ޓިއުރިން (މެއި 21) - އިޓާލިއަން ލީގުގައި ރޭ ޔުވެންޓަސް އިން ފަހަތުން އަރައި ތިން ގޯލު ޖަހައި، 3-3 އިން ބޮލޯނިއާއާ އެއްވަރުކޮށްފި އެެވެ.

މިއީ ޔުވެންޓަސް އިން އެ ޓީމުގެ ކޯޗު، މަސިމޯ އަލެގްރީ ވަކިކުރި ފަހުން ކުޅުނު ފުރަތަމަ މެޗެވެ. އަނެއްކޮޅުން ބޮލޯނިއާގައި ހުރީ ޔުވެންޓަސް އިން ގެންނަން ބޭނުންވާ ކޯޗު ތިއާގޯ މޮޓާ އެވެ. ޔުވެންޓަސް އިން ވަނީ މޮޓާ އަށް ތިން އަހަރުގެ ކޮންޓްރެކްޓެއް ހުށަހަޅައިފަ އެވެ. އެ އަށް ގޮތެއް ނިންމަނީ ސީޒަން ނިމުމުން ކަމަށް މޮޓާ ވަނީ ހާމަކޮށްފަ އެވެ.

ބޮލޯނިއާ ދަނޑުގައި ކުޅުނު މެޗުގައި ރޭ އެ ޓީމުން، 53 މިނިޓް ތެރޭ ތިން ގޯލުގެ ލީޑެއް ނެގި އެވެ. ފުރަތަމަ ހާފު ދެ ގޯލު ކުރީގައި އޮވެގެން ނިންމާލިއިރު، ބޮލޯނިއާގެ ލަނޑުތައް ޖެހީ، ރިކާޑޯ ކަލަފިއޯރީ އާއި ސަންޓިއާގޯ ކަސްޓްރޯ އެވެ.

ދެ ވަނަ ހާފް ފެށިގެން އަށް ވަނަ މިނިޓްގައި، ކަލަފިއޯރީ ވަނީ ބޮލޯނިއާގެ ތިން ވަނަ ލަނޑު ޖަހައިފަ އެވެ.

ޔުވެންޓަސް އިން ފުރަތަމަ ލަނޑު ޖެހީ، 76 ވަނަ މިނިޓްގަ އެވެ. މި ލަނޑު ކާމިޔާބުކުރީ، ފެޑެރީކޯ ކިއޭސާ އެވެ. އެ ހިތްވަރުގައި ކުޅެމުން، 83 ވަަނަ މިނިޓްގައި އާކަންޑިއުޒް މިލިޗް ވަނީ ޔުވެންޓަސްގެ ދެ ވަނަ ލަނޑު ޖަހައިފަ އެވެ. ތިން ވަނަ ލަނޑު ޖަހައި، އެއްވަރުކުރީ، އޭގެ މިނިޓެއް ފަހުންނެވެ. މި ލަނޑު ޖެހީ، ކެނާން ޔިލްޑިޒް އެވެ.

މި ނަތީޖާއާ އެކު، އިޓާލިއަން ލީގުގެ ފަހު މެޗުތަކަށް ނުކުންނައިރު، ތިން ވަނައިގައި އޮތް ބޮލޯނިއާ އާއި ހަތަރެއްގައި އޮތް ޔުވެންޓަސް ވަނީ ޕޮއިންޓް އެއްވަރުވެފަ އެވެ. އެއީ، 37 މެޗުން 68 ޕޮއިންޓާ އެކު އެވެ.