މިހާރު ކުރިއަށްދާ އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕް ފުޓްބޯޅަ މުބާރާތުގައި ކްލަބް ގްރީން ސްޓްރީޓްސް އަތުން ފަހަތުން އަަަރައި 3-1 އިން މޮޅުވެ، އެންމެ ފަހުގެ ޗެމްޕިއަން، ކްލަބް އީގަލްސް އިން ސެމީ ފައިނަލުގެ ފަހު ޖާގަ ހޯދައިފި އެވެ.

ގްރޫޕް ބީގެ އެއް ވަނަ ހޯދީ ތިން މެޗުން ހަތް ޕޮއިންޓް ހޯދި މާޒިޔާ ސްޕޯޓްސް އެންޑް ރެކްރިއޭޝަނުންނެވެ. ދެ ވަނަ ހޯދި އީގަލްސް އަށް ތިން މެޗުން ވަނީ ހަ ޕޮއިންޓް ލިބިފަ އެވެ. ގްރީން ސްޓްރީޓްސް އަށް ވަނީ ތިން މެޗުން ހަތަރު ޕޮއިންޓް ލިބިފަ އެވެ. މި ގްރޫޕްގެ ފުލުން ނިންމާލި ޔުނައިޓެޑް ވިކްޓަރީ އަށް ޕޮއިންޓެއް ނުލިބެ އެެވެ.

ސެމީ ފައިނަލް ދެ މެޗު ބުރާސްފަތި ދުވަހު ކުޅޭއިރު، ހަވީރު ފުރަތަމަ ސެމީގައި، ގްރޫޕް އޭގެ އެއް ވަނަ، ސުޕަ ޔުނައިޓެޑް ސްޕޯޓްސް (ސަސް) ކުޅޭނީ ބީގެ ދެ ވަނަ އީގަލްސްއާ އެވެ. މިއީ، 2022 ވަަނަ އަހަރުގެ ފައިނަލުގައި ބައްދަލުކުރި ދެ ޓީމެވެ. ދެ ވަނަ ސެމީ ފައިނަލުގައި، ބުރާސްފަތި ދުވަހުގެރޭ މާޒިޔާ ކުޅޭނީ ޓީސީއާ އެވެ.

އީގަލްސް އާއި ކްލަބް ގްރީން ސްޓްރީޓްސް މިރޭ ކުޅުނު މެޗުގެ ތެރެއިން.-- ފޮޓޯ: ނައުޝަމް ވަހީދު / އިމޭޖަސް.އެމްވީ

ގަލޮޅު ދަނޑުގައި މިރޭ ކުޅުނު މެޗުގައި ގްރީން ސްޓްރީޓްސް އިން ލީޑުނެގީ، 18 ވަނަ މިނިޓްގައި ޕެނަލްޓީ އަކުން އަބްދުﷲ އަނޫސް ޖެހި ގޯލުންނެވެ.

އީގަލްސް އިން ވަނީ ފުރަތަމަ ހާފު ނިމުމުގެ ކުރިން މެޗުގެ، 41 ވަނަ މިނިޓްގައި އަލީ ރިސްވާން ޖެހި ގޯލުން އެއްވަރުކޮށްފަ އެވެ.

ދެ ވަނަ ހާފުގެ ބޮޑުބައިގައި ދެ ޓީމު އެއްވަރުވެފައި އޮތްއިރު، އީގަލްސް މޮޅުވީ ފަހު 10 މިނިޓް ތެރޭގައި ޖެހި ދެ ލަނޑުންނެވެ. އީގަލްސް އިން ލީޑުނެގި ލަނޑު ޖެހީ މެޗުގެ 83 ވަަނަ މިނިޓްގަ އެެވެ. މި ލަނޑު ޖެހީ އޭރިއާތެރެއިން ލިބުނު ފުރުސަތަކުން އަބްދުﷲ ޒުހާން ހަސަން މުހައްމަދު އެވެ.

އީގަލްސްގެ ފަހު ގޯލު ޕެނަލްޓީ އަކުން ކާމިޔާބުކުރީ އަހުމަދު އަފްލާޒް އެވެ. އަފްލާޒް އަކީ މި މެޗުގައި ބަދަލަކަށް ކުޅެން އެރި ކުޅުންތެރިއެކެވެ.