ލަންޑަން (އޮކްޓޫބަރު 5) - ޗެލްސީގެ އެއް ވަނަ ކީޕަރެއް ކަނޑައަޅަން އޭނާ އަށް ޕްރެޝަރެއް ނެތް ކަމަށް އެ ޓީމާ ދާދި ފަހުން ހަވާލުވި އިނގިރޭސި ކޯޗު ގްރަހަމް ޕޮޓާ ބުނެފި އެވެ.

ޕޮޓާ ހަވާލުވިއިރު، ޗެލްސީގެ އެއް ވަނަ ކީޕަރުގެ މަގާމުގައި ހުރި އެޑޮއާޑް މެންޑީ އައީ އަނިޔާއަކުން ރިކަވާވަމުންނެވެ. އެހެންވެ، ޗެލްސީގެ ގޯލު ބަލަހައްޓަމުން އައީ ކެޕާ އަރިއްޒަބަލާގާ އެވެ. ޕޮޓާގެ ކޯޗުކަމުގައި ޗެލްސީން ކުޅުނު ދެ މެޗުގައި ވެސް އެ ޓީމުގެ ކީޕަރަކަށް ހުރީ ކެޕާ އެވެ.

ފްރާންސްގެ ރެެނެސް އަށް 25 މިލިއަން ޑޮލަރު ދިނުމަށް ފަހު ޗެލްސީން މެންޑީ ގަތީ 2020 ވަނަ އަހަރު ސެޕްޓެމްބަރު މަހުގަ އެވެ. ޗެލްސީން 2018 ވަނަ އަހަރު ކެޕާ ގަތީ އެންމެ އަގުބޮޑު ގޯލްކީޕަރުގެ ގޮތުގަ އެވެ. ޗެލްސީން ވަނީ ކެޕާ އާއި އެތުލެޓިކް ބިލްބާއޯއާ ދެމެދު ހަދާފައިވާ އެއްބަސްވުން އުވާލަން ދައްކަން ޖެހޭ 91 މިލިއަން ޑޮލަރު ދައްކައިފަ އެވެ.

ޗެމްޕިއަންސް ލީގުގައި މިރޭ އޭސީ މިލާނާ ދެކޮޅަށް ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ޕޮޓާ ބުނީ އެއް ވަނަ ކީޕަރެއް ނަގަން ޖެހޭ ހާލަތެއްގައި އެކަން ކުރާނެ ކަމަށާއި އަދި އެ ފަދަ ޕްރެޝަރެއް ސިކުނޑީގައި ނެތް ކަމަށެވެ.

"އެއް ވަނަ ކީޕަރެއް ނޫނީ ދެ ވަނަ ކީޕަރެއް ނަގަން އަވަސް އަރުވާލައިގެން ނޫޅެން. ފުރަތަމަ ކަމަކަށް އަހަރެން ބޭނުމީ ކެޕާ އުފަލުން ފުޓްބޯޅަ ކުޅޭތަން ބަލަން. އެކަން އޭނާ އެބަކުރޭ، ކްރިސްޓަލް ޕެލަސް މެޗަކީ އޭގެ މެޗެއް. ދެން، އަހަރެން ވިސްނަނީ އެޑީ (މެންޑީ) ފިޓްކޮށް އެނބުރި އަންނަން އެހީވާން،" ޕޮޓާ ބުންޏެވެ.

ޗެލްސީ މި ވަގުތު އޮތީ ޗެމްޕިއަންސް ލީގުގެ ގްރޫޕް އީގެ އެންމެ ފުލުގަ އެވެ. އެއީ ދެ މެޗުން އެއް ޕޮއިންޓާ އެކު އެވެ. މިރޭ ޗެލްސީން އަމިއްލަ ދަނޑުގައި ކުޅޭނީ އޭސީ މިލާންއާ އެވެ.

މިލާން އޮތީ ގްރޫޕްގެ އެއް ވަނައިގަ އެވެ. މިރޭގެ މެޗާ ކުރިމަތިލާއިރު، ޗެލްސީ އަށް ޕްރެޝަރެއް އޮތްތޯ އެހުމުން ޕޮޓާ ބުނީ ފުޓްބޯޅައިގައި އަބަދުވެސް ކޮންމެ ވެސް ޕްރެޝަރެއްގެ ވާހަކަ ދެކެވޭނެ ކަމަށެވެ.