާމިޔާބު ކުރެވުނީ 120 ގޮނޑި އެވެ.

އިންތިހާބުގައި ވާދަކުރެއްވި އިނގިރޭސިވިލާތުގެ މިހާރުގެ ބޮޑުވަޒީރު ރިޝީ ސުނާކްގެ ގޮނޑި އެމަނިކުފާނު ދިފާއު ކުރެއްވި ނަމަވެސް، ކެބިނެޓުގައި މިހާރު ހިމެނޭ ގިނަ މެންބަރުންނަށް ގޮނޑި ދިފާއު ނުކުރެވެ އެވެ.

އިނގިރޭސިވިލާތުގެ ހާލަތު ދަށްވެ ސަރުކާރަށް ފާޑުކިޔުން އަމާޒުވެފައިވާ ދަނޑިވަޅެއްގައި އާންމު އިންތިހާބު ކުއްލި ގޮތަކަށް ޖުލައިގައި ބޭއްވުމަށް ނިންމުމާއެކު، ކޮންޒަވޭޓިވް ޕާޓީއަށް އިންތިހާބު ކާމިޔާބު ކުރެވޭނެކަމާމެދު ގިނަ ބަޔަކު ސުވާލު އުފެއްދި އެވެ.