މެޑްރިޑް (3 ނޮވެމްބަރު) - ސްޕެއިންގެ ރެއާލް މެޑްރިޑަށް ކުޅެމުން އަންނަ ބްރެޒިލްގެ ފޯވަޑް ރޮޑްރީގޯ ގޮއެސް އެ ކްލަބާއެކު ހަދާފައިވާ ކޮންޓުރެކްޓް އާކޮށްފި އެވެ.

ރޮޑްރީގޯ ކޮންޓުރެކްޓް އާކުރިއިރު، އޭނައާއެކު ރެއާލަށް ކުޅެމުންދާ ބްރެޒިލްގެ ފޯވަޑް ވިނީޝިއަސް ޖޫނިއާ ވެސް ވަނީ މި ހަފުތާގައި ރެއާލްގެ ކޮންޓުރެކްޓް އާކޮށްފަ އެވެ. ވިނީޝިއަސް ރެއާލްގެ ކޮންޓުރެކްޓް އާކުރީ 2027 ވަނަ އަހަރާ ހަމައަށެވެ.

ރެއާލް އިން ބުނީ ރޮޑްރީގޯ ،22، އެ ކްލަބާއެކު ހަދާފައިވާ ކޮންޓުރެކްޓް 2028 ވަނަ އަހަރުގެ ޖޫން މަހުގެ ނިޔަލަށް އާކޮށްފައިވާ ކަމަށެވެ.

މި ސީޒަންގައި ރޮޑްރީގޯގެ އެންމެ ރަނގަޅު ފޯމު އަދި ނުފެނުނު ނަމަވެސް، އޭނާ އަކީ ރެއާލަށް މުހިންމު ކުޅުންތެރިއެކެވެ.

ބްރެޒިލްގެ ސަންތޯސް އިން 2018 ވަނަ އަހަރު ރޮޑްރީގޯ ރެއާލަށް ވިއްކާލަން އެއްބަސްވީ 48 މިލިއަން ޑޮލަރުގެ ޓްރާންސްފާ ފީއެއްގަ އެވެ. ރޮޑްރީގޯ ރެއާލާ ގުޅުނީ 2019 ވަނަ އަހަރެވެ.

ރޮޑްރީގޯ ވަނީ ރެއާލަށް މިހާތަނަށް ކުޅުނު 179 މެޗުގައި 39 ލަނޑު ޖަހައިފައެވެ. އެ ކްލަބާއެކު އޭނާ ވަނީ ސްޕެނިޝް ލީގާއި ޗެމްޕިއަންސް ލީގުގެ ތަށި އުފުލާލައިފައެވެ. -- އޭއެފްޕީ