ރައްޔިތުންނަށް ފައިދާހުރި އިޖްތިމާއީ ޕްރޮގްރާމުތަކާއި ތަފާތު ޕްރޮޖެކްޓުތައް ހިންގުމަށް އެހީތެރިވެ ދިނުމުގެ ގޮތުން ހަތް ރަށަކަށް ފައިސާ ދިނުމަށް ހއ. އަތޮޅު ކައުންސިލުން ނިންމައިފި އެވެ.

ހއ. އަތޮޅު ކައުންސިލުން އިއްޔެ ނެރުނު އިއުލާނެއްގައި ބުނީ، އިޖުތިމާއީ މަޝްރޫއުތައް ހިންގުމަށް މިއަހަރު އެ އަތޮޅުގެ ހަތް ރަށަކަށް ފައިސާ ދޭން ނިންމާފައިވާ ކަމަށާއި ކޮންމެ ރަށަކަށް 100،000ރ. ދޭނެ ކަމަށެވެ.

އެ އިއުލާނުގައި ވަނީ ރައްޔިތުންނަށް ފައިދާހުރި އިޖުތިމާއީ ޕްރޮގްރާމުތަކާއި ތަފާތު ޕްރޮޖެކްޓުތައް ހިންގަން ބޭނުންވާ ފަރާތްތަކުން އެކަމަށް އެދި ޕްރޮޕޯސަލް ހުށަހެޅުމަށް ހުޅުވާލާފަ އެވެ. އެގޮތުން، އަންނަ އާދިއްތަ ދުވަހުގެ މެންދުރު 12:00ގެ ކުރިން ޕްރޮޕޯސަލް ހުށަހެޅުމަށް އަތޮޅު ކައުންސިލުން ވަނީ އެދިފަ އެވެ. ޕްރޮޕޯސަލް ފޯމު އެ ކައުންސިލުގެ ވެބްސައިޓުން ލިބެން ހުންނާނެ އެވެ.

އެ ކައުންސިލުން ބުނީ، ހުށަހަޅާ ޕްރޮޕޯސަލްތަކަށް ބެލުމަށްފަހު ފައިސާ ދޫކުރާނީ އެންމެ ރަނގަޅު ހުށަހެޅުންތައް ހުށަހެޅި ހަތް ރަށަކަށެވެ. އެގޮތުގެ މަތިން ފައިސާ ދޫކުރާނީ އެ އަތޮޅުގެ ރަށްރަށުގެ ކައުންސިލް އިދާރާތަކަށާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކަށާއި ސަރުކާރުގެ މުއައްސަސާތަކުގެ އިތުރަށް އެ އަތޮޅު ރަށްތަކުގައި ރަޖިސްޓްރީކޮށްގެން ހިންގާ ކުލަބު ޖަމްއިއްޔާތަކަށެވެ.