ސްކޭމްތަކުން މީހުން ސަލާމަތްކޮށް އެ ކުށްކުރާ މީހުން ހޯދުމަށް ހާއްސަކޮށް އެންޓި ސްކޭމް ސެންޓަރެއް ގާއިމުކުރަން ފުލުހުންގެ އިދާރާއިން ނިންމާފައިވާ ކަމަށް އެސިސްޓެންޓް ކޮމިޝަނާ އޮފް ޕޮލިސް އަހުމަދު ޝިފާން ވިދާޅުވެއްޖެ އެވެ.

ކުރިއަށް އޮތް ފަސް އަހަރަށް ފުލުހުންގެ ހިދުމަތުން އެކުލަވާލާފައިވާ ސްޓްރެޓީޖިކް އެކްޝަން ޕްލޭނާ ގުޅޭގޮތުން މިރޭ ޕަބްލިކް ސާވިސް މީޑިއާގެ ޕްރޮގްރާމެއްގައި ޝިފާން ވިދާޅުވީ މަސްތުވާތަކެއްޗަށްފަހު ދިވެހިން މިހާރު އެންމެ ކަންބޮޑުވަނީ ސްކޭމްގެ ކުށްތަކާ ގުޅިގެން ކަމަށެވެ.

"އަޅުގަނޑުމެން އެބަ އެސްޓަބްލިޝްކުރަން ވަރަށް އަވަހަށް މި ސްޓްރެޓީޖިކް ޕްލޭންގެ ތެރެއިން އެންޓި ސްކޭމް ސެންޓަރެއް، ދެން އެންޓި ސްކޭމް ސެންޓަރަކީ މިއީ އަޅުގަނޑުމެން ހަމައެކަނި އިންވެންޓުކުރާ އެއްޗެއް ނޫން، ދުނިޔޭގެ ބޮޑެތި ގައުމުތަކުގައި މިހާރު މަސައްކަތް ކުރާ ކޮންސެޕްޓެއް މިއީ،" ޝިފާން ވިދާޅުވި އެވެ.

މި ސެންޓަރު ގާއިމުކުރެވުމުން ރާއްޖޭގެ ކޮންމެ ސަރަހައްދަކުން ހުށަހެޅޭ ސްކޭމްގެ މައްސަލައެއްގައިވިޔަސް ފުރަތަމަ ރެސްޕޮންސް ދޭނީ އެ ސެންޓަރުންނެވެ.

"ވިކްޓިމައިޒް ވެފަ ހުންނަ މީހަކު އިތުރަށް ވިކްޓިމައިޒް ނުވަން ކުރަން ޖެހޭ ހުރިހާ މަސައްކަތެއް ވަގުތުން ކުރާނެ، ބޭންކުތަކާ ގުޅިގެން އެ މީހާއަށް ހިމާޔަތްދީ އެމީހާއަށް ކޮށްދެންޖެހޭ ކަންކަން ކުރުމަށްޓާކާ [އެންޓި ސްކޭމް ސެންޓަރު ހާއްސަވަނީ]،" ފުލުހުންގެ ތަރުޖަމާނުގެ ގޮތުގައިވެސް ހުންނެވި ޝިފާނު ވިދާޅުވި އެވެ.

ސީދާ ވަކި ތާރީހެއް ނުދެއްވިޔަސް އޭނާ ވިދާޅުވީ އެ ސެންޓަރު ވަރަށް އަވަސް މުސްތަގުބަލެއްގެ ތެރޭގަިއ ގާއިމުކުރެވޭނެ ކަމަށެވެ.

ސްކޭމްތަކުގެ މައްސަލަތަކުގެ ރެކޯޑް ފުލުހުން ބަލަހައްޓަން ފެށީއްސުރެ މިހައިތަނަށް އާންމުންގެ އަތުން ގެއްލުނު ފައިސާގެ އަދަދު 150 މިލިއަނަށްވުރެ އިތުރެވެ.

"2021 އިން ފެށިގެން އަޅުގަނޑުމެން ރިކޯޑު ބަލަހައްޓަން ފެށިއިރުގައި މިހައިތަނަށް އަޅުގަނޑުމެންނަށް ހުށަހެޅިފައި އެބައޮތް 28،003 މައްސަލައެއް، 28،003 ސްކޭމްގެ އެކި ބާވަތުގެ މައްސަލަތައް ހުށަހެޅިފައިވާއިރު އޭގެ ޖުމުލަ ގެއްލުން 57.8 މިލިއަން ވަރު އެބައުޅޭ، އެއީ ހަމައެކަނި ދިވެހި ފައިސާއިން އަދި ޑޮލަރު ވެސް އެބަހުރި، 64 ލައްކަ ޑޮލަރު ގެއްލިފައި ޖުމުލަ ޓޯޓަލް އަދަދު،" ޖެނުއަރީ 31، ގައި އިކޮނޮމިކް ކްރައިމް ޑިޕާޓްމަންޓްގެ ހެޑް ސުޕްރިޓެންޑެންޓް އޮފް ޕޮލިސް އަބްދުﷲ ރަޝީދު ވިދާޅުވި އެވެ.