ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ އަމިއްލަ ބިމެއްގައި ހުރި އުޅަނދުތަކާއި އެހެނިހެން ތަކެތި ނެގުމަށް އެ ކުންފުން އަންގައިފި އެވެ.

އެ ކޯޕަރޭޝަނުން އިއްޔެ ކުރި އިއުލާނެއްގައި ބުނެފައިވަނީ ތިލަފުށީ ސްލޮޓް އެފް16އަކީ އެ ކުންފުނިން ބަޔަކަށް ކުއްޔަށްދީފައިވާ ބިމެއް ކަމަށާއި، އެ ބިން އެ ފަރާތާއި ހަވާލުކުރުމުގެ މަސައްކަތް އެ ކޯޕަރޭޝަނުން ފަށާފައިވާ ކަމަށެވެ.

އެގޮތުން, ފާހަގަކޮށްފައިވާ ބިމުގައި ގަވާއިދާ ހިލާފަށް ބަހައްޓާފައިވާ އުޅަނދުތަކާއި އެހެނިހެން ތަކެތީގެ ވެރިފަރާތެއްވާނަމަ، އެޗްޑީސީގެ ކޯލްސެންޓަރު 1516 އަށް ގުޅައި މައުލޫމާތު ސާފުކުރުމަށްފަހު، 15 ދުވަހުގެ ތެރޭގައި އެ ތަކެތި ނެގުމަށް އެ ކޯޕަރޭޝަނުން ވަނީ އަންގާފަ އެވެ.

އޭގެ އިތުރުން 15 ދުވަހުގެ ތެރޭގައި އެ ބިމުގައި ހުރި ތަކެތި ނަގާފައިނުވާނަމަ، އެ އުޅަނދުތަކާއި ތަކެއްޗާއި މެދު އެ ކޯޕަރޭޝަނަށް ފެންނަ ގޮތަކަށް އަމަލުކުރެވޭނެކަމަށް އެޗްޑީސީން ބުނެ އެވެ.

ތިލަފުއްޓަކީ މާލެ ސަރަހައްދުގެ ވިޔަފާރި އާއި އިންޑަސްޓްރިއަލް ހަބްގެ ގޮތުތައި ތަރައްގީކުރާ މައި މަރުކަޒެވެ.

ސިނާއީ އެތައް މަސައްކަތެއް ކުރަމުންދާ އެރަށުގައި ސިމެންތި ބަންދުކުރުމާއި، ގޭސް ފުޅިތަކަށް އެޅުމާއި، އޮޑިދޯނިފަހަރު ބަނުން ފަދަ ތަފާތު އިންޑަސްޓްރިއަލް މަސައްކަތް ކުރެ އެވެ.