ޕެރިސް (މެއި 9) - ޕީއެސްޖީ 2011 ވަނަ އަހަރު ގަތުމަށް ފަހު، ގަތަރުގެ މަހުޖަނު، ނާސިރު އަލް ހަލީފާ، އެ ކްލަބަށް ޗެމްޕިއަންސް ލީގު ހޯދައިދޭން ބޮޑު ޓާގެޓެއް ކަނޑައެޅި އެވެ. އެކަމަށްޓަކައި، އެންމެ ބޮޑު އިންވެސްޓަކަށް ކުރީ ލިއޮނަލް މެސީ، ނޭމާ އަދި ކީލިއަން އެމްބާޕޭ ގަތުމެވެ. އެ ތިން ކުޅުންތެރިންނަށް 1.2 ބިލިއަން ޑޮލަރު ޕީއެސްޖީން ހަރަދުކޮށްގެން ވެސް ޗެމްޕިއަންސް ލީގުގެ ތަށި ނުލިބުނެވެ.

ގަތަރުގެ މަހުޖަނުން ޕީއެސްޖީ އަށް އައި ފަހުން އެ ކްލަބުން ކުޅެފައިވަނީ ޗެމްޕިއަންސް ލީގުގެ ފައިނަލުގައި އެއް ފަހަރު އެވެ. މި ފަހަރު ވެސް ސެމީން ވަނީ ކަޓައިފަ އެވެ.

ޗެމްޕިއަންސް ލީގުގެ ޓާގެޓަށް ވާސިލްވާން، ޕީއެސްޖީން އެންމެ ބޮޑު އިންވެސްޓެއް ކުރި ކުޅުންތެރިއަކީ ނޭމާ އެވެ. އެ ގޮތުން، 2017 ވަނަ އަހަރު، ބާސެލޯނާ އިން ޕީއެސްޖީ އަށް ނޭމާ ގެންނަން ޓްރާންސްފާ ފީގެ ގޮތުގައި، 239 މިލިއަން ޑޮލަރު ދެއްކި އެވެ. މިއީ މިހާތަނަށް ކްލަބަކުން ކުޅުންތެރިއަކު ގެންނަން ދެއްކި އެންމެ ބޮޑު ޓްރާންސްފާ ފީ އެވެ.

ނޭމާ، ޕީއެސްޖީއާ އެކު ސޮއިކުރި ފުރަތަމަ ކޮންޓްރެކްޓުން ޖުމްލަ އެކު އޭނާ އަށް 217 މިލިއަން ޑޮލަރު ލިބުނެވެ. އެ ކޮންޓްރެކްޓް އާ ކުރުމުން، މިދިޔަ ސީޒަނުގައި އެ ކްލަބް ދޫކޮށް، އަލް ހިލާލް އަށް ބަދަލުވުމާ ހަމައަށް ނޭމާ އަށް ވަނީ 122 މިލިއަން ޑޮލަރު ލިބިފަ އެވެ. އެހެންކަމުން، ޕީއެސްޖީން ނޭމާ އަށް ކުރި ޖުމްލަ ހަރަދަކީ 578 މިލިއަން ޑޮލަރު އެވެ.

ޕީއެސްޖީން 2017 ވަނަ އަހަރު މޮނާކޯ އިން އެމްބާޕޭ ގެނައީ، ލޯން ޑީލެއްގަ އެވެ. އެއް އަހަރު ފަހުން، އެމްބާޕޭގެ ކޮންޓްރެކްޓް ދާއިމީ ކުރަން ޕީއެސްޖީން ފީއެއްގެ ގޮތުގައި ދެއްކީ، 194 މިލިއަން ޑޮލަރު އެވެ. ޕީއެސްޖީގެ ފުރަތަމަ ކޮންޓްރެކްޓުން އެމްބާޕޭ އަށް 80 މިލިއަން ޑޮލަރު ލިބުނެވެ. ޕީއެސްޖީއާ އާއެކު އެމްބާޕޭ ސޮއިކުރި ދެ ވަނަ ކޮންޓްރެކްޓުން 235 މިލިއަން ޑޮލަރު ލިބުނުއިރު، އެ ކޮންޓްރެކްޓާ އެކު ބޯނަހުގެ ގޮތުގައި، 65 މިލިއަން ޑޮލަރު ދިނެވެ. މިއާ އެކު، މި ސީޒަނަށް ފަހު ޕިއެސްޖީ ދޫކޮށްލަން ނިންމާފައިވާ އެމްބާޕޭ އަށް އެ ކްލަބުން ކުރި ހަރަދުތަކުގެ ޖުމްލަ އުޅެނީ 574 މިލިއަން ޑޮލަރުގަ އެވެ.

ބާސެލޯނާ އިން ހިލޭ ޓްރާންސްފާއެއްގައި މެސީ، ޕީއެސްޖީ އަށް ބަދަލުވީ، 2021 ވަނަ އަހަރު އެވެ. ޕީއެސްޖީއާ އެކު ދެ އަހަރު މެސީ ވަނީ ކުޅެފަ އެވެ. ކޮންމެ ސީޒަނެއްގައި އޭނާ އަށް 36 މިލިއަން ޑޮލަރު ދީފައިވެ އެވެ. އެހެންވެ، ޕީއެސްޖީން މެސީ އަށް ކުރި އިންވެސްޓް އުޅެނީ، 72 މިލިއަން ޑޮލަރުގަ އެވެ.

މަޝްހޫރު ތިން ކުޅުންތެރިންނާ އެކު ވެސް ޕީއެސްޖީ އަށް ޔޫރަޕްގެ އެންމެ ޝަރަފްވެރި މުބާރާތުގެ ތަށި ނުހޯދި މިޖެހުނީ ފަރުޖައްސާލާށެވެ.

މި ފަހަރުގެ ޗެމްޕިއަންްސް ލީގުން ޕީއެސްޖީ ކެޓުމުން ހަލީފާ ދިން އިންޓަވިއުއެއްގައި ވިދާޅުވީ، އެ ކްލަބްގައި މިހާރު އޮތް ޒުވާން ޓީމު ޑިވެލޮޕްކުރުމަށް ފަހު، ބޭނުންވާ ކަަންކަން ހާސިލްކުރެވޭނެ ކަަމަށެވެ. އަދި މިހާރު އޮތް ޓީމު ކުރިއަށް ގެންދާން ހުރި ކޯޗު، ލުއިސް އެންރީކޭއާ މެދު ފުރިހަަމަ އިތުބާރު އެބައޮތް ކަމަށް ވެސް ހަލީފާ ވިދާޅުވެފައިވެ އެވެ.