31 އޮގަސްޓު 2022 - 15:46 0
މުހައްމަދު އުޝާމް
ޔާމީނާއި ރިލުވާންގެ މަރު މައްސަލާގައި ޓެރަރިޒަމްގެ ދައުވާކޮށްފައިވާ މީހުން؛ ޝަރީއަތް ސިއްރުކޮށްދޭން އެދިއްޖެ
31 އޮގަސްޓު 2022 - 15:46 0
ބްލޮގަރު ޔާމީން ރަޝީދު މަރައިލި މައްސަލައާއި ނޫސްވެރިޔާ އަހުމަދު ރިލްވާން އަބްދުﷲ ރަހީނުކޮށް މަރައިލި މައްސަލާގައި ޓެރަރިޒަމްގެ ދައުވާތަކެއް އުފުލި ތިން މީހުންގެ މައްޗަށް ހިނގާ ޝަރީއަތް ސިއްރުކުރަން ދައުލަތުގެ ފަރާތުންނާއި ދިފާއީ ބައެއް ވަކީލުންގެ ފަރާތުން އެދިއްޖެ އެވެ.
އެ ތިން މީހުންގެ ތެރެއިން އިސްމާއީލް އަބްދުއް ރަހީމް (އިސޫ) ދެކޮޅަށް އެ ދެ މަރުގެ މައްސަލައިގައި ވެސް ކުރީ ޓެރަރިޒަމްގެ އަމަލެއް ހިންގަން އެހީތެރިވެދިނުމުގެ ކުށުގެ ދެ ދައުވާ އެވެ.
އަހުމަދު އިސްމާއިލް (ބުރު އަހަނދު) ގެ މައްޗަށް ކުރަނީ، ޓެރަރިޒަމް އަމަލެއް ކުރަން ރޭވުމުގެ ކުށުގެ ދައުވާއަކާއި ޓެރަރިޒަމް އަމަލެއް ކުރުމަށް ރޭވުމުގެ ދައުވާ އެވެ. އެއީ ވެސް ދެ މަރުގެ މައްސަލާގަ އެވެ.
ދެން ހިމެނޭ އަހުމަދު މުއާޒް (ގަޓް މުއާ) އަށް ކުރަނީ ޓެރަރިޒަމްގެ އަމަލެއް ރޭވުމުގެ ކުށުގެ އެއް ދައުވާ އެވެ. އެއީ ވެސް ރިލްވާނާއި ޔާމީން މަރައިލަން ރޭވުމުގައި އުޅުނު ކަމުގެ ތުހުމަތުގަ އެވެ.
މިއަދު ބޭއްވީ މި މައްސަލައިގެ ފުރަތަމަ އަޑުއެހުމެވެ. ޝަރީއަތުގެ މަރުހަލާތައް ފެށުމުގެ ކުރިއަށް ބޭއްވި އެ އަޑުއެހުމުގައި ދައުވާ ރައްދުވާ ފަރާތްތަކަށް ލިބިދޭން ޖެހޭ ހައްގުތައް ސާފުކޮށްދީ، ލިޔެކިޔުންތަކާއި މައްސަލާގައި ހިމެނޭ ފަރާތްތަކުގެ ހުށަހެޅުންތަކާ މެދު ވާހަކަ ދެއްކެވުނެވެ.
ޝަރީއަތް ކުރިއަށް އޮތް ތަނުގައި އަޑުއެހުންތައް ސިއްރުކޮށްދޭން އެދުނީ އިސޫގެ ދިފާއީ ވަކީލު ހަމްޒާ އެވެ. ދެން މައްސަލަ ބައްލަވާ ގާޒީ މުހައްމަދު މިސްބާހު ވަނީ ދައުލަތުން ވެސް އެފަދަ އިޝާރާތެއް ކުރައްވާފައިވާ ކަމަށް ވިދާޅުވެފަ އެވެ. ދައުލަތުގެ ފަރާތުން އެ ކަން ސާފުކޮށްދޭން ދިފާއުން އެދުނެވެ.
