ލަންޑަން (14 މެއި) - މެޗުގެ ފަހުކޮޅު އެސްޓަން ވިލާ އިން ޖެހި ލަނޑާއެކު ވިލާ އާއި ލިވަޕޫލް އިނގިރޭސި ޕްރިމިއާ ލީގުގައި ރޭ ކުޅުނު މެޗު 3-3 އިން އެއްވަރުވެ، ވިލާ އަށް މުހިންމު ޕޮއިންޓެއް ލިބިއްޖެ އެވެ.

އަމިއްލަ ދަނޑުގައި ރޭ ކުޅުނު މެޗުން މޮޅުވެގެން، ވިލާ އަށް ގަދަ ހަތަރެއްގެ ޖާގައެއް ކަށަވަރުކޮށް، ކްލަބުގެ ތާރީހުގައި ފުރަތަމަ ފަހަރަށް ޗެމްޕިއަންސް ލީގަށް ކޮލިފައިވުމުގެ ފުރުސަތު އޮތެވެ. އެކަމަކު މި މެޗުން ބަލިވިނަަމަ، ފަސް ވަނައިގައި އޮތް ޓޮޓެންހަމަށް ގަދަ ހަތަރަކަށް އެރުމަށް އިތުރު އުންމީދެއް ލިބޭނެ އެވެ.

އެކަމަކު ވިލާ އިން މެޗު ފެށީ ވަރަށް ގޯސްކޮށެވެ. މެޗުގެ ދެވަނަ މިނިޓުގައި ލިވަޕޫލް ލީޑު ނެގީ، ވިލާގެ ގޯލްކީޕަރު އެމީލިއާނޯ މާޓިނޭޒްގެ އަތުން ބައިކޮޅަށް ވަތް ލަނޑަކުންނެވެ. ލިވަޕޫލްގެ ހާވީ އެލިއަޓް ހުރަސްކޮށްލި ބޯޅައެއް ކުޅުންތެރިއެއްގެ ގައިގައި ޖެހިފައި ވިލާގެ ގޯލާ ދިމާލަށް ދިޔަ ވަގުތު، މާޓިނޭޒް އެ ބޯޅަ ހިފަން މަސައްކަތްކުރި އެވެ. އެކަމަކު މާޓިނޭޒްގެ އަތުން ބޯޅަ ދޫވެ، ގޯލުގެ ތެރެއަށް ބޯޅާ ވަނީ އެވެ.

މެޗުގެ 12 ވަނަ މިނިޓުގައި ޔޫރީ ޓިއެލްމަންސް ޖެހި ލަނޑައެކު ވިލާ އިން މެޗުގެ ނަތީޖާ އެއްވަރުކުރި އެވެ. އެހެން ނަމަވެސް، މެޗުގެ 23 ވަނަ މިނިޓުގައި ލިވަޕޫލް ކޯޑީ ގަކްޕޯ ވަނީ ލަނޑެއް ޖަހައި، ލިވަޕޫލަށް އަލުން ލީޑު ހޯދައިދީފަ އެވެ. އަދި ދެވަނަ ހާފުގައި ކުރީކޮޅު ލިވަޕޫލްގެ ޒުވާން ޑިފެންޑަރު ޖަރެލް ކުއަނާޝް ވަނީ ލަނޑެއް ޖަހައި ލިވަޕޫލްގެ ލީޑު ފުޅާކޮށްފަ އެވެ.

ވިލާ އިން މެޗުގެ ނަތީޖާ އެއްވަރުކުރީ މެޗުގެ ފަހު 10 މިނިޓުގެ ތެރޭގަ އެވެ. އެ ޓީމުގެ ދެ ލަނޑު ވެސް ޖެހީ ބަދަލު ކުޅުންތެރިއްގެ ގޮތުގައި ކުޅެންއެރި ޖޯން ޑުރާން އެވެ.

މި މެޗުން ލިބުނު ޕޮއިންޓާއެކު، ވިލާ ވަނީ ފަސް ވަނައިގައި އޮތް ޓޮޓެންހަމްގެ މައްޗަށް ފަސް ޕޮއިންޓްގެ ލީޑެއް ހޯދައިފައެވެ. އެކަމަކު ޓޮޓެންހަމް އަށް ދެ މެޗު އެބައޮތެވެ. ވިލާ އަށް ލީގުގައި ބާކީ އޮތީ އެންމެ މެޗެކެވެ.

މެޗަށް ފަހު އެސްޓަން ވިލާގެ ކޯޗު އުނާއީ އެމެރީ ބުނީ ވިލާ އިން އިތުރު ޓީމަކާ މެދު ނުވިސްނާނެ ކަމަށެވެ.

"ލީގުގެ ފަހު މެޗަށް އަހަރަމެން ނުކުންނާނީ އަމިއްލަ ބާރާއެކު. އަހަރަމެން ވަރަށް ރަނގަޅަށް އެ މެޗަށް ތައްޔާރުވާނަން،" އެމެރީ ބުންޏެވެ. "މި ސީޒަންގައި ޓީމުން ނެރިފައިވާ ނަތީޖާތަކާމެދު އަހަރަމެން ފަހުރުވެރިވޭ."

އިނގިރޭސި ޕްރިމިއާ ލީގުގައި މިރޭ މެންޗެސްޓާ ސިޓީއާ ދެކޮޅަށް ޓޮޓެންހަމް ނުކުންނާނެ އެވެ.