ގައުމީ ޓީމެއް ގައުމުން ބޭރުގައި ކުޅޭ ބައިނަލްއަގުވާމީ މެޗަކުން ބަލިވެއްޖެނަމަ އެއް ބަޔެއްގެ ފަރާތުން އިވޭ އަޑަކީ ގައުމުގެ ޓެކްސް ފައިސާ އިސްރާފުކުރުމުގެ ވާހަކަ އެވެ. ގައުމީ ޓީމެއް މެޗަކުން މޮޅުވެއްޖެނަަަމަ ކުރިން ދެއްކި ޓެކްސް ފައިސާގެ ވާހަކަ ހަނދާނެއް ނުހުރެ އެވެ. ގައުމީ ޓީމު މެޗަކުން މޮޅުވެއްޖެނަމަ ނޫނީ ބޮޑު ކާމިޔާބެއް ލިބިއްޖެނަމަ ގިނަ ބަޔަކު އެ ޓީމަކަށް ތައުރީފުގެ ބަސްތައް އޮއްސާލަނީ ކުރިން ކިޔަމުން އައި ފާޑުކިޔުންތައް އެއްބުރުން ހަނދާނުން ފޮހެލައިފަ އެވެ. މިއީ ކުޅިވަރުގެ މި ވަގުތުގެ ހާލަތަށް ބަލާއިރު، އާންމުކޮށް ފެންނަ މަންޒަރުތަކެވެ.

އެ ފަދަ މާހައުލެއްގައި ދިވެހި ކުޅިވަރު ދުވަސްތައް ގުނަމުން އަންނަނިކޮށް، ގައުމީ ޓީމެއް ބައިނަލްއަގުވާމީ މުބާރާތެއްގައި ރާއްޖެ ތަމްސީލުކުރަން ވާންޖެހޭ ގުރުބާނީގެ މުޅިން އާ ކަމެއް ގައުމީ ފިރިހެން ވޮލީ ޓީމުން އިއްޔެ މި ވަނީ ތަހައްމަލުކޮށް، މެޗެއް ކުޅެފަ އެވެ. މިއީ އާންމުންނަށް އެނގެން ޖެހޭ ކަމެކެވެ. ސާފުވެފައި އޮންނަން ޖެހޭނެ ވެސް ކަމެކެވެ.

ބަންގްލަދޭޝްގައި މިހާރު ކުރިއަށްދާ ސެންޓްރަލް ޒޯން ވޮލީބޯޅަ މުބާރާތުގައި އިއްޔެ ހަވީރު ގައުމީ ފިރިހެން ޓީމު ބަންގްލަދޭޝް އަތުން ސީދާ ތިން ސެޓުން ބަލިވިއިރު، މެޗުގެ ސެޓުތައް ދިޔައީ 14-25، 19-25 އަދި 22-25 އިންނެވެ. މި މެޗުގެ ނަތީޖާ އިން ފެންނަނީ ރާއްޖެ ބަލިވީ ކަމުގަ އެވެ. އަސްލު މަންޒަރު ސިފަވާނީ ތަންކޮޅެއް ފުނަށް ބަލައި ހޯދުމުންނެވެ.

އިއްޔެ ފިރިހެން ވޮލީ ޓީމުން ކުޅުނު ބަންގްލަދޭޝް މެޗުގެ ކުރިން މި ވޭތުވެދިޔަ ހަފްތާއެއްހާ މުއްދަތުގެ ތެރޭގައި ހިނގާދިޔަ ކަންތައްތަކަށް ބަލާއިރު، އިއްޔެގެ. މެޗު ކުޅުމަކީ ވެސް ގައުމީ ފިރިހެން ވޮލީ ޓީމަށް ކާމިޔާބެއްގެ ގޮތުގައި ޓީމުގެ ކޯޗު މުހައްމަދު ސާޖިދު (ކާއްޓޭ) ފާހަގަކުރަނީ ސަބަބުތަކެއް ނެތިއެއް ނޫނެވެ. އެ ވާހަކަތަކަށް ފުންކޮށް ވިސްނައިލުން މުހިއްމެވެ.

ރަނގަޅު ތައްޔާރީގެ ހުރަހަކަށްވީ އުނދަގޫ ދަތުރެއް

ކޮވިޑް-19ގެ ސަބަބުން ގައުމީ ވޮލީ ޓީމުތަކުގެ ހަރަކާތްތައް މިދިޔަ ދެ އަހަރެއްހާ ދުވަސް ވަންދެން އޮތީ މެދުކެނޑިފަ އެވެ. ސެންޓްރަލް ޒޯން މުބާރާތް އޮންނަކަން އެނގުނުހާ އަވަހަކަށް ގައުމީ ޓީމުތަކުގެ ޕްރެކްޓިސް ފެށި އެވެ. ލިބުނީ ދޮޅު މަހެއްހާ ދުވަހުގެ މުއްދަތެއްގެ ޕްރެކްޓިހެވެ. އެކަމަކު، ސަރުކާރާއި ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ އެހީގައި ފިރިހެން ވޮލީ ޓީމުން ވަނީ މާލޭގައި ހަ މެޗެއް ކުޅެފަ އެވެ.

ފިރިހެން ވޮލީ ޓީމުން މާލޭގައި ކުޅުނު ފުރަތަމަ ތިން މެޗުން ސްރީ ލަންކާ ޓީމު އަތުން ވީ ބައްޔެވެ. އެކަމަކު، ދެން ކުޅުނު ތިން މެޗުގައި އިންޑިއާގެ ހައިދަރުއާބާދު ސްޕައިކާސް އަތުން ވަނީ މޮޅުވެފަ އެވެ. ހައިދަރުއާބާދު ތިން މެޗު ކުޅުނީ ޓްރެއިނިން ކޭމްޕެއް ގައުމުން ބޭރުގައި ފުރިހަމަކުރަން ކުރި މަސައްކަތުގައި އަލި މަގެއް ނުފެނިގެންނެވެ.

ހައިދަރުއާބާދު އަތުން މިދިޔަ ހަފްތާގެ ހޮނިހިރު ދުވަހު ތިން ސެޓުން މޮޅުވި މެޗަކީ ސެންޓްރަލް ޒޯން މި ފަހަރުގެ މުބާރާތުގެ ކުރިން ގައުމީ ފިރިހެން ޓީމު ކުޅުނު ފަހު މެޗެވެ. ބޯޅައިގައި އަތްލަން ލިބުނު ފަހު ފުރުސަތެވެ. އޭގެ ފަހުން ޕްރެކްޓިހެއް ކުރެވޭ ގޮތެއްނުވީ ދިމާވި ކަންތައްތަކެއްގެ ސަބަބުންނެވެ.

ގައުމީ ޓީމުގެ ކޯޗު މުހައްމަދު ސާޖިދު (ކާއްޓޭ).-- ފޮޓޯ: މުހައްމަދު ޝާބިން/ އަދަދު

"އަޅުގަނޑުމެން މާލޭގައި މެޗުތައް ކުޅެފައި ޓީމު އޮތީ ވަރަށް ފޯމުގައި. އެ ފޯމުގައި އަނެއް ދުވަހު ފުރައިގެން މި މުބާރާތަށް އަންނަން އޮތީ. އެހެން ނަމަވެސް ދިމާވި ވަރަށް ހިތާމަވެރި ކަންތައްތަކަކާ ހެދި މިއަދު (އިއްޔެ) މިތަނަށް އައިސް މި ތިބީ ވަރަށް އުނދަގޫ ހާލަތެއްގައި،" އިއްޔެ ބަންގްލަދޭޝާ ދެކޮޅަށް ކުޅުނު މެޗަށް ފަހު ދިން އިންޓަވިއުއެެއްގައި ކާއްޓޭ ބުންޏެވެ.

ހައިދަރުއާބާދު ސްޕައިކާސް އަތުން މި މަހު 18 ވަނަ ދުވަހު ކުޅުނު މެޗަށް ފަހު ފިރިހެން ވޮލީ ޓީމު މިދިޔަ އާދިއްތަ ދުވަހު ބަންގްލަދޭޝަށް އަންނަ ގޮތަށް އޮތީ ހަމަޖެހިފަ އެވެ. އެކަމަކު، ނުފުރޭގޮތްވީ ޓީމުގައި ކޮވިޑްގެ ކޭސްތަކެއް ފާހަގަ ކުރެވުމުންނެވެ. ޑައިރެކްޓް ކޮންޓެކްޓްގެ މައްސަލަތަކެއް ވެސް ހުރުމުން ކަމަށް ބުނާތީ އެވެ. ތަކުރާރުކޮށް ޓެސްޓްތަކެއްކޮށް، ގައުމީ ޓީމަށް އެންމެ ފުރަތަމަ ފުރޭގޮތްވީ އަންގާރަ ދުވަހު އެވެ.

އެކަމަކު، އަންގާރަ ދުވަހު ހުރިހާ ކުޅުންތެރިންގެ ނެގެޓިވް ޕީސީއާރް ޓެސްޓްތަކެއް ހިފައިގެން ފުރަން އެއާޕޯޓަށް ