މިހާރު ކުރިއަށްދާ ގައުމީ ޓޭބަލް ޓެނިސް މުބާރާތުގެ 13 އަހަރުން ދަށުގެ އަންހެން އަދި ފިރިހެން ބައިގައި ފުވައްމުލަކުގެ ކުޅުންތެރިން ވިދާލައިފި އެވެ.

މާލޭ ޓީޓީ ހޯލުގައި 60 ވަނަ ގައުމީ ޓޭބަލް ޓެނިސް މުބާރާތުގެ މެޗުތައް ކުރިއަށްދަނީ މި މަހުގެ 25-30ގެ ނިޔަލަށެވެ. މުބާރާތުގައި މި އަހަރު 65 ކުޅުންތެރިން އަންނަނީ ވާދަކުރަމުންނެވެ. މުބާރާތުގެ މެޗުތައް ކުރިއަށްދަނީ ތިން ކެޓަގަރީ އަކަށް ބަހާލައިގެންނެވެ. އެއީ 13 އަހަރުން ދަށް، 17 އަހަރުން ދަށް އަދި ފުރަތަމަ ޑިވިޝަނެވެ. މިހާތަނަށް މުބާރާތުގައި ނިމިފައިވަނީ ބައެއް ކެޓެގެރީތަކުގެ ޑަބަލްސް އިވެންޓުތަކެވެ.

ތޭރަ އަހަރުން ދަށުގެ އަންހެން ބައިގެ ޑަބަލްސް ޗެމްޕިއަންކަން ހޯދީ ފުވައްމުލަކުގެ ދެ ކުޅުންތެރިން ކަމަށްވާ މިޝްޔާ އަހުމަދު އާދަމް އާއި އާމިނަތު ޒާޔާ އަބްދުލް އަޒީޒު އެވެ. މި ދެ ކުޅުންތެރިން ފައިނަލުގައި މޮޅުވީ މާލޭ ވައިޑީޕީގެ ދެ ކުޅުންތެރިން ކަމަށްވާ އައިޝަތު އަލްސާ ނާފިޒު އާއި ސާރާ މޫސާ ޖަމީލްއާ ވާދަކޮށެވެ.

ފިރިހެން ކުދިންގެ 13 އަހަރުން ދަށުގެ ފިރިހެން ޑަބަލްސް ފައިނަލުން ޖާގަ ހޯދާފައިވަނީ ވެސް ފުވައްމުލަކުގެ ދެ ޕެއާ އެވެ. އެއީ މުހައްމަދު އާން އަލީ އާއި މުހައްމަދު ޒާއިމް އަހުމަދުގެ ޕެއާ އާއި، އައިމަން އަހުމަދު ރަޝިދު އާއި ޔަޒީން ހުސައިން ޝަރީފްގެ ޕެއާ އެވެ. މިފައިނަލް މިއަދު ކުޅޭނެ އެވެ.

ސަތާރަ އަހަރުން ދަށުގެ ފިރިހެން ޑަބަލްސް ޗެމްޕިއަންކަން ހޯދީ އަޚްޔާރު އަހުމަދު ހާލިދު އާއި ޒީކް ހަސަން ލަތީފްގެ ޕެއާ އެވެ. އަޚްޔާރު އާއި ޒީކް ފައިނަލުން މޮޅުވީ އައުން އިބްރާހިމް ލަތީފް އާއި އުމައިރު މުހައްމަދު މުއިއްޒު ޕެއާ އަތުންނެވެ.

އަންހެން ކުދިންގެ 17 އަހަރުން ދަށުގެ ޗެމްޕިއަންކަން ހޯދީ، ގައުމީ ސްކޮޑުގައި ހިމެނޭ، ފާތިމާތު ދީމާ އަލީ އާއި މިޝްކާ މުހައްމަދު އިބްރާހިމްގެ ޕެއާ އެވެ. އެއީ ފައިނަލުގައި ޒާރާ ހަސަން ލަތީފް އާއި މަލާކް ބިންތި މުއިއްޒުގެ ޕެއާ ބަލިކޮށްގެންނެވެ.

ސަތާރަ އަހަރުން ދަށުގެ މިކްސް ޑަބަލްސް ފައިނަލުން ޖާގަ ހޯދީ ހުސައިން އާދު އާސިމް އާއި މަލާކް ބިންތް މުއިއްޒުގެ ޕެއާ އާއި އަހުޔާރު އަހުމަދު ހާލިދު އާއި ދީމާގެ ޕެެއާ އެވެ. ފުރަތަމަ ޑިވިޝަންގެ މިކްސް ޑަބަލްސް ފައިނަލުން ޖާގަ ހޯދީ މޫސާ މުންސިފް އަހުމަދު އާއި އައިޝަތު ރަފާ ނާޒިމްގެ ޕެއާ އާއި މުހައްމަދު ޝައްފާން އިސްމާއިލް އާއި ދީމާގެ ޕެއާ އެވެ.

ސަތާރަ އަހަރުން ދަށުގެ މިކްސް ޑަބަލްސް ފައިނަލާއި ފުރަތަމަ ޑިވިޝަން މިކްސް ޑަބަލްސް ފައިނަލް މެޗުތައް ކުޅުމަށް ހަމަޖެހިފައިވަނީ ފަހު ދެ ދުވަހު އެވެ.

ޑަބަލްސް އިވެންޓަށް ބަލާއިރު އެންމެ ފޯރިގަދަވި އެއް ކެޓަގަރީ އަކީ ފުރަތަމަ ޑިވިޝަންގެ އަންހެން ޑަބަލްސް ފައިނަލެވެ. ދީމާ އާއި ފާތިމަތު ޖުމާނާ ނިމާލް އަތުން މޮޅުވެ މިބައިގެ ޗެމްޕިއަންކަން ހޯދީ އައިޝަތު ރަފާ ނާޒިމް އާއި ޒާރާ ހަސަން ލަތީފްގެ ޕެއާ އެވެ.

މުބާރާތުގައި އިއްޔެ ކުރިއަށްދިޔައީ އެކި ކެޓަގަރީތަކުގެ ސިންގަލްސް ގްރޫޕް ސްޓޭޖު މެޗުތަކެވެ. ޖޫނިއާ އުމުރުފުރާގެ ސިންގަލްސް ސެމީ ފައިނަލް މެޗުތަކާއި ފައިނަލް މެޗުތައް މިއަދު ކުޅުމަށް ހަމަޖެހިފައިވާއިރު، ފުރަތަމަ ޑިވިޝަންގެ ސިންގަލްސް ސެމީ ފައިނަލް މެޗުތައްވެސް މިއަދު ހަވީރު ކުޅޭނެ އެވެ. މިރޭ ކުޅުމަށް ހަމަޖެހިފައިވަނީ ޓީމް އިވެންޓުގެ މެޗުތަކެވެ.