އެކަން ސާފުކޮށްދޭން ދައުލަތުގެ ވަކީލަށް ދިން ފުރުސަތުގައި ވިދާޅުވީ އެ މައްސަލާގައި ދެން ބާއްވާ ޝަރީއަތުގެ އަޑުއެހުމުން ފެށިގެން ސިއްރުކޮށްދޭން އެދިފައިވާނެ ކަމަށެވެ.
ސަބަބެއްގެ ގޮތުގައި ފާހަގަކުރެއްވީ، ޝަރީއަތުން ހާމަވެގެންދާ މައުލޫމާތެއްގެ ސަބަބުން ދައުވާ ލިބޭ ތިން މީހުނަށް ވެސް ނުރައްކާތެރިކަން އަތުވެދާނެ ކަމަށް ބެލުމުގެ ފުރުސަތު އޮތުމުން ކަމަށެވެ.
އަދި އެ ދެ މަރަކީ އަދިވެސް ތަހުގީގުގެ ބައިބައިތައް ކުރިއަށްދާ މައްސަލަތަކަކަށް ވާތީ، ތަހުގީގަށް ވެސް ހުރަސް އެޅުމުގެ ފުރުސަތު އޮވެދާނެ ކަމަށް ބެލެވޭތީ ސިއްރުކޮށްދޭން އެދުނީ ކަމަށް ވަކީލު ވިދާޅުވި އެވެ.
މައްސަލަ ބައްލަވާ ގާޒީ މިސްބާހު ވިދާޅުވީ މިއަދުގެ އަޑުއެހުމުގައި މައްސަލައިގެ މައުޟޫއީ އެއްވެސް ވާހަކައެއް ދައްކަން ނެތުމުން ހުޅުވާލައިގެން އަޑުއެހުން ކުރިއަށް ގެންދާނެ ކަމަށެވެ. އަދި ދެން ބޭއްވޭ އަޑުއެހުމުގެ ކުރިއަށް ޝަރީއަތް ސިއްރު ކުރުމާ މެދު ގޮތެއް ނިންމަވާނެ ކަމަށް ގާޒީ ވިދާޅުވި އެވެ.
ދައުލަތުން ވަނީ ހެކި ރައްކާތެރިކުރުމުގެ އަމުރަކަށް ވެސް އެދިފަ އެވެ. އޭގެ ތެރޭގައި ބައެއް ހެކި އެއްކޮށް ސިއްރުކޮށްދޭން އަދި ބައެއް ހެކި ދިފާއީ ވަކީލުންނަށް ކޯޓަށް ހާޒިރުވެ ބެލޭނެ ގޮތަށް، ސިއްރުކޮށްދޭން ހުށަހަޅާފައިވެ އެވެ.
އެ ކަމަށް ވަގުތީ އަމުރެއް ވެސް ކޯޓުން ނެރެދިނުމުގެ ކުރިއަށް ބަހުސް ކުރަން ދިފާއީ ބައެއް ވަކީލުން އެދޭތީ، އިދާރީ ބައްދަލުވުމަށް ފަހު އެ ކަން ހަމަޖައްސައިދޭނެ ކަމަށް ގާޒީ ވިދާޅުވި އެވެ.
މި މައްސަލާގައި ދެން އޮންނާނީ އިދާރީ ބައްދަލުވުމެއް ކަން ގާޒީ ފާހަގަ ކުރެއްވި އެވެ. އެއީ ބައެއް ލިޔެކިޔުންތައް މަދުވާ ކަމާއި ލިބޭ ބައެއް ލިޔެކިޔުންތަކުގެ ކޮޕީ ސާފު ނޫން ކަމަށް ދިފާއީ ވަކީލުން ފާހަގަކޮށްފައިވާތީ އެ ކަންކަން ހަމަޖެއްސުމަށް ބާއްވާ އަޑުއެހުމެކެވެ.
މި ފެށޭ ސެޕްޓެމްބަރު މަހުގެ ކުރީކޮޅު އެ އިދާރީ އަޑުއެހުން ބާއްވަން ވަނީ ނިންމައިފަ އެވެ.
މި މައްސަލާގައި ދައުވާ ކުރާ ތިން މީހުން ޖަލުގައި ބައިތިއްބާފައިވަނީ އެހެން އެންމެނާ ވަކިން ގޮޅިއެއްގައި އެކަހެރިކޮށް ކަމަށް ތިން މީހުން ވެސް ބުނެފައިވެ އެވެ. އަދި ޓެރަރިޒަމްގެ އެެހެން މައްސަލަތަކުގައި ވެސް އެފަދަ ގޮތަކަށް އަމަލުނުކުރާ ކަން ފާހަގަ ކުރި އެވެ.
އެ ގޮތަށް ބަންދުކޮށްފައިވަނީ ދައުލަތުން އެދިގެންތޯ ސާފުކުރަން ދިފާއީ ވަކީލުން އެދުނެވެ.
ގާޒީ އެކަމާ ގުޅޭ ގޮތުން ދައުލަތާ ސުވާލުކުރެއްވުމުން، ދައުލަތުގެ ވަކީލު ވިދާޅުވީ އެކަން ހިނގާ ގޮތް ސާފުކޮށްފައި ދައުލަތުން ހިއްސާ ކުރާނެ ކަމަށެވެ.
ދައުލަތުގެ ވަކީލު ވިދާޅުވި ގޮތުގައި، މައްސަލާގައި ހިމެނޭ އެކަކު ވަނީ ޖަލަށް ވަގަށް ފޯނެއް ވެސް ވައްދައިފަ އެވެ. އަދި ހެއްކަށް ނުފޫޒު ފޯރުވުން ފަދަ ކަންކަން ކުރާ ކަމުގެ ޝަކުވާ ވެސް ލިބޭ ކަމަށެވެ. އެހެންވެ އެކަހެރިކޮށް ބަހައްޓަން ޖެހުނު އެފަދަ ހުރިހާ ސަބަބެއް ސާފުކޮށްފައި ހިއްސާކުރާނެ ކަމަށް ވިދާޅުވި އެވެ.
ގާޒީ ވެސް ވިދާޅުވީ ކަރެކްޝަންސްއިން އެ މައުލޫމާތުތައް ޝަރީއަތަށާއި ދައުލަތަށް ވެސް ހިއްސާކުރަން ކޯޓުން އަންގާނެ ކަމަށެވެ.
ބަންދު މުރާޖައާ ކޮށްދިނުމަށް އެދި ހުށަހަޅާފައިވަނީ އިސޫ އާއި އަހަނދުގެ ފަރާތުންނެވެ.
ޓެރަރިޒަމްގެ މައްސަލަތަކުގައި، ޝަރީއަތް ނިމެންދެން ބަންދުކުރާ މީހުންގެ ބަންދު މުރާޖައާ ކުރުން ލާޒިމުކޮށްފައި ނެތް އިރު ބަންދު މުރާޖައާ ކުރަން ހުށަހެޅުމުގެ ބާރު އޮންނަނީ ދައުލަތަށެވެ. މި މައްސަލާގައި ދައުލަތުން އެކަން ކުރިއަށް ގެންދަން އިއުތިރާޒެއް ނުކުރެ އެވެ.
ބަންދު މުރާޖައާ ކުރުމާ މެދު ވާހަކަ ދެއްކުމަށް ވަކި އަޑުއެހުމެއް ސެޕްޓެމްބަރު މަހުގެ ފަހުކޮޅަށް ބާއްވާނެ ކަމަށް ގާޒީ ވިދާޅުވި އެވެ. މަހުގެ ކުރީކޮޅަށް އަޑުއެހުމެއް ތާވަލުކުރެވެން ނެތީ ސެޕްޓެމްބަރު 12 ގެ ނިޔަލަށް ގާޒީ ޗުއްޓީއަކަށް ވަޑައިގަންނަވާތީ ކަން ވެސް ފާހަގަ ކުރެއްވި އެވެ.
Comment