އަންނަ ހޯމަ ދުވަހު އިންޑިއާގެ ބުނަނޭޝްވަރުގައި ފަށާ 20 އަހަރުން ދަށުގެ ސާފް ޗެމްޕިއަންޝިޕްގައި ވާދަކުރަން ޒުވާން ގައުމީ ފުޓްބޯޅަ ޓީމު މިއަދު ފުރިއިރު، މުބާރާތުގެ ފުރަތަމަ މެޗުގައި ކުޅެން ޖެހޭނީ ނޭޕާލާ އެވެ.

ގައުމީ ޓީމުގެ ކުރީގެ އެސިސްޓަންޓް ކޯޗު، އަހުމަދު ޝާކިރު (ޝާކިއްޓެ)ގެ ހެޑް ކޯޗުކަމުގައި މި ފަހަރުގެ 20 އަހަރުން ދަށުގެ ސާފް ޗެމްޕިއަންޝިޕްގައި ވާދަކުރާ ގައުމީ ސްކޮޑުގައި މި އަހަރުގެ 19 އަހަރުން ދަށުގެ ޔޫތު ޗެމްޕިއަންޝިޕުން ފާހަަގަވި ކުޅުންތެރިންނާއި، މި ފަހަރުގެ ސީޒަނުގައި ގަވާއިދުން ޓީމުތަކަށް ކުޅުނު ކުޅުންތެރިން ހިމެނެ އެވެ.

މި ފަހަރުގެ 20 އަހަރުން ދަށުގެ ސާފް ޗެމްޕިއަންޝިޕްގައި ވާދަކުރަނީ ފަސް ގައުމަކުންނެވެ. އެއީ ރާއްޖެ އާއި ހޯސްޓް އިންޑިއާގެ އިތުރުން، ނޭޕާލް، ސްރީ ލަންކާ އަދި ބަންގްލަދޭޝް އެވެ. ފުރަތަަމަ މެޗުގައި އަންނަ ހޯމަ ދުވަހު ރާއްޖޭން މުބާރާތުގެ ފުރަތަމަ މެޗުގައި ނޭޕާލާ ދެކޮޅަށް ކުޅޭނެ އެވެ. ދެ ވަނަ މެޗުގައި މި މަހު 29 ވަނަ ދުވަހު ބަންގްލަދޭޝާ ބައްދަލުކުރާނެ އެވެ. އޭގެ ދެ ދުވަސް ފަހުން، މި މަހު 31 ވަނަ ދުވަހު ލަންކާއާ ކުޅުމަށް ފަހު، ލީގު ބުރުގެ ފަހު މެޗުގައި އަންނަ މަހު ދެ ވަނަ ދުވަހު އިންޑިއާއާ ކުޅޭނެ އެވެ.

ގައުމީ ޓީމުގެ ކުޅުންތެރިން މިއަދު މާލޭ ބަސް ޓާމިނަލުގައި.-- ފޮޓޯ: މުހައްމަދު ޝާބިން/ އަދަދު

ލީގު ބުރު ނިމޭއިރު އެންމެ ރަނގަޅު ނަތީޖާ ނެރޭ ދެ ޓީމެއްގެ މެދުގައި ފައިނަލް މެޗު ކުޅޭނީ އަންނަ މަހު ފަސް ވަނަ ދުވަހު އެވެ.

ޝާކިއްޓެ، ވަނީ މީގެ ކުރިން 19 އަހަރުން ދަށުގެ ގައުމީ ޓީމަށް ކޯޗުކޮށްދީފަ އެވެ. ރާއްޖޭގައި ބާއްވާ ޔޫތު ޗެމްޕިއަންޝިޕް ފުޓްބޯޅަ މުބާރާތުގެ އެންމެ ކާމިޔާބު ކޯޗަކީ ވެސް ޝާކިއްޓެ އެވެ. ޝާކިއްޓެގެ ބެލުމުގެ ދަށުން ޔޫތު ޓީމު މިދިޔަ އޭޕްރީލް މަހު ޕްރެކްޓިސް ފެށިއިރު، ޓީމުގައި ހިމެނޭ ފުރަތަމަ ޑިވިޝަން ކްލަބްތަކުގެ ކުޅުންތެރިން އެކަށޭނެ ވަރަށް ޕްރެކްޓިސް ކުރަން ރިލީސްކޮށްދީނީތީވެ، ޝާކިއްޓެ އެކަން ފާހަގަކުރެ އެވެ.

ޝާކިއްޓެއާ އެކު، ކޯޗިން ޓީމުގައި މަސައްކަތް ކުރާނީ ތަޖުރިބާކާރު ގޯލްކީޕަރު، އިމްރާން މުހައްމަދު އާއި އިބްރާހިމް ސައީދު (ކަކާ) އަދި އަހުމަދު ފައްރާހު (ފައްރަ) އެވެ. ޓީމުގެ މެނޭޖަރަކީ މުހައްމަދު އަބީރު އެވެ.

ގައުމީ 20 އަހަރުން ދަށުގެ ޓީމަށް، ފުރަތަމަ ޑިވިޝަނުގައި ގަވާއިދުން ކްލަބްތަކުގައި ކުޅެމުން އަންނަ ކުޅުންތެރިން ރިލީސްކުރުމުން ލީގުގެ ފަހު މެޗުތަކުގައި އެ ޓީމުތަކުން ކުޅެން ޖެހޭނީ އެ ކުޅުންތެރިން ނުލަ އެވެ.

ސާފް ޗެމްޕިއަންޝިޕަށް ތައްޔާރުވުުމުގެ ގޮތުން 20 އަހަރުން ދަށުގެ ޓީމުން ވަނީ ޓާފް ދަނޑުގައި އެކި ޓީމުތަކާ ދެކޮޅަށް ޕްރެކްޓިސް މެޗުތަކެއް ކުޅެފަ އެވެ. އޭގެ ތެރޭގައި މާލެ ކައިރި ރަށްތަކުގެ ޓީމުތަކާއި ފުރަތަމަ ޑިވިޝަނުގެ ޓީމުތަކާ ދެކޮޅަށް ކުޅުނު މެޗުތައް ހިމެނެ އެވެ.

20 އަހަރުން ދަށުގެ ފައިނަލް ސްކޮޑު

ޝައިހާން އަލީ، އައިހަމް ސައީދު، އިސްމާއިލް ސައިފް، އަހުމަދު މައީޝް މުހައްމަދު، ހުމައިދު ހުސެއިން، މުހައްމަދު ޒައިން ސުޖާއު، އަހުމަދު އީރާސް، އަހުމަދު ޔައީޝް ޔޫޝައު، އައިހަމް ހަމްދޫން، އަހުނަފް މުހައްމަދު ތަސްނީމް (ނަފްކޮ)، ޒައިން ޒަފަރު، ހުސެއިން ޝާވިން، އަބްދުﷲ އަމިން އަލީ، އަހުމަދު ޒައުލް ނާޒިމް، މުހައްމަދު ސަމާހު މޫސާ، އަހުމަދު މާއިޝް ރަޝީދު، އަލީ އިޝްފާގު ހަަސަން މަޖީދު، އަލީ ޝައިބާން، ފަހުމާން އަބްދުލް ހަމީދު، އިބްރާހިމް ޝަރީފް މުހައްމަދު، މުހައްމަދު ފާލިލް ފާއިގް، ޔޫސުފް މީސަމް އަބްދުﷲ، ލަމާން ޒުހެއިރު