ލަންޑަން (ޖޫން 20) - މި މަހު ފަހުކޮޅު އިންގްލެންޑްގައި ފަށާ ވިމްބަލްޑަން ޓެނިސް މުބާރާތުގައި ވާދަކުރުމުގެ ފުރުސަތު ހޯދަން، ރަޝިއާގެ ޓެނިސް ކުޅުންތެރިޔާ، ނަޓޭލާ ޒަލަމީޑްޒޭ ރަޝިއާގެ ރަށްވެހިކަން ދޫކޮށްލައި ޖިއޯޖިއާ ޕާސްޕޯޓް ހޯދައިފި އެވެ.

ފެބްރުއަރީ މަހު ޔޫކްރެއިނަށް އަރައި، ރަޝިއާ އިން ކުރަމުން އަންނަ ހަނގުރާމައިގެ ސަބަބުން ރަޝިއާގެ މީހުންނާ މެދު އެންމެ ބޮޑަށް ފިޔަވަޅު އަޅަމުން އަންނަ އެއް ގައުމަކީ އިންގްލެންޑް އެވެ.

އެ ގޮތުގެ މަތިން، މި މަހު 27 ގައި އިންގްލެންޑްގައި ފަށާ ވިމްބަލްޑަން ޓެނިސް މުބާރާތުގައި ރަޝިއާ އާއި ބެލަރޫސްގެ ކުޅުންތެރިންނަށް ނުކުޅެވޭނެ ކަމަށް މިދިޔަ އޭޕްރީލް މަހު ވިމްބަލްޑަން ޓެނިސް މުބާރާތް އިންތިޒާމްކުރާ ކޮމިޓީން ވަނީ އިއުލާނުކޮށްފަ އެވެ. މިއީ އިނގިރޭސި ސަރުކާރުގެ ލަފާގެ މަތިން ނިންމި ނިންމުމެކެވެ.

ޓެނިސް މެޗެއްގެ ތެރެއިން ނަޓޭލާ.

މި ނިންމުމާ އެކު، ރަޝިއާގެ ގިނަ ކުޅުންތެރިން ހިތްހަމަނުޖެހުން ފާޅުކުރިއިރު، ނަޓޭލާ، 29، އިހުތިޔާރުކުރީ ތަފާތު މަގެކެވެ.

އާއިލީ ގޮތުން ޖިއޯޖިއާ އާއި ނަޓޭލާގެ ގުޅުން އޮތުމުން އޭގެ ބޭނުންހިފައި، އޭނާ ބަދަލުވީ ޖިއޯޖިއާ ރައްޔިތަކަށެވެ. ނަޓޭލާ މި ގޮތަށް ނިންމީ ވިމްބަލްޑަންގެ ޑަބަލްސް އިވެންޓްގައި ކުޅޭށެވެ. ނަޓޭލާ އާއި އޭނާގެ ޑަބަލްސް ޕާޓްނަރު، ސާބިއާގެ އަލެކްސަންޑަ ކްރުނިޗަކީ ދުނިޔޭގެ ރޭންކިންގެ 44 ވަނަ އެވެ.

ވިމްބަލްޑަން އިންތިޒާމްކުރާ ކޮމިޓީގެ ތަރުޖަމާނު މީޑިއާ އަށް ބުނީ ނަޓޭލާ ރަށްވެހިކަން ބަދަލުކޮށްފައިވާތީ، އޭނާ އަށް ވިމްބަލްޑަންގައި ކުޅެވޭނެ ކަމަށާއި ބައިނަލްއަގުވާމީ ޓެނިސް އިދާރާތަކުން ސާފުކުރަން ޖެހޭ ހުރިހާ ކަމެއް ފުރިހަމަ ވެފައިވާ ކަމަށެވެ.

ގްރޭންޑް ސްލޭމް ހަތަރު މުބާރާތުގެ ތެރެއިން ރަޝިއާ އާއި ބެލަރޫސް ކުޅުންތެރިންނަށް ނުކުޅެވޭ ގޮތަށް ނިންމީ ވިމްބަލްޑަންގައި އެކަންޏެވެ. އަހަރުގެ ފަހު ގްރޭންޑްސްލޭމް މުބާރާތް، ޔޫއެސް އޯޕަން އިން ނިންމާފައިވަނީ ރަޝިއާ އާއި ބެލަރޫސް ކުޅުންތެރިން ވާދަކުރަން ޖެހޭނީ ނިއުޓްރަލް ކުޅުންތެރިއެއްގެ ގޮތުގައި ކަމަށް ކަނޑައަޅައިފަ އެވެ.