ލިވަޕޫލް (ޖޫން 20) - ލިވަޕޫލްގެ ކޯޗަކަށް ވާން ލިބުނު ފުރުސަތުގެ ބޭނުންހިފަން ގަޔާވި އެއް ސަބަބަކީ މެންޗެސްޓާ ސިޓީގެ ކޯޗު ޕެޕް ގާޑިއޯލާ އާއި ލިވަޕޫލްގެ ކުރީގެ ކޯޗު ޔާގަން ކްލޮޕްގެ ވާދަވެރިކަން ކަމަށް އެ ޓީމާ އަލަށް ހަވާލުވި ކޯޗު ނެދަލެންޑްސްގެ އާނޭ ސްލޮޓް ބުނެފި އެވެ.

މިދިޔަ އަހަރު ވެސް ޕްރިމިއާ ލީގުގެ ކްލަބްތަކުން އޮފާ ލިބުނު ކޯޗު، ސްލޮޓް، ނެދަލެންޑްސްގެ ފެޔަނޫޑް ދޫކޮށްލަން ނިންމި އެންމެ ބޮޑު ސަބަބަކީ އާ ޗެލެންޖެއް ނެގުން ކަމަށް، ލިވަޕޫލާ ހަވާލުވި ފަހުން ދިން ރަސްމީ ފުރަތަމަ އިންޓަވިއުގައި ވަނީ ބުނެފަ އެވެ.

އެ ގޮތުން، ސްލޮޓް ބުނީ، ޔޫރަޕްގެ ފުޓްބޯޅައިގައި މި ވަގުތު އެންމެ ވާދަވެރި ކުރިމަތިލުމުގެ ގޮތުގައި އޮތީ މެންޗެސްޓާ ސިޓީ އާއި ލިވަޕޫލްގެ މެޗުތައް ކަަމަށެވެ. ކުރިން ބާސެލޯނާ އާއި ރެއާލް މެޑްރިޑާ ދެމެދު އޮތް ލެވަލްގެ ވާދަވެރިކަމެއް ލިވަޕޫލާއި ސިޓީގެ ދެމެދުގައި އުފެދުނީ ގާޑިއޯލާ އާއި ކްލޮޕްގެ ސަބަބުން ކަމަށެވެ.

ސްލޮޓް، 45، ބުނީ އެ ފަދަ ވާދަވެރިކަމެއްގެ ތެރެއަށް އަންނަން އޭނާ ބޭނުންވީ ކެރިއަރަށް ވެސް ވިސްނުމަށް ފަހު ކަމަށެވެ.

"ލިވަޕޫލްގެ ހުށަހެޅުން އަހަންނަށް ލިބުނުއިރު ވެސް އަހަރެން އައީ، ލިވަޕޫލާއި ސިޓީގެ މެޗުތައް ބަލަމުން، ދެން، ލިވަޕޫލް ކަހަލަ ކްލަބެއްގެ އޮފާ އައުމަކީ މާގިނަ ވަގުތެއް ގޮތެއް ނިންމަން ނަގާނެ ކަމެއް ނޫން،" ތިން އަހަރުގެ ކޮންޓްރެކްޓެއްގައި ލިވަޕޫލާ އެކު ސޮއިކުރި ސްލޮޓް ބުންޏެވެ.

ސްލޮޓް ވަނީ ފެޔަނޫޑްގައި އިތުރު އެއް ސީޒަން މަޑުކުރަން ލިވަޕޫލްގެ ހުށަހެޅުން އައުމުގެ ކުރިން ނިންމައިފަ އެވެ. އެކަމަކު ހުރިހާ ކަމެއް ބަދަލުވީ ހީވެސް ނުކުރާ ގޮތަށް ކަމަށް ސްލޮޓް ވަނީ ބުނެފަ އެެވެ.

ލިވަޕޫލްގެ ކުރީގެ ކޯޗު ކްލޮޕްގެ ޓްރެއިނިން ސެޝަންތަކުގެ ވީޑިއޯތަައް ބަލާފައިވާނެ ކަމަށާއި އަމިއްލަ ފިލޯސަފީގެ ކަންކަން ވެސް ލިވަޕޫލަށް ގެންނާނެ ކަމަށް ސްލޮޓް ވަނީ ބުނެފަ އެވެ. އަދި ކްލޮޕްގެ ފަރާތުން އޭނާ އަށް ލިބެމުން އަންނަ އެއްބާރުލުމުގެ ވާހަކަތައް ވެސް ސްލޮޓް ވަނީ އުފަލާ އެކު ހިއްސާކޮށްފަ އެވެ.

"ކްލޮޕް، ލިވަޕޫލާ ހުރި ގާތްކަމަކީ އޭނާ މި ކްލަބްގެ އެންމެ ބޮޑު ސަޕޯޓަރަށް ވާނެ ކަމަށް ބުނެފައިވޭ. އޭނަ އަހަންނަށް ސަޕޯޓް ދޭތީ އަހަންނަށް ވަރަށް ހާއްސަ،" ސްލޮޓް ބުންޏެވެ.

ޕްރީ ސީޒަނުގައި ސްލޮޓްގެ ކޯޗުކަމުގައި ލިވަޕޫލުން ކުޅޭ ފުރަތަމަ މެޗު އޮތީ އަންނަ މަހުގެ 27 ގައި ރެއާލް ބެޓިސްއާ ދެކޮޅަށެވެ. އިނގިރޭސި ޕްރިމިއާ ލީގުގައި ލިވަޕޫލުން ފުރަތަމަ މެޗުގައި އޮގަސްޓް 17 ވަނަ ދުވަހު ކުޅޭނީ އަލަށް ޕްރޮމޯޓްވި އިޕްސްވިޗް ޓައުންއާ ދެކޮޅަށެވެ.