ޓިއުރިން، އިޓަލީ (މެއި 25) - އިޓާލިއަން ލީގުގެ ކްލަބް، ބޮލޯނިއާގައި ކާމިޔާބު ސީޒަނެއް ހޭދަކުރި ކޯޗު، ތިއާގޯ މޮޓާ، އިޓަލީގެ ގަދަބާރު ޔުވެންޓަސްގެ ކޯޗުކަމާ ހަވާލުވާން އެއްބަސްވެފައިވާ ކަމަށް މީޑިއާ ރިޕޯޓްތައް ބުނެފި އެވެ.

އިޓާލިއަން ލީގުގެ ފަހު މެޗުން، ބޮލޯނިއާ ރޭ ވަނީ ޖެނޯއާ އަތުން 2-0 އިން ބަލިވެފަ އެެވެ. އެހެންވެ، ބޮލޯނިއާ ވަނީ ލީގުގެ ހަތަރު ވަނަ އަށް ވެއްޓިފަ އެވެ. އެއީ، 38 މެޗުން 68 ޕޮއިންޓް ހޯދައިގެންނެވެ. މިއީ، މޮޓާ، ބޮލޯނިއާ ބެންޗުން ފެންނާނެ ފަހު މެޗު ކަމަށް ރިޕޯޓްތައް ބުނެ އެވެ.

ޔުވެންޓަސް، ލީގުގެ ފަހު މެޗުން ބަލިވެއްޖެނަމަ، ބޮލޯނިއާ އަށް ލަނޑުގެ ތަފާތުން ކުރިއަށް ޖެހިލުމުގެ ފުރުސަތު އެބައޮތެވެ. ތިރީސް ހަތް މެޗުން 68 ޕޮއިންޓް ހޯދާފައިވާ، ޔުވެންޓަސް ފަހު މެޗުގައި، މިރޭ މޮންޒާއާ ކުޅޭނެ އެވެ.

ބޮލޯނިއާގެ ކޯޗަކަށް ހުރި މޮޓާ ވަނީ އެ ކްލަބް ތާރީހުގައި ފުރަތަމަ ފަހަރަށް އެ ޓީމު ޗެމްޕިއަންސް ލީގަށް ކޮލިފައިކޮށްދީފަ އެެވެ. މޮޓާ އަށް ޔުވެންޓަސްގެ ހުށަހެޅުން ލިބުނީ، އެ ޓީމުގެ ކޯޗަކަށް ހުރި، މަސިމޯ އަލެގްރީ، ވަކިކުރުމުންނެވެ.

މޮޓާ އަށް ޔުވެންޓަސް އިން ހުށަހެޅީ ތިން އަހަރުގެ ކޮންޓްރެކްޓެކެވެ. އެއީ ސީޒަނަކު މުސާރައިގެ ގޮތުގައި، ހަ މިލިއަން ޑޮލަރު ލިބޭ ގޮތަށެވެ. ރިޕޯޓްތައް ބުނާގޮތުން، މޮޓާ ވަނީ މި ޑީލަށް އެއްބަސްވެފަ އެވެ. އަދި ވަރަށް އަވަހަށް އެ ނިންމުން، ބޮލޯނިއާގެ ވެރިންނަށް ހިއްސާކޮށް، ޔުވެންޓަސްގެ ކޮންޓްރެކްޓްގައި ސޮއިކުރުމުގެ ކަންކަން ނިންމާނެ ކަމަށް ރިޕޯޓްތައް ބުނެ އެވެ.

ބްރެޒިލަށް އުފަން ނަމަވެސް، މޮޓާ ކުޅެފައިވަނީ އިޓަލީ ގައުމީ ޓީމަށެވެ. ކްލަބް ކެރިއަރުގައި ބާސެލޯނާ އާއި އިންޓަ މިލާން އަދި ޕީއެސްޖީ އަށް ކުޅުނެވެ.