ހިމާޗަލް ޕްރަދޭޝް، އިންޑިއާ (މެއި 10) - ޕަންޖާބް ކިންގްސް ކަޓުވާލުމަށް ފަހު، ރޯޔަލް ޗެލެންޖާސް ބެންގަލޫރު، އިންޑިއަން ޕްރިމިއާ ލީގު (އައިޕީއެލް) ކްރިކެޓް މުބާޜާތުގެ ޕްލޭއޮފްގެ ޖާގައެއް ހޯދުމުގެ އުންމީދު ދަމަހައްޓައިފި އެވެ.

ޕަންޖާބް އަތުން ރޭ ބެންގަލޫރު މޮޅުވީ، 60 ލަނޑުންނެވެ. މި މޮޅާ އެކު ބެންގަލޫރުން 12 މެޗުން 10 ޕޮއިންޓް ހަަމަކޮށް ހަތް ވަނަ އަށް ޖެހިލިއިރު، އެ ޓީމުން ގަދަ ހަތަރަަކަށް ވަދެ، ޕްލޭއޮފަށް ދިއުމަށް ދެން އޮތް ދެ މެޗުން ވެސް މޮޅުވުން މަޖުބޫރެވެ. އެކަމަކު، އެ ވަރުން ވެސް އެ ޓީމަށް އޮތީ ހަނި ފުރުސަތެކެވެ. އެއީ، އެހެން ޓީމުތަކުން ނެރޭ ނަތީޖާތަކަށް ވެސް ބަލަން ޖެހޭނެ އެވެ.

ރޭގެ ނަތީޖާއާ އެކު، ޕަންޖާބަކީ މި ފަހަރުގެ މުބާރާތުން ކެޓި ދެ ވަނަ ޓީމެވެ. ފުރަތަމަ ޓީމަކީ، ފަސް ފަހަރު ތަށި ހޯދާފައިވާ މުމްބައި އިންޑިއަންސް އެވެ.

ހިމާޗަލް ޕްރަދޭޝް ކްރިކެޓް އެސޯސިއޭޝަން (އެޗްޕީސީއޭ) ސްޓޭޑިއަމްގައި ކުޅުނު މެޗުގައި ޓޮސް ދިމާވުމުން، ޕަންޖާބް ކިންގްސް އިން ނިންމީ ހޮވާށެވެ.

ބެންގަލޫރުން ކުޅެން އަރައި، 20 އޯވަރު ތެރޭ ހަތް ކުޅުންތެރިން ނުބައިވެގެން 241 ލަނޑު ހެދި އެވެ. ވިއްސާރައިގެ ސަބަބުން ވަގުތު ކޮޅަކަށް މި އިނިންސްގެ ކުޅުން މަޑުޖައްސާލަން ޖެހުނުއިރު، އެންމެ ތަފާތު ފޯމެއްގައި ކުޅެލީ ބެންގަލޫރުގެ ތަރި ވިރާތު ކޯލީ އެވެ. ވިރާތު ވަނީ، 47 ބޯޅައިން 92 ލަނޑު ހަދައިފަ އެވެ. ދެން، އެ ޓީމުން އެންމެ ރަނގަޅު ކުޅުމެއް ދެއްކި ރަަޖަތު ޕަތީދާރު ވަނީ 23 ބޯޅައިން 55 ލަނޑު ހަދައިފަ އެވެ. އަދި ކެމަރަން ގްރީން ވަނީ 27 ބޯޅައިން 46 ލަނޑު ހަދައިފަ އެވެ.

މި އިނިންްގްސްގައި ޕަންޖާބުގެ ހަރްޝަލް ޕަޓޭލް ތިން ވިކެޓް ނެގި އެވެ.

ޖަވާބުގައި ކުޅެން އަރައި، ޕަންޖާބަށް 17 އޯވަރު ތެރޭގައި ހުރިހާ ކުޅުންތެރިން ނުބައިވެގެން ހެދުނީ، 181 ލަނޑެވެ. އެ ޓީމުން އެންމެ ރަނގަޅަށް ކުޅުނީ، 27 ބޯޅައިން 61 ލަނޑު ހެދި، ރައިލީ ރޯސޫ އެވެ.

މި އިނިންގްސްގައި، ބެންގަލޫރުގެ މުހައްމަދު ސިރާޖު ތިން ވިކެޓް ނެގިއިރު، ސްވަޕްނިލް ސިންގް، ލޯކީ ފާގަސަން އަދި ކާން ޝަރްމާ ވަނީ ދެ ވިކެޓް ނަގައިފަ އެވެ.

ބެންގަލޫރަށް ދެން ބާކީ އޮތީ، ދިއްލީ ކެޕިޓަލްސް އާއި ޗެންނާއި ސުޕަ ކިންގްސްއާ ކުޅޭ ދެ މެޗެވެ.

މުބާރާތުގައި މިރޭ ކުޅޭ މެޗުގައި، ގުޖުރާތު ކުޅޭނީ ޗެންނާއިއާ އެވެ.