ޓިއުރިން (ޖޫން 13) - ޔުވެންޓަސްގެ ކޯޗުކަމާ ތިން އަހަރުގެ ކޮންޓްރެކްޓެއްގައި އިޓަލީގެ ކުރީގެ މިޑްފީލްޑަރު، ތިއާގޯ މޮޓާ ހަވާލުވެއްޖެ އެވެ.

މޮޓާ، 41، މިދިޔަ ސީޒަނުގައި ހަވާލުވެހުރި ބޮލޯނިއާ ވަނީ އަންނަ ސީޒަނުގެ ޗެމްޕިއަންސް ލީގަށް ކޮލިފައިވެފަ އެވެ. އެ ޓީމުގައި ކާމިޔާބު މަސައްކަތްތަކެއް ކުރުމަށް ފަހު، މޮޓާ، ޔުވެންޓަސް އަށް ބަދަލުވާން ނިންމީ، ކޯޗިން ކެރިއަރަށް ވިސްނައިފަ އެވެ.

"ޔުވެންޓަސް ކަހަލަ ބޮޑު ކްލަބެއްގައި، އަހަރެންގެ ކޯޗިން ކެރިއަރުގެ މި ޗެޕްޓަރު ފަށަން މި ހުރީ ވަރަށް ކެތްމަދުވެފައި. ކްލަބްގެ ވެރިންނާއި މެނޭޖްމަންޓަށް ވަރަށް ބޮޑަށް ޝުކުރު އަދާކުރަން އުންމީދަކީ، މި ކްލަބް އުހުގައި ބޭއްވުން،" ޔުވެންޓަސްގެ ރަސްމީ ވެބްސައިޓަށް ދިން އިންޓަވިއުއެއްގައި މޮޓާ ބުންޏެވެ.

ބްރެޒިލަށް އުފަން ނަމަވެސް، މޮޓާ ކުޅެފައިވަނީ އިޓަލީ ގައުމީ ޓީމަށެވެ. ކްލަބް ކެރިއަރުގައި ބާސެލޯނާ އާއި އިންޓަ މިލާން އަދި ޕީއެސްޖީ އަށް ކުޅުނެވެ.

މޮޓާ، 2018 ވަނަ އަހަރު ޕްރޮފެޝަނަލް ފުޓްބޯޅައިން ރިޓަޔާކުރީ ޕީއެސްޖީގައި ހުރެފަ އެވެ. އެ އަހަރު އޭނާ ވަނީ ޕީއެސްޖީ 19 އަހަރުން ދަށުގެ ޓީމާ އެކު ކޯޗިން ކެރިއަރު ފަށައިފަ އެެވެ. ކޯޗެއްގެ ގޮތުގައި ސީނިއާ ޓީމަކާ ހަވާލުވެ މޮޓާ ފުރަތަމަ ފަހަރަށް ޕްރޮޖެކްޓެއް ފެށީ 2019 ވަނަ އަހަރު ޖެނޯއާގަ އެވެ. އެކަމަކު، އެ ޓީމުގައި އެކަށީގެންވާ ވަގުތު ނުލިބުމުން މަގާމުން ދުރުވެ، 2021/2022 ވަަނަ ސީޒަނުގައި ހުރީ ސްޕެޒިއާ ގަ އެވެ.

ޖެހިޖެހިގެން ދެ ސީޒަނުގައި، ސްޕެޒިއާ، އިޓާލިއަން ލީގުގެ ރެލިގޭޝަނުން ސަލާމަތްކޮށްދިނުމަށް ފަހު، އެ ކްލަބްގެ މެނޭޖްމަންޓާ މަޝްވަރާކޮށް އެ ކްލަބް ދޫކޮށްލަން ނިންމި އެވެ. އޭގެ ފަހުން، 2022 ވަނަ އަހަރު ސީޒަން ފެށި ފަހުން، ބޮލޯނިއާއާ ހަވާލުވެ، އެ ޓީމަށް ލީގުގެ ނުވަ ވަނަ ހޯދައިިދިނެވެ. އަދި ބޮލޯނިއާއާ އެކު ހޭދަކުރި ފުރަތަމަ ފުލް ސީޒަނުގައި މޮޓާ ވަނީ އެ ޓީމަށް ގަދަ ފަހެއްގެ ޖާގަ ހޯދައިދީ، ކްލަބް ތާރީހުގައި ފުރަތަމަ ފަހަރަށް ޗެމްޕިއަންސް ލީގަށް ގެންގޮސްދީފަ އެވެ.