ރާއްޖޭގައި ހިދުމަތް ދޭ ޓެކްސީ ސެންޓަރުތައް މޮނީޓާކުރުމުގެ މަސައްކަތް ޓްރާންސްޕޯޓު މިނިސްޓްރީން ފަށައިފި އެވެ.

ޓްރާންސްޕޯޓު މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި މިނސްޓަރު މުހައްމަދު އަމީން ވިދާޅުވީ މާލޭގެ މަގުތަކުގެ ތޮއްޖެހުން ކުޑަކުރުމުގެ ގޮތުން އެ މިނިސްޓްރީން ގިނަ މަސައްކަތްތަކެއް ކުރަމުން އަންނަ ކަމަށެވެ.

އޭގެ ތެރޭގައި މާލޭގެ ޕާކިން ޒޯނުތަކުގައ ހުރި ބޭނުންނުކުރާ އަދި ގިނަ ދުވަސްވެފައި ހުރި އުޅަނދުތައް ނައްތައިލުން ހިމެނެ އެވެ. އެގޮތުން 281 އުޅަނދެއް އެ މިނިސްޓްރީން ނައްތާލާފައިވާކަމަށް އޭނާ ވިދާޅުވި އެވެ.

ޓްރާންސްޕޯޓް މިނިސްޓްރީން ޓެކްސީ ސެންޓްރުތައް މޮނީޓާކުރަން ފަށާފައިވާއިރު، ރަޖިސްޓާކޮށްގެން ރާއްޖޭގައި 16 ޓެކްސީ ސެންޓަރެއް އަދި 1870 ޓެކްސީއެއް ހިންގަމުން އަންނަ ކަން މިނިސްޓަރު ފާހަގަކުރެއްވި އެވެ.

"މިނިސްޓްރީގެ ދަށުން ރަޖިސްޓާކޮށްގެން 16 ޓެކްސީ ސެންޓަރއް އެބަ ހިންގާ. މި ޓެކްސީ ލައިންތަކުން ވެސް އުފުއްލަންޖެހޭ ޒިންމާތަކެއް ހުރީމައާއެކީގަ މޮނީޓާކުރުމުގެ މަސައްކަތް އަޅުގަނޑުމެން އެބަ ކުރިއަށް ގެންދަން،" މިނިސްޓަރު އަމީން ވިދާޅުވި އެވެ.

މިނިސްޓަރު އިތުރަށް ވިދާޅުވީ ޓެކްސީތަކުން ނަގާ އަގުތަކުގެ ގޮތުގައި ކުރީ ސަރުކާރުން ކަނޑައަޅާފައިވާ އަދަދުތައް ބަދަލުކުރުމުގެ ވިސްނުމެއް ނުގެންގުޅޭ ކަމަށެވެ. ނަމަވެސް، އަގުތަކާއި ގުޅިގެން އަންނަ ޝަކުވާތަކަށް އޮތް އެއް ހައްލަކީ މީޓާޑް ޓެކްސީގެ ހިދުމަތް ތައާރަފުކުރުން ކަމުގައި މިނިސްޓަރު އަމީން ފާހަގަކުރެއްވި އެވެ.

"އަޅުގަނޑުމެންނަށް ގަބޫލުކުރެވޭ ގޮތުގަ އެންމެ ރަނގަޅު އެއް ނިޒާމަކަށް ވެގެންދާނީ ޓެކްސީ ސާވިސްގެ ތެރެއަށް މީޓާޑް ޓެކްސީ ގެނައުން،" މިނިސްޓަރު ވިދާޅުވި އެވެ.

ޓްރާންސްޕޯޓް މިނިސްޓްރީން ވަނީ މެއި 15، ގައި ހަ ފަސިންޖަރުންނަށް ވުރެ ގިނަ ފަސިންޖަރުން އެއް ފަހަރާ އުފުލޭ ވަރުގެ ބޮޑެތި އުޅަނދުތަކުގައި ކުރާ ދަތުރުތަކުގެ އަގުތަކަށް ބަދަލު ގެނެސްފަ އެވެ.