ސެންޓްރަލް ޒޯން އަންހެން ވޮލީބޯޅަ މުބާރާތުގައި މިއަދު ކުޅުނު މެޗުން ވަރުގަަދަ ސްރީ ލަންކާ އިން ރާއްޖޭގެ އަންހެން ވޮލީބޯޅަ ޓީމު އަތުން މޮޅުވެއްޖެ އެެވެ.

ފުރަތަމަ ސެޓުގައި ތަފާތު ހިތްވަރެއް ދެއްކި ރާއްޖޭގެ ޓީމު އަތުން ލަންކާ މޮޅުވީ ސީދާ ތިން ސެޓުންނެވެ. ލަންކާ އަކީ މި ފަހަރުގެ ސެންޓްރަލް ޒޯން މުބާރާތުގެ ފޭވަރިޓުންގެ ތެރެއިން ޓީމެކެވެ. ލަންކާ ވަނީ ފުރަތަމަ މެޗުން ނޭޕާލް އަތުން 3-2 ސެޓުން ބަލިވި ނަމަވެސް ދެން ކުޅުނު މެޗުތަކުގައި ކިރްގިސްތާނާއި ރާއްޖެ ބަލިކޮށްފަ އެވެ. ނޭޕާލް ވަނީ ފުރަތަމަ ތިން މެޗުން މޮޅުވެ، ފައިނަލުގެ ޖާގަ ކަށަވަރުކޮށްފަ އެވެ.

ލަންކާއާ ދެކޮޅަށް ފުރަތަމަ ސެޓުގައި ގައުމީ އަންހެން ޓީމުން ދެއްކި ކުޅުމަކީ މުބާރާތުގައި މިހާތަނަށް ޓީމުގެ ފަރާތުން ފެނުނު އެންމެ ހިތްވަރުގަދަ ކުޅުމެކެވެ. ކޯޗު މުމްތާޒް އަލީ (މުންތޭ) އިރުޝާދުގެ ދަށުން މެޗަކަށް ފަހު މެޗެއް ކުރިއެރުން ހޯދަމުން އަންނަ ގައުމީ އަންހެން ޓީމުން ލަންކާގެ ވަރުގަދަ ކުޅުންތެރިންނާ ދެކޮޅަށް ވަނީ ރަނގަޅު ފައިޓެއް ދީފަ އެވެ. ސެޓުގެ އެކި ހިސާބުތަކުގައި ރާއްޖޭގެ ޓީމުން ވަނީ ޑިފެންސް ވެސް ކޮށް، އެޓޭކްގައި ވެސް ތަފާތު ދައްކައިފަ އެވެ.

ރާއްޖޭގެ ޓީމުން އެންމެ ރަނގަޅު ކުޅުމެއް ދެއްކި ކުޅުންތެރިންނަށް ބަލާއިރު، ފުރަތަމަ ސެޓުގައި ޓީމުގެ އެޓޭކްގައި އައިމިނަތު އަރީޝާ (އަރީ) އާއި އައިމިނަތު ޝަހާ ޝާމިން އަދި އައިމިނަތު އަފާފް ނާޒިމް ވަނީ މޮޅަށް ކުޅެފަ އެވެ. އެކަމަކު، ސެޓުގެ ފަހު ކޮޅުގައި ތަޖުރިބާގެ ބޭނުންކޮށް، ލަންކާ އިން 25-17 އިން ސެޓު ގެންދިޔަ އެވެ.

ދެން ކުޅުނު ދެ ސެޓުގައި ލަންކާ އިން ކުޅުނީ ވަރަށް ބޮޑަށް ސަމާލުވެގެންނެވެ. ރާއްޖޭގެ ކުޅުންތެރިންނަށް ފުރަތަމަ ސެޓުގައި ކުޅެން ލިބުނު ޖާގަތަކަށް ބަލައި، ލަންކާ އިން ފަހު ދެ ސެޓުގައި އެ ޓީމުގެ އަސްލު ކުޅުން ދައްކަން މަސައްކަތްކުރި އެވެ.

ރާއްޖޭގެ ޓީމުން އެކުގައި ކުޅެފައިވާ މެޗު މަދުވުމުގެ މައްސަލަތައް ފަހު ދެ ސެޓުގެ އެކި ހިސާބުން ފެނިގެން ދިޔައިރު، ލަންކާ އިން އެ ޓީމުގެ މެޗު އެކްޕީރިއަންސް ރަނގަޅުވުމުގެ ބޭނުން ހިފައި ފަހު ދެ ސެޓު ގެންދިޔައީ 25-12 އާއި 25-14 އިންނެވެ.

އަންހެން ވޮލީ ޓީމަށް ބާކީ ދެން އޮތީ ކިރްގިސްތާން މެޗާއި ބަންގްލަދޭޝް މެޗެވެ. އެ ދެ ޓީމު އަތުން ރާއްޖޭން ވަނީ 2019 ވަނަ އަހަރުގެ ސެންޓްރަލް ޒޯން މުބާރާތުން މޮޅުވެފަ އެވެ. މި ފަހަރުގެ މުބާރާތުގައި ބަންގްލަދޭޝް ވަނީ ކިރްގިސްތާން، އުޒްބެކިސްތާން އަދި ނޭޕާލް އަތުން ބަލިވެފަ އެވެ.