މިހާރު ގަތަރުގައި ކުރިއަށްދާ ފީފާ ވޯލްޑް ކަޕުން ކަޓާފައިވާ ގައުމުތަކުގެ މަޝްހޫރު ގިނަ ކުޅުންތެރިން ރާއްޖެއަށް އަތުވެއްޖެ އެވެ.

މިގޮތުން އެންމެ ފާހަގަ ކޮށްލެވެނީ ގްރޫޕް ސްޓޭޖުން މުބާރާތާ ވަކިވާން ޖެހުނު ޓީމުތައް ކަމަށްވާ ބެލްޖިއަމް އަދި އުރުގުއޭގެ ތަރިންނެވެ. އެގޮތުން އުރުގުއޭ ގެ ފޯވާޑު ލުއިސް ސުއަރޭޒް އަދި ފެޑެރިކޯ ވަލްވާޑޭ އަދި ބެލްޖިއަމް ގެ ކީޕަރު ކޯޓުއާ ވެސް މިހާރު ހުރީ ރާއްޖޭގަ އެވެ.

"އަދަދު" އަށް މައުލޫމާތު ލިބުނު ގޮތުގައި ސުއަރޭޒް ރާއްޖެ އައިސްފައިވަނީ މިއަދުގެ ވަގުތެއްގަ އެވެ.

ރާއްޖެއަކީ މަޝްހޫރު ގިނަ ފުޓްބޯޅަ ކުޅުންތެރިން ޗުއްޓީ ހޭދަކޮށްލުމަށް އަންނަ މަންޒިލެކެވެ. ހާއްސަކޮށް ހޫނު މޫސުމުގެ ބްރޭކުގައި ގިނަ ކުޅުނުންތެރިން ރާއްޖެއަށް އަންނަކަން ފާހަގަކޮށްލެވެ އެވެ. މި އަހަރުގެ ވޯލްޑް ކަޕު ފިނި މޫސުމުގައި ކުރިއަށް ދާއިރު މުބާރާތުން ވަކިވުމުން އެނބުރި ކުލަބް ތަކުގެ ތަމްރީނުތަކަށް ދިއުމުގެ ކުރިން ގިނަ ކުލަބު ތަކުން ދަނީ ކުޅުންތެރިންގެ ސިކުނޑި ހަމަޖައްސާލުމަށް ވަގުތުކޮޅެއް ދެމުންނެވެ.

މި ދުވަސްވަރު ރާއްޖެ އަންނަމުންދާ ކުޅުންތެރިންގެ ތެރޭގައި ވޯލްޑް ކަޕަށް ނުހޮވޭ ގައުމުތަކުގެ ކުޅުންތެރިންނާއި ގައުމީ ޓީމަށް ނުހޮވޭ ކުޅުންތެރިން ހިމެނެ އެވެ. އެގޮތުން މިދިޔަ މަހުގެ ތެރޭގައި އިނގިރޭސިވިލާތުގެ ޖޯ ގޮމޭޒް އަދި ސްޕެއިންގެ ސާޖިއޯ ރެގިލޯން ވެސް ވަނީ ރާއްޖެ އައިސްފަ އެވެ. އަދި އިޓަލީގެ ކީޕަރު ޑޮނަރޫމާ ހިމެނޭހެން އެ ގައުމުގެ ގިނަ ކުޅުންތެރިންވެސް ވަނީ ޗުއްޓީ ހޭދަކޮށްލުމަށް ރާއްޖެ އައިސްފަ އެވެ.