މިއުނިކް (ޖޫން 18) - ޔޫރޯ ފުޓްބޯޅަ މުބާރާތުގައި އިންގްލެންޑުން ކުޅުނު ފުރަތަމަ މެޗުގައި ސާބިއާ އަތުން 1-0 އިން މޮޅުވިއިރު، އެ މެޗުގެ ތެރެއިން އިންގްލެންޑް ކުޅުންތެރިންނާ ނަސްލީ ގޮތުން ދިމާކުރި މައްސަލައެއް ބަލަމުން އަންނަ ކަމަށް ޔުއެފާ އިން ހާމަކޮށްފި އެވެ.

ރިޕޯޓްތައް ބުނާގޮތުން، ޔުއެފާ އަށް މި މައްސަަލަ ހުށަހެޅީ އިންގްލެންޑުންނެއް ނޫނެވެ. ޔުއެފާ އިން އާންމުކުރި ބަޔާނެއްގައި ބުނެފައިވަނީ، ހުށަހެޅިފައިވާ، ސާބިއާ ސަޕޯޓަރުންނާ ގުޅޭ ނަސްލީ ތަފާތުކުރުމަށް ހިތްވަރުދޭ މައްސަލައެއް ބަލަން ފަށައިފައިވާ ކަމަށެވެ.

މި ފަަހަރުގެ ޔޫރޯ ފުޓްބޯޅަ މުބާރާތް ކުރިއަށްދާއިރު، ޔުއެފާ އިން ވަނީ ދަނޑުތަކުގައި އަހުލާގީ އެކި މައްސަލަތައް ރިޕޯޓްކުރަން އޮބްޒާވަރުން ބަހައްޓައިފަ އެވެ. އެ ގޮތުން، އިންގްލެންޑާ ދެކޮޅަށް ސާބިއާ އިން ކުޅުނު މެޗުގައި އެ ޓީމުގެ ސަޕޯޓަރުން ތިބި ސަރަހައްދުން ވަނީ، އިނގިރޭސި ކުޅުންތެރިންނާ ނަސްލީ ގޮތުން ދިމާކޮށްފަ އެެެވެ.

އެ މައްސަަލަ ޔުއެފާގެ ޑިސިލްޕިނަރީ ކޮމީޓީން އަންނަނީ ވަރަށް ފުޅާދާއިރާއެއްގައި ތަހުގީގު ކުރަމުންނެވެ.

މީގެ އިތުރުން، ޔުއެފާ އިން ވަނީ ސާބިއާ ފުޓްބޯޅަ ފެޑެރޭޝަން ޖޫރިމަނާކޮށްފަ އެވެ. އެއީ، އެ މެޗުގެ ތެރެއިން ދަނޑަށް އެއްޗެހި އުކާފައިވާތީ އެވެ.

އިންގްލެންޑާއި ސާބިއާ ކުޅުނު މެޗުގެ ކުރިން ދެ ޓީމުގެ ސަޕޯޓަރުންގެ މެދުގައި މާރާމާރީއެއް ވެސް ހިނގި އެވެ. އެހެންވެ، ޖަރުމަނު ފުލުހުން ވަނީ ހަތް މީހަކު ހިފަހައްޓައިފަ އެެވެ. އޭގެ ތެެެރެއިން ހަތް މީހަކު ނިސްބަތްވަނީ ސާބިއާ އަށެވެ.

އިޓަލީން ފަހަތުން އަރައި، އަލްބޭނިއާ އަތުން މޮޅުވި މެޗުގައި، އެ ޓީމުގެ ސަޕޯޓަރުން ވެސް ނަސްލީ ތަފާތު ކުރުމަށް ހިތްވަރުދޭ ގޮތަށް ޝުއޫރުފާޅުކުރި މަައްސަލައެއް ޔުއެފާ އިން އަންނަނީ ބަލަމުންނެވެ.