ގައުމީ ފުޓްބޯޅަ ޓީމުން މާދަމާރޭ ބަންގްލަދޭޝާ ދެކޮޅަށް ކުޅޭ މެޗަށް ނެގި 28 ކުޅުންތެރިންގެ ސްކޮޑުގައި އަލީ އަޝްފާގު (ދަގަނޑޭ) ނުހިމެނީ އޭނާ އެގޮތަށް އެދިގެން ކަމަށް ގައުމީ ޓީމުގެ ކޯޗު އިޓަލީގެ ފްރެންޗެސްކޯ މޮރިއޭރޯ ބުނެފި އެވެ.

މާދަމާރޭ ނުވައެއް ޖަހާއިރު، ގަލޮޅު ދަނޑުގައި ބަންގްލަދޭޝާ ދެކޮޅަށް ކުޅޭ މެޗުގެ ކުރިން މިއަދު ބޭއްވި ނޫސްވެރިންގެ ބައްދަލުވުމުގައި މޮރިއޭރޯ ބުނީ ގިނަ ކުޅުންތެރިންތަކަކާ އޭނާ "ޗެޓް" ކުރާ ކަމަށާއި ކުޅުންތެރިންގެ ހާލަތު ވެސް އޮޅުންފިލުވާ ކަމަށެވެ.

"އަޝްފާގާ ބެހޭގޮތުން ބުނާނީ އޭނާ އަށް އަބަދު ވެސް ގައުމީ ޓީމުގެ ދޮރު ހުންނާނީ ހުޅުވިފައި. އޭނަ އަކީ ވަރަށް ވިސްނުންތޫނު ހުނަރުވެރި ކުޅުންތެރިއެއް. އަހަރެން އޭނާއާ ރޭ ވެސް ވާހަކަ ދެއްކިން،" މޮރިއޭރޯ ބުންޏެވެ.

"އަޝްފާގު، ބުނީ ތިއީ ރަނގަޅު ނިންމުމެކޭ. އަހަންނަށް މި ފަހަރު ޓީމަށް ގޮވާނުލުމަކީ. އެއީ މި ފަހަރު އަހަރެން މި ހުރީ އެންމެ ފިޓްކޮށެއް ނޫނޭ އެންމެ ބޭނުންވާ ވަރަށް. ގިނަ އެހެން ކުޅުންތެރިންތަކެއް މި ވަގުތު އެބަތިއްބޭ ފިޓްކޮށް،"

ސާފް ޗެމްޕިއަންޝިޕްގެ މެޗެއްގެ ތެރެއިން ދަގަނޑޭ.--- ފޮޓޯ: އާއިމް ޒަމީރު/ އަދަދު

މޮރިއޭރޯ ބުނީ ދަގަނޑޭ, 36, ޓީމުގެ ވަރަށް މުހިންމު ކުޅުންތެރިއެއް ކަމަށެވެ. ދަގަނޑޭ ނެތުމަކީ އޭނާ އެކަމާ އުފާކުރާ ކަމެއް ނޫން ކަމަށް ވެސް ވަނީ ބުނެފަ އެވެ.

"އަޝްފާގު ނެތުމަކީ އަހަރެން އެހެން ކުޅުންތެރިންނާ މެދު ހިތްހަމަނުޖެހުމެއް ނޫން. ހުރިހާ ކުޅުންތެރިންނާ މެދު ވެސް އަހަރެން ހިތްހަމަޖެހޭ އަޝްފާގުގެ ހަޔާތުގެ ވާހަކަތައް އެންމެނަށް ޗެސް ވަރަށް މުހިންމުވާނެ. އޭނާ އެހާ ވެސް މަޝްހޫރު. އެކަމަކު، މިދިޔަ މަސްތަކުގައި އޭނަ ނުއެއްކުޅޭ. އެހެންވީމަ ކޯޗެއްގެ ގޮތުގައި އަހަރެން އެބަޖެހޭ މިކަން ކަމަށް ވެސް ބަލަން،" ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާއާ ބެހޭގޮތުން މޮރިއޭރޯ ބުންޏެވެ.

ބަންގްލަދޭޝްގެ ނޫސްވެރިއަކު މިއަދުގެ ބައްދަލުވުމުގައި ގައުމީ ޓީމުގެ ކެޕްޓަން އަކުރަމް އަބްދުލް ގަނީ (އަކޫ) ގާތުގައި ކުރި ސުވާލަކީ ދަގަނޑޭ ނެތުމުން ޓީމަށް އަންނާނެ އުނިކަމަކީ ކޮބައިތޯ އެވެ.

"އަޝްފާގުގެ ރިޕްލޭސްމަންޓެއް ނެތް. އެ ޔަގީންކަމެއް. އެކަމަކު، އެބަތިބި ހުނަރުވެރި މޮޅު ކުޅުންތެރިން ހާއްސަކޮށް ޒުވާން ކުޅުންތެރިން ވެސް އެބަތިބި. ކޯޗު (މޮރިއޭރޯ) ބުނިހެން އަހަރެމެން މި ހުރިހާ ކުޅުންތެރިންނަށް ވެސް ފުރުސަތ ދޭން އެބަޖެހޭ މި ލިބޭ ފުރުސަތުތަކުގައި،" މޮރިއޭރޯ ބުންޏެވެ.

މި ފަަހަރުގެ ސީޒަނުގެ ޗެރިޓީ ޝީލްޑް މެޗުގައި ކްލަބް ވެެލެންސިއާ އަށް ދަގަނޑޭ ކުޅުނެވެ. އެކަމަކު، އޭގެ ފަހުން ޕްރެޒިޑެންޓްސް ކަޕާއި އުރީދޫ ދިވެހި ޕްރިމިއާ ލީގުގެ ފުރަތަމަ ބުރުގައި ދަގަނޑޭ ނުކުޅެ އެވެ. ދަގަނޑޭ އަށް ދިމާވެފައިވަނީ ކަކުލުގެ އަނިޔާގެ މައްސަލައެކެވެ.

ބަންގްލަދޭޝާއި ރާއްޖެ ކުޅޭ މެޗު ފަށާނީ މާދަމާރޭ ނުވައެއް ޖަހާއިރު އެވެ.