ލަންޑަން (މެއި 15) - އިނގިރޭސި ޕްރިމިއާ ލީގުގެ ހަތަރު ވަނަ ކަށަވަރުކޮށް، އެސްޓަން ވިލާ ފުރަތަމަ ފަހަރަށް ޗެމްޕިއަންސް ލީގަށް ކޮލިފައިވެއްޖެ އެވެ.

ވިލާ އަށް ލީގުގެ ހަތަރު ވަނަ ކަށަވަރުވެ، ޗެމްޕިއަންސް ލީގަށް ކޮލިފައިވީ ލީގުގައި ރޭ މެންޗެސްޓާ ސިޓީ އަތުން ފަސް ވަނައiގައި އޮޓް ޓޮޓެންހަމް ހޮޓްސްޕާސް 2-0 އިން ބަލިވުމުންނެވެ.

ލީގުގައި ބާކީ ކޮންމެ ޓީމަކަށްވެސް އެއް މެޗު އޮތްއިރު، ވިލާ ހަތަރު ވަނަ ކަށަވަރުކުރީ 68 ޕޮއިންޓާއެކުއެވެ. ފަސް ވަނައިގައި އޮތީ ޓޮޓެންހަމް އޮތީ 63 ޕޮއިންޓާއެކުއެވެ.

ކުރިން އޮތް ޔޫރަޕިއަން ކަޕް ރީބްރޭންޑްކޮށް، ޗެމްޕިއަންސް ލީގު 1991/1992 ވަނަ އަހަރު ސީޒަންގައި ތައާރަފްކުރި ފަހުން ވިލާ އެ މުބާރާތަށް ކޮލިފައިނުވެ އެވެ.

ޔޫރަޕިއަން ކަޕްގައި އެންމެ ފަހުން ވިލާ ކުޅުނީ މީގެ 41 އަހަރު ކުރިންނެވެ. އެއީ، 1982/1983 ވަނަ އަހަރުގެ ސީޒަންގައެވެ. އޭގެ ކުރީ ސީޒަންގައި ވިލާ އިން ޔޫރަޕިއަން ކަޕް ކާމިޔާބުކުރިއެވެ.

ވިލާ ވަނީ މީގެ ކުރިން 1992/1993 ވަނަ އަހަރު ލީގުގެ ދެ ވަނަ އަދި 1995/1996 ވަނަ އަހަރުގެ ސީޒަންގެ ހަތަރު ވަނަ ހޯދައިފަ އެވެ. އެހެން ނަމަވެސް، އޭރު ޗެމްޕިއަންސް ލީގަށް ކޮލިފައިވަނީ ލީގުގެ ޗެމްޕިއަން ޓީމު އެކަންޏެވެ.

ޓޮޓެންހަމް އާއި ސިޓީގެ މެޗު ނިމުނުއިރު، ވިލާގެ ޓީމު ތިބީ އެ ޓީމުގެ އަހަރީ އެވޯޑް ނައިޓްގަ އެވެ. އެ މެޗު ނިމުމާއެކު، ވިލާގެ ކުޅުންތެރިންނާއި އޮފިޝަލުން ވަނީ އެވޯޑް ނައިޓްގެ ތެރެއިން އުފާފާޅުކުރަން ފަށައިފައެވެ.

"މިއީ ވަރަށް ހާއްސަ ދުވަހެއް،" ވިލާގެ ކޯޗު އުނާއީ އެމެރީ ބުންޏެވެ. "އަހަރަމެން ސީޒަން ފެށީ މި އަމާޒު ހާސިލްކުރަން. އެއީ އަހަރެމެން ދެކެމުންއައި ހުވަފެނަކީ. ޗެމްޕިއަންސް ލީގުގައި ކުޅުމަކީ ވަރަށް ބޮޑު އުފަލެއް،"

އެމެރީ ވިލާގެ ކޯޗުކަމާ ހަވާލުވީ 2022 ވަނަ އަހަރުގެ އޮކްޓޫބަރު މަހެވެ. އެމެރީގެ އިރުޝާދުގެ ދަށުން ސިޓީ ވަނީ ބޮޑެތި ކުރިއެރުންތަކެއް ހޯދައިފަ އެވެ. ވިލާގެ ކޯޗުކަމާ އެމެރީ ހަވާލުވި ފަހުން، އެ ޓީމަށް ވުރެ ގިނައިން ޕްރިމިއާ ލީގުގައި ޕޮއިންޓް ހޯދާފައިވަނީ މެންޗެސްޓާ ސިޓީ އާއި ލިވަޕޫލް އަދި އާސެނަލް އެވެ.