ރާއްޖޭގައި މިހާރު ކުރިއަށްްދާ 54 ވަނަ އޭޝިއަން ބޮޑީބިލްޑިން އެންޑް ފިޒީކް ޗެމްޕިއަންޝިޕްގައި ވާދަކުރާ ގައުމީ ބޮޑީބިލްޑިން ޓީމުގެ އެތުލީޓް، އަޒްނީން ރަޝާދު އެތުލެޓިކް ފިޒީކް ކެޓަގަރީން ރަން މެޑަލް ހޯދައިފި އެވެ.

އަޒްނީން މީގެ ކުރިން ވަނީ 2019 ވަނަ އަހަރު ނޭޕާލުގެ ކަތުމަންޑޫގައި ބޭއްވި ސައުތު އޭޝިއާ ބޮޑީބިލްޑިން މުބާރާތުގެ 170 ސެންޓިމީޓަރު ބައިން ރާއްޖެ އަށް ރަން މެޑަލް ހޯދައިދީފަ އެވެ. އެކަމަކު، އެ ފަހަރު އިންޑޮނީޝިއާގެ ބަތާމްގައި ބޭއްވި އޭޝިއާ މުބާރާތުން އަޒްނީން ދިޔައީ ހަތަރު ވަނަ އެވެ.

އާ ފެށުމަކާ އެކު ބައިނަލްއަގުވާމީ ސްޓޭޖަށް އައިސް، ކ. މާފުށީގައި މިހާރު ކުރިއަށްދާ އޭޝިއާ މުބާރާތުން އަޒްނީން، 170 ސެންޓިމީޓަރު ބައިން ރަން މެޑަލް ހޯދީ ސައުތު އޭޝިއާގެ ދެ އެތުލީޓުންނާ ވާދަކޮށެވެ. އަޒްނީން، 2017 ވަނަ އަހަރު ބޮޑީބިލްޑިން އަށް ރަނގަޅަށް ފޯކަސް ކޮށްގެން މަސައްކަތް ފެށި ފަހުން އޭނާ އަކީ ރާއްޖޭގެ އެންމެ ރަނގަޅު އެއް ބޮޑީބިލްޑަރެވެ.

ރާއްޖޭގެ އަޒްނީން (މ) އަށް ޓްރޮފީ ހަވާލުކުރަނީ.---

މިއީ، އޭޝިއާ ބައްރުގެ ބޮޑީބިލްޑިން މުބާރާތަކުން ރާއްޖެ އަށް ލިބުނު ދެ ވަަނަ ރަން މެޑަލް އެވެ. އެންމެ ފުރަތަމަ ރަން މެޑަލް ރާއްޖެ އިން ހޯދީ 2017 ގެ އޭޝިއާ މުބާރާތުގަ އެވެ. އެއީ 2017 ވަނަ އަހަރު އޮތް އޭޝިއަން ބޮޑީބިލްޑިން ޗެމްޕިއަންޝިޕްގެ 55 ކިލޯގެ ކެޓަގަރީން ރަން މެޑަލް ހޯދި ބޮޑީބިލްޑަރު ޝާހީން އިބްރާހިމް ދީދީ އެވެ.

މި ފަހަރުގެ އޭޝިއާ މުބާރާތުގައި މިއަދު ކުރިއަށްދިޔަ އިވެންޓްތަކުގައި ދިވެހި ގިނަ އެތުލީޓުންތަކެއް ފެނިގެންދިޔައިރު، އޭގެ ބައެއް އިވެންޓްތަކުގައި ވާދަކުރި ދިވެހި އިތުރު ދެ އެތުލީޓަކު ވެސް ނިންމާލީ މެޑަލަކާ އެކު އެވެ. އެއީ 180 ސެންޓިމީޓަރު ކެޓަގަރީން ވާދަކުރި މުހައްމަދު އިމްރާހާއި 175 ސެންޓިމީޓަރު ބައިން ވާދަކުރި އަލީ ސަލީމް (އައްޔަ) އެވެ.

ބޮޑީބިލްޑިން އަކީ ރާއްޖެ އަށް ގިނަ ރަން މެޑަލްތަކެއް ގެނެސްދީފައިވާ ކުޅިވަރެކެވެ. އޭޝިއާގެ މުބާރާތުން ވެސް ރާއްޖެ ވަނީ ރަން މެޑަލް ހޯދައިފަ އެވެ. އަމިއްލަ ގައުމުގައި އޭޝިއާގެ ބޮޑު މުބާރާތް ބޭއްވުމުން ދިވެހި ބޮޑީބިލްޑަރުންނަށް ކާމިޔާބު ހޯދުމަށް ފަސޭހަވެގެންދާނެ އެވެ.

ރާއްޖޭގެ 20 ވަރަކަށް ބޮޑީބިލްޑަރުން ބައިވެރިވ މި ފަަހަރުގެ މުބާރާތަށް ބީބީއޭއެމުން ކަނޑައެޅި މެޑަލް ޓާގެޓަކީ 10 އެކެވެ. އެކަން ހާސިލްވެއްޖެނަމަ މިއީ ބޮޑީބިލްޑިން ތާރީހުގައި ރާއްޖެ އަށް އެންމެ ކާމިޔާބު މުބާރާތަށް ވާނެ އެވެ. މިއީ 2001 ވަނަ އަހަރުގެ ފަހުން ރާއްޖޭގައި ބާއްވާ ފުރަތަމަ ބައިނަލްއަގުވާމީ ބޮޑީބިލްޑިން މުބާރާތެވެ.