ދެކުނު ކޮރެއާގައި މިހާރު ކުރިއަށްދާ 14 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕުން ރާއްޖޭގެ އަޒްނީން ރަޝާދު ރަން މެޑަލް ހޯދައިފި އެވެ.

މިމަހުގެ 6-11 އަށް ދެކުނު ކޮރެއާގެ ވޮންޖޫ ސިޓީގައި ކުރިއަށްދިޔަ މުބާރާތުގައި ދުނިޔޭގެ 60 ގައުމަކުން 600 އަށްވުރެ ގިނަ އެތުލީޓުން ވާދަކުރި އެވެ. ރާއްޖެއިން މި މުބާރާތުގައި ވާދަކުރީ ހަތަރު އެތުލީޓުންނެވެ.

ބައިނަލްއަގްވާމީ މައިދާނުގައި މިދިޔަ ތިން އަހަރަށް ބަލާއިރު އެންމެ ބޮޑެތި ކާމިޔާބީތަކެއް ހޯދާފައިވާ ދިވެހި އެތުލީޓު އަޒްނީން ރަޝާދު ވަނީ މިދިޔަ އަހަރު ހޯދި ރަން މެޑަލް މިފަހަރު ދިފާއުކޮށްފަ އެވެ. އަޒްނީން ރަން މެޑަލް ހޯދީ ސްޕޯޓްސް ފީޒީކްގެ 170 ސެންޓްމީޓަރު ކެޓަގަރީ އިންނެވެ.

މިދިޔަ އަހަރު ރާއްޖޭގެ އެންމެ ކާމިޔާބު އެތުލީޓުގެ މަގާމު ހޯދި އަޒްނީން ވަނީ މި ކެޓަގަރީ އިން އޭޝިއަން ޗެމްޕިއަންޝިޕާއި، ސައުތު އޭޝިއަން ޗެމްޕިއަންޝިޕުގައިވެސް ވާދަކޮށް ރަން މެޑަލް ހޯދާފަ އެވެ.

އަޒްނީންގެ އިތުރުން ވޯލްޑް ޗެމްޕިއަންޝިޕްގައި ވާދަކުރި އެހެން އެތުލީޓުންގެ ތެރެއިން ރާއްޖޭގެ މިސްޓަ މޯލްޑިވްސް މުހައްމަދު ޔާމީން ބޮޑީބިލްޑިން ކެޓަގަރީގެ 85 ކިިލޯގެ ބައިން ބްރޮންޒް މެޑަލް ހޯދާފަ އެވެ.

އެތުލެޓިކް ފިޒީކް ކެޓަގަރީގެ 167 ސެންޓިމީޓަރުގެ ބައިން އަބްދުﷲ އަހުސަން ވަނީ ބްރޮންޒް މެޑަލް ހޯދާފަ އެވެ. އަހުސަން ވަނީ މިދިޔަ އަހަރުވެސް މި ބައިން ބްރޮންޒް މެޑަލް ހޯދާފަ އެވެ.

އެތުލެޓިކް ފިޒީކްގެ 160 ސެންޓިމީޓަރު ކެޓަގަރީގައި ވާދަކޮށް ފަތުހުﷲ މުހައްމަދު މިދިޔަ އަހަރު ހޯދި ބްރޯންޒް މެޑަލް މިއަހަރު ހޯދޭ ގޮތެއް ނުވި އެވެ. މިފަހަރު ފަތުހުﷲ ދިޔައީ ފަސް ވަނަ އަށެވެ.

ކޮންމެ ވޯލްޑް ޗެމްޕިއަންޝިޕެއްގައިވެސް ހޮވާ މިސްޓަ ޔުނިވާސްގެ މަގާމް މިފަހަރު ހޯދީ އިންޑިއާގެ ސަރްވަނަން މަނީ އެވެ. އޭނާ ވަނީ މިއަހަރުގެ ސެޕްޓެމްބަރު މަހު އޮތް އޭޝިއަން ޗެމްޕިއަންޝިޕުގައި ވާދަކޮށް މިސްޓަ އޭޝިއާގެ މަގާމްވެސް ހޯދާފަ އެވެ.

ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕު އަންނަ އަހަރު އޮންނާނީ ރާއްޖޭގަ އެވެ.