ލައިޕްޒިގު، ޖަރުމަނު (ޖުލައި 1) - ޖަރުމަނުގެ އާރްބީ ލައިޕްޒިގަށް ކުޅެމުން އަންނަ ހަންގޭރީގެ ތަރި، ޑޮމިނިކް ސޮބޮސްލާއި، އިނގިރޭސި ޕްރިމިއާ ލީގުގެ ލިވަޕޫލަށް ބަދަލުވާން ނިންމައިފި އެވެ.

ހަންގޭރީ ގައުމީ ޓީމަށް ކުޅޭ 22 އަހަރުގެ ސޮބޮސްލާއި ގަންނަން ލިވަޕޫލުން ޖުމްލަ އެކު، 76 މިލިއަން ޑޮލަރު ލިވަޕޫލުން، ލައިޕްޒިގަށް ދައްކާނެ އެވެ. މިއީ، ސޮބޮސްލާއިގެ ކޮންޓްރެކްޓް އުވާލަން ދައްކަން ޖެހޭ ފީ އެވެ.

ރެޑްބުލް ސަލްޒްބާގް ދޫކޮށް، 2021 ވަނަ އަހަރުގެ ޖެނުއަރީ މަހު ލައިޕްޒިގަށް ސޮއިކުރި ސޮބޮސްލާއި ވަނީ ލައިޕްޒިގަށް ކުޅުނު 91 މެޗުން 20 ގޯލު ޖަހައި، 21 ގޯލު ޖަހަން ފުރުސަތު ހޯދައިދީފަ އެވެ. މިދިޔަ ސީޒަނުގައި ލައިޕްޒިގުން ޖަރުމަނު ކަޕް ޖެހިޖެހިގެން ދެ ފަހަރު ކާމިޔާބުކުރި ފައިނަލުގައި ސޮބޮސްލާއި ގޯލު ޖެހި އެވެ.

ސޮބޮސްލާއިގެ އަގުބޮޑުވުމުން ލިވަޕޫލުން އޭނާ ހޯދުމުގެ ރޭހުން ބޭރުވާނެ ކަމަށް ބެލެވިފައިވަނިކޮށް، އެ ޓީމުން މިހާރު މި ވަނީ އެ ޑީލް ނިންމަން އެއްބަސްވުމަކަށް އަތުވެފަ އެވެ. ސޮބޮސްލާއި ވެގެންދާނީ މި ފަހަރުގެ ޓްރާންސްފާގައި ލިވަޕޫލުން ސޮއިކުރާ ދެ ވަނަ ކުޅުންތެރިޔާ އަށެވެ. ލިވަޕޫލުން ވަނީ ބްރައިޓަން އަށް ކުޅޭ އާޖެންޓީނާގެ މިޑްފީލްޑަރު އަލެކްސިސް މެކް އަލިސްޓާގެ ސޮއިހޯދައިފަ އެވެ.

ލިވަޕޫލުން ވަނީ އެ ޓީމަށް ކުޅެމުން އައި ޕޯޗުގީސް ވިންގް، ފަބިއޯ ކަވާލިއޯ ލޯނަކަށް ލައިޕްޒިގަށް ދޫކޮށްލައިފަ އެވެ.