ރިޔާދު (މެއި 28) - އަލް އިއްތިހާދު އަތުން 4-2 އިން އަލް ނަސްރު މޮޅުވި މެޗުގައި ޖެހި ދެ ގޯލާ އެކު، އެ ޓީމުގެ ކެޕްޓަން، ކްރިސްޓިއާނޯ ރޮނާލްޑޯ، ސައުދީ ޕްރޯ ލީގުގެ އެއް ސީޒަނެއްގައި އެންމެ ގިނަ ލަނޑު ޖެހުމުގެ ރެކޯޑް ހަދައިފި އެވެ.

ރޭގެ މެޗުގައި ޖެހި ދެ ގޯލާ އެކު، ރޮނާލްޑޯ ވަނީ މި ފަހަރު ސައުދީ ލީގުގައި 35 ލަނޑު ޖަހައިފަ އެވެ.

މީގެ ކުރިން އެ ރެކޯޑް އޮތީ، 2018-2019 ސީޒަނުގައި 34 ގޯލު ޖެހި މޮރޮކޯގެ ފޯވާޑް، އަބްދުއްރައްޒާގު ހަމްުދުﷲ އަތުގަ އެވެ. ރޮނާލްޑޯ، އޭނާގެ ރެކޯޑް މުގުރާލީ ހަތަރު މެޗު މަދުން ކުޅެގެންނެވެ.

އަލް ނަސްރުން މި ސީޒަން ވެސް ނިންމާލަން ޖެހުނީ، ދެ ވަނައިގަ އެވެ. އެއީ ޗެމްޕިއަންކަން ހޯދި އަލް ހިލާލް އަށް ވުރެ 14 ޕޮއިންޓް ފަހަތުގަ އެވެ. އެކަމަކު، އަލް ނަސްރު، ދެ ވަނައިގައި ނިންމާލީ 17 ޕޮއިންޓުގެ ލީޑަކާ އެކު އެވެ.

މިދިޔަ އަހަރުގެ ޖެނުއަރީ މަހު، ހިލޭ ޓްރާންސްފާއެއްގައި މެންޗެސްޓާ ޔުނައިޓެޑް ދޫކޮށް އަލް ނަސްރަށް ބަދަލުވި ރޮނާލްޑޯ ވަނީ އެ ޓީމަށް ކުޅެދިން 69 މެޗުން 64 ލަނޑު ޖަހައިފަ އެވެ. ބާވީސް އަހަރުވީ ރޮނާލްޑޯގެ ޕްރޮފެޝަނަލް ކެރިއަރުގައި އޭނާ ވަނީ، ކްލަބްތަކަށް ކުޅުނު މެޗުތަކުގައި، 765 ގޯލު ޖަަހައިފަ އެވެ. އަދި ޕޯޗުގަލް ގައުމީ ޓީމަށް 128 ލަނޑު ޖެހި އެވެ.