16 މޭ 2023 - 15:47 0
ނަޖާހު މަސްއޫދު
ރައީސް ޔާމީންގެ ވަކީލުންގެ ޓީމުން މީގެ ކުރިން މީޑިއާއަށް މައުލޫމާތު ދެނީ -- އަދަދު ފޮޓޯ: ހުސެއިން ޝަޔާހު
16 މޭ 2023 - 15:47 0
ރ. ފުއްގިރީގެ މައްސަލައިގެ ތެރެއިން ކުރީގެ ރައީސް އަބްދުﷲ ޔާމީންގެ ފަރާތުން ކުރި އިސްތިއުނާފުގައި ސުޕްރީމް ކޯޓުން ނާކާމިޔާބު ނުވާ ކަމަށާއި ރައީސް ޔާމީނަށް ގޮތް ހުސްވުމާ ގާތަށް ވެސް ނުދާ ކަމަށް އެމަނިކުފާނުގެ ވަކީލުން މިއަދު ވިދާޅުވެއްޖެ އެވެ.
ފުއްގިރި މައްސަލައިގެ ޝަރީއަތުގެ ކުރީގެ ހުށަހެޅުންތައް އިސްތިއުނާފު ކުރުމުން ސުޕްރީމް ކޯޓުން ބެލި މައްސަލައިގައި ރޭ ކުރި ހުކުމާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި ޔާމީންގެ ވަކީލު ޑރ. މުހައްމަދު ޖަމީލް އަހުމަދު ވިދާޅުވީ އެ މައްސަލަ ނިމިގެން ދިޔައީ ޔާމީންގެ ފަރާތުން އެދުނު ގޮތަށް ވުރެ ރަނގަޅަށް ކަމަށެވެ.
އެގޮތުން، ނުކުތާތައް ބެލުމަށްފަހު ގޮތެއް ނިންމަން މައްސަލަ ހައި ކޯޓަށް ނުވަތަ ދަށު ކޯޓަށް ތަހުވީލު ކުރަން ޔާމީންގެ ފަރާތުން އެދުނަސް، މަސައްކަތް ތަކުރާރުވެދާނެތީ ސުޕްރީމް ކޯޓުން މައްސަލައަށް ހައްލު ހޯދައި އުސޫލުތައް ކަނޑައަޅާފައިވާކަން އޭނާ ފާހަގަކުރެއްވި އެވެ.
އެ އުސޫލުގެތަކުގެ ފައިދާ ޝަރީއަތުގެ މަރުހަލާގައި ކުރާނެ ކަމަށް ވެސް ވަކީލުން މިއަދު ވިދާޅުވި އެވެ.
ޔާމީންގެ ފަރާތުން ސުޕްރީމް ކޯޓުގައި އިސްތިއުނާފު ކުރީ މައިގަނޑު ތިން ކަމަކަށް ހައްލު ހޯދާށެވެ. އެއީ ގުޅުން ހުރި ހެކި ކަނޑައެޅުމާއި ހެއްކާ ބެހޭ ގާނޫނުގެ ދަށުން އަދީބާއި ޒިޔަތުގެ ހެކިބަސް ބަލައިގަތުމާ މެދު ގޮތެއް ނިންމުމާއި ދައުލަތުގެ ބައެއް ހެކިތައް ހާމަ ކުރުމާ ގުޅޭ ގޮތުންނެވެ.
ވަކީލު އަބްދުﷲ ޝިޔާޒު ވިދާޅުވީ، މައްސަލަތައް ބަލައި ސުޕްރީމް ކޯޓުން އެކަންކަމަށް އުސޫލުތަކެއް ކަނޑައެޅުމުން އެއީ ހަގީގަތުގައި ކާމިޔާބީއެއް ކަމަށެވެ.
ވަކީލު އާދަމް ޝަމީމް ވިދާޅުވީ، ސުޕްރީމް ކޯޓުގައި ވާހަކަ ދެއްކި ކަންކަމަށް ވުރެ އިތުރަށް ވެސް ހުކުމުގައި ބައެއް މައްސަލަތަކަށް ހައްލު ހޯދާފައިވާ ކަމަށެވެ. އެގޮތުން، އެ ނިންމުންތަކުގެ ފައިދާ ރައީސް ޔާމީން ނޫނަސް ދައުވާ ލިބޭ ކޮންމެ މީހަކަށް ކުރާނެ ކަމަށް ވިދާޅުވި އެވެ.
ދިފާއީ ހެކި ހާމަ ކުރުމާ ގުޅޭ ގޮތުން ކަނޑައެޅި އުސޫލުގެ ސަބަބުން ކުރިއަށް އޮތް ތަނުގައި ބޭނުންހާ ގޮތަކަށް ތަހުގީގުތައް ނުކުރެވޭނެ ކަމަށާއި ރެކޯޑުތައް ބަލަހައްޓަން ޖެހޭ ކަމަށް ޝިޔާޒު ވިދާޅުވި އެވެ. އަދި, ދިފާއުވާ މީހާގެ ފަރާތުން ތަހުގީގުގެ ރެކޯޑުތައް ބަލަން އެދޭ ހާލަތުގައި ބެލެން ޖެހޭނެކަން ހުކުމުން އެނގޭ ކަމަށް ޝިޔާޒު ވިދާޅުވި އެވެ.
އޭގެ އިތުރުން، ވަކިވަކި ހެއްކަކީ ގުޅޭ ހެކިތޯ ނުވަތަ ނޫންތޯ ޝަރީއަތް ކުރިއަށްދާއިރު ކަނޑައަޅަން ޖެހޭނެ ކަމަށް ސުޕްރީމް ކޯޓުން ނިންމާފައިވާކަން އޭނާ ފާހަގަކުރެއްވި އެވެ.
ހެކި ހާމަ ކުރަން އެދި ހުށަހެޅި ހުށަހެޅުމާ ގުޅިގެން، ތިން ވަނަ ފަރާތެއްގައި ހުރި ލިޔުމާއި އަމިއްލަ ފަރާތެއްގައި ހުރި ލިޔުންތައް ހޯދާނެ ގޮތަށް ވެސް ސުޕްރީމް ކޯޓުން ހައްލެއް ދީފައިވާ ކަމަށް ޝިޔާޒު ވިދާޅުވި އެވެ. އެގޮތުން، އެފަދަ ހާލަތެއްގައި އެ ލިޔުން ބެލޭނެ ގޮތް ހަމަޖައްސަން ޕީޖީގެ މައްޗަށް ކޯޓުން އަމުރު ކުރެވޭނެ ކަަމަށާއި، އަދި އެފަހުން ވެސް ހާމަނުކޮށްފި ނަމަ ސީދާ ލިޔުން އޮތް ފަރާތަކަށް އަމުރު ކުރަން ޖެހޭ ކަމަށް ހުކުމުގައިވާކަން ފާހަގަކުރެއްވި އެވެ.
ހެއްކާ ބެހޭ ގާނޫނުގެ ދަށުން އަދީބާއި ޒިޔަތުގެ ހެކިބަސް ބަލައިނުގަތުމަށް އެދުނު ހުށަހެޅުމާ މެދު ސުޕްރީމް ކޯޓުން ނިންމާފައި ވަނީ، އެ ދެ މީހުންގެ ހެކިބަސް ނެގޭނެ ކަމާ މެދު މައްސަލަ ނިންމާއިރު، ގޮތް ނިންމުމުގެ ފުރުސަތު ކްރިމިނަލް ކޯޓުގައި މައްސަލަ ބަލާ ފަނޑިޔާރަށް ލިބިގެންވާ ކަމަށެވެ.
ޝަމީމް ވިދާޅުވީ، މިހާރު ވެސް އެ ކަމާ ގުޅޭ ހުށަހެޅުމެއް ކްރިމިނަލް ކޯޓަށް ހުށަހަޅާފައިވާއިރު، ފުރުސަތު ބޮޑީ އެ ދެ މީހުންގެ ހެކި ބަލައިނުގަތުމަށް ކަމަށެވެ. އަދާވާތްތެރިކަމެއް އޮތް ނަމަ ހެކިބަސް ނަގައިގެން ނުވާނެ ކަމަށް ހެއްކާ ބެހޭ ގާނޫނުގައި އޮންނަކަން އޭނާ ފާހަގަކުރެއްވި އެވެ. އެއީ ޔާމީންގެ އަދާވާތްތެރިކަން ސާބިތުކުރަން ހެކި ހުށަހަޅާފައިވާނެ ކަމަށް ވިދާޅުވި އެވެ.
ވަކީލު ޑރ. ޖަމީލް ވިދާޅުވީ، މިއީ ޖިނާއީ އިޖުރާއަތުގެ ގާނޫނުގެ ތެރޭގައި ހުރި ބައެއް ހަމަނުޖެހޭ ކަންތައްތައް ފޫބެއްދުމަށް ޓަކައި އެ ބާވަތުގެ މައްސަލައެއް އެންމެ މަތީ މަރުހަލާއެއް ދަތުރުކުރި ފުރަތަމަ ފަހަރު ކަމަށެވެ.
ޔާމީންގެ ވަކީލުން މިއަދުގެ ނޫސްވެރިންގެ ބައްދަލުވުމުގައި ސަޕޯޓަރުންނަށް ސާފުކޮށްދިނީ ޔާމީން މިނިވަންވުމާ ގުޅިފައިވާ މައްސަލައަކީ ހައި ކޯޓުގައި އިސްތިއުނާފުކޮށްފައިވާ ވ. އާރަށުގެ މައްސަލަ ކަމެވެ. އަދި އެއްވެސް ހާލަތެއްގައި އެމަނިކުފާނަށް ގޮތް ހުސްނުވާ ކަމަށާއި އެމަނިކުފާނު ހުންނެވީ ގަދަކޮށް ކަމަށް ވެސް ވިދާޅުވި އެވެ.
"އެއްވެސް ހާލެއްގައި ރައީސް ޔާމީނަށް ގޮތް ހުސްވާން އަދި ގާތެއް ވެސް ނުވޭ. ރައީސް ޔާމީން ހުރީ ވަރަށް ގަދަކޮށް. އެއްވެސް ހާލެއްގައި އެމަނިކުފާނު ކަންބޮޑުވެވަޑައިގެން ނޫޅުއްވާ،" ޝަމީމް ވިދާޅުވި އެވެ.
އާރަށު މައްސަލަ ހައި ކޯޓުގައި ތާވަލު ނުކުރެވި ލަސްވެގެން އުޅެނީ، ޔާމީނާއެކު ދައުވާ ލިބުނު ޔޫސުފް ނައީމްގެ އިސްތިއުނާފީ ނުކުތާތަކަށް ދައުލަތުން ޖަވާބު ނުލިބިގެން ކަމަށް ވަކީލު ޝަމީމް މިއަދު ވިދާޅުވި އެވެ. އޭނާ ވިދާޅުވި ގޮތުގައި އެ މައްސަލައިގައި ޔާމީނަށް ދޭ ޖަވާބު މިހާރު ދައުލަތުން ވަނީ ދީފަ އެވެ.
އެ މައްސަލައިގައި ދަށު ކޯޓުން ކުރި ހުކުމް ހައި ކޯޓުން ދަމަހައްޓާ ހާލަތެއްގައި ސުޕްރީމް ކޯޓުގައި އިސްތިއުނާފު ކުރާނެ ކަމަށް ވެސް އޭނާ ވިދާޅުވި އެވެ.
އޭގެ އިތުރުން، އެ ދުވަސްވަރެއްގައި ރިޔާސީ އިންތިހާބަށް ކުރިމަތިލުމުގެ ކަންކަން ކުރިއަށްދާ ނަމަ އެމަނިކުފާނުގެ ކެންޑިޑެސީއާ ގުޅޭ ހުށަހެޅުންތަކުގެ ވަކި މައްސަލައެއް ހުށަހަޅާނެ ކަމަށް ވެސް ވިދާޅުވި އެވެ.
"[ދަށު ކޯޓުގެ ހުކުމަށް] ތާއީދުކޮށްފި ނަމަ އަދިވެސް އެބަ އޮތް ސުޕްރީމް ކޯޓަށް ދިޔުމުގެ ފުރުސަތު. ސުޕްރީމް ކޯޓަށް ދިޔުމާއެކީގައި އަޅުގަނޑުމެން އެދޭނަން އެހިސާބަށް ދާއިރު މިސާލަކަށް ރިޔާސީ އިންތިހާބަށް ކުރިމަތިލުމުގެ ކަންކަން ފެށިގެން އުޅޭ ނަމަ އެހިސާބުން އަަޅުގަނޑުމެން ސުޕްރީމް ކޯޓަށް ވަކި މައްސަލައެއްގައި އެދޭނަން ކެންޑިޑެސީއާ ގުޅިގެން އަޅުގަނޑުމެން ހުށަހަޅާ ހުށަހެޅުންތައް،" ޝަމީމް ވިދާޅުވި އެވެ.
ފުއްގިރި މައްސަލައިގެ ޝަރީއަތުގެ ކުރީގެ ހުށަހެޅުންތަކުގެ އިސްތިއުނާފު ރޭ ނިމިފައިވާއިރު، އެ މައްސަލައިގެ ޝަރީއަތުގެ މަރުހަލާ ކްރިމިނަލް ކޯޓުގައި ވަނީ ފަށައިފަ އެވެ.
ޕީޕީއެމް/ޕީއެންސީގެ ރިޔާސީ ޓިކެޓު ދީފައިވާ ޔާމީން މިވަގުތު ޖަލު ހުކުމެއްގައި ހުންނެވި އިރު، އިންތިހާބުގައި ވާދަ ކުރެވެން އޮތީ އާރަށު މައްސަލައިގެ ހުކުމުން މިނިވަންވެގެންނެވެ. އެ ހުކުމުން މިނިވަންވިޔަސް، އިންތިހާބުގެ ކުރިން ފުއްގިރި މައްސަލަ ސާބިތުވާ ކަމަށް ހުކުމްކޮށްފި ނަމަ އިންތިހާބުގައި ވާދަ ކުރުމަށް އިތުރު ގޮންޖެހުންތައް ކުރިމަތިވާނެ އެވެ.
މި ލިޔުމާ ގުޅޭ ލިޔުންތައް
Comment