ލަންޑަން (އޭޕްރީލް 30) - ލެސްޓާ ސިޓީގެ ލެޖެންޑް ޖޭމީ ވާޑީ ޖެހި ދެ ގޯލުން ޕްރެސްޓަން ނޯތު އެންޑް ބަލިކޮށް، ޗެމްޕިއަންޝިޕްގެ (އިނގިރޭސި ދެ ވަނަ ޑިވިޝަނުގެ) ތަށި ލެސްޓާ އިން ޔަގީންކޮށްފި އެވެ.

މިދިޔަ ސީޒަންގައި ނެރުނު ދަށް ނަތީޖާތަކުގެ ސަބަބުން ލެސްޓާ އަށް މި ސީޒަނުގައި ޕްރިމިއާ ލީގުގެ ފުރުސަތު ގެއްލި ރެލިގޭޓްވީ އެވެ. އެކަމަކު، ޗެމްޕިއަންޝިޕްގެ ޗެމްޕިއަންކަން ހޯދާ ލެސްޓާ އިން ވަނީ އަލުން އަންނަ ސީޒަނުގެ ޕްރިމިއާ ލީގުން ޖާގަ ހޯދައިފަ އެވެ.

ޕްރެސްޓަންގެ މައްޗަށް ރޭ ރަށުން ބޭރުގައި ކުޅުނު މެޗު ލެސްޓާ އިން ކާމިޔާބުކުރީ 3-0 ގެ ނަތީޖާ އަކުންނެވެ.

މި މެޗުގައި ލެސްޓާ އިން ލީޑު ނެގީ މެޗުގެ 36 ވަނަ މިނެޓުގައި ފޯވާޑް ވާޑީ ޖަހާދިން ގޯލުންނެވެ. އަދި ލެސްޓާ އިން އެ ޓީމުގެ ލީޑު ފުޅާކުރީ މެޗުގެ 52 ވަނަ މިނެޓުގަ އެވެ. މި ގޯލު ވެސް އެ ޓީމަށް ޖަހާދިނީ ވާޑީ އެވެ. މިއީ ވާޑީ ލެސްޓާގައި ހޭދަކުރި 12 އަހަރުތެރޭ އެ ޓީމަށް ޖަހާދިން 190 ވަނަ ގޯލެވެ.

ލެސްޓާގެ ފަހު ގޯލު މެޗުގެ 67 ވަނަ މިނެޓުގައި ޖަހާދިނީ މެކް-އަޓީރް އެވެ.

ޗެމްޕިއަންޝިޕްގެ ފަހު މެޗުގައި ލެސްޓާ އިން އަންނަ ހޮނިހިރު ދުވަހު ނުކުންނާނީ ބްލެކްބާން ރޯވާސްއާ ދެކޮޅަށެވެ. އެ މެޗު ކާމިޔާބުކޮށް ލެސްޓާ އަށް ޗެމްޕިއަންޝިޕްގައި 100 ޕޮއިންޓް ހަމަކުރުމުގެ ފުރުސަތު އެބައޮތެވެ. އެ ޓީމަށް ވަނީ ކުޅުނު 45 މެޗުން 97 ޕޮއިންޓް ލިބިފަ އެވެ.