އަހުމަދުއާބާދު، އިންޑިއާ (މެއި 22) - އިންޑިއަން ޕްރިމިއާ ލީގު (އައިޕީއެލް)ގެ ފައިނަލުގެ ފުރަތަމަ ޖާގަ ކަލްކަތާ ނައިޓް ރައިޑާސް އިން ވަނީ ހޯދައިފި އެވެ.

މިއީ، ކަލްކަތާ އިން މުބާރާތުގެ ފައިނަލަށް ދަތުރުކުރި ހަތަރު ވަނަ ފަހަރެވެ. އައިޕީއެލްގެ ޗެމްޕިއަންކަން، 2012 އާއި 2014 ވަނަ އަހަރު ހޯދި ކަލްކަތާ އިން އެންމެ ފަހުން ފައިނަލުގައި ކުޅެފައިވަނީ، 2021 ވަނަ އަހަރު ދުބާއީގައި މުބާރާތް ކުޅުނުއިރު އެވެ. އެ ފަހަރު، ޗެންނާއި ސުޕަ ކިންގްސް އަތުން ވަނީ ބަލިވެފަ އެވެ.

ކަލަކްތާ އިން ވަނީ ފުރަތަމަ ކޮލިފަޔާ މެޗުން، ސަންރައިޒާސް ހައިދަރުއާބާދުގެ މައްޗަށް އަށް ވިކެޓުން ކުރިހޯދައިފަ އެވެ.

ނަރެންދުރަ މޯދީ ސްޓޭޑިއަމްގައި ރޭ ކުޅުނު މެޗުގައި، ޓޮސް ދިމާވުމުން ހައިދަރުއާބާދުން ނިންމީ ކުޅެން އަރާށެެވެ. އެކަމަކު، އެ ނިންމުމާ އެއްވަރުގެ ކުޅުމެއް އެ ޓީމަށް ނުދެއްކުނެވެ. ފުރަތަމަ އޯވަރުގެ ތެރޭގައި، ހައިދަރުއާބާދުގެ ޓްރަވިސް ހެޑް އާއި އަބިޝޭކް ޝަރްމާ ވަނީ ނުބައިވެފަ އެވެ. ހެޑް ނުބައިވީ ފުރަތަމަ ބޯޅައިންނެވެ. އަބިޝޭކް ނުބައިވީ، ހަތަރު ބޯޅައިން ތިން ލަނޑު ހަދާފައި އޮއްވަ އެވެ.

ހައިދަރުއާބާދުގެ ހުރިހާ ކުޅުންތެރިން، 19.3 އޯވަރުގެ ތެރޭގައި ނުބައިވިއިރު، އެ ޓީމަށް ހެދުނީ، 159 ލަނޑެވެ. އެ ޓީމަށް އެންމެ ރަނގަޅު ކުޅުމެއް ދައްކައިދިނީ، 55 ލަނޑު ހެދި ރާހުލް ތުރިޕަތީ އާއި 32 ލަނޑު ހެދި ހެއިންރިޗް ކްލާސެން އެވެ.

މި އިނިންގްސްގައި ކަލްކަތާގެ މިޗެލް ސްޓާކް ވަނީ ތިން ވިކެޓް ނަގައިފަ އެވެ. އަދި ވަރުން ޗަކުރަވަތީ ވެސް ދެ ވިކެޓް ނެގި އެވެ.

ޖަވާބުގައި ކުޅެން އަރައި، ކަލްކަތާ އިން ވަނީ، 13.4 އޯވަރުގެ ތެރޭގައި، ދެ ކުޅުންތެރިން ނުބައިވެގެން، 164 ލަނޑު ހަދައި މެޗުން މޮޅުވެފަ އެވެ. ކަލްކަތާ އިން ފުރަތަމަ ކުޅެން އެރި، ރަހުމާނުﷲ ގުރްބާޒް އާއި ސުނިލް ނާރައިން އަށް މާ ރަނގަޅު ޕާޓްނާޝިޕެއް ނުހެދި ނުބައިވި އެވެ. އެ ގޮތުން، ރަހުމާނުﷲ ނުބައިވީ، 23 ލަނޑު ހަދާފައި ވަނިކޮށެވެ. ނާރައިން ނުބައިވިއިރު، ހެދުނީ 21 ލަނޑެވެ.

އޭގެ ފަހުން ކުޅެން އެރި، ވެންކަޓޭޝް އައްޔަރު (ވެންކީ) އާއި ޝްރޭޔަސް އައްޔަރުގެ ޕާޓްނަޝިޕުން ވަނީ މެޗުން މޮޅުވާ ސްކޯ ނެރެފަ އެވެ. ވެންކީ، 51 ލަނޑު ހެދިއިރު، ޝްރޭޔަސް ވަނީ 58 ލަނޑު ހަދައިފަ އެވެ.

މި މެޗުން ބަލިވިޔަސް، ހައިދަރުއާބާދަށް އަދި ފުރުސަތު އެބައޮތެވެ. އެ ޓީމުން، ކޮލިފަޔާ ދޭއްގައި ކުޅޭނީ، މިރޭ ކުޅޭ އެލިމިނޭޓާ މެޗުން މޮޅުވާ ޓީމަކާ އެވެ. އެލިމިނޭޓާ މެޗުގައި ކުޅެނީ، ރޯޔަލް ޗެލެންޖާސް ބެންގަލޫރު އާއި ރާޖަސްތާން ރޯޔަލްސް އެވެ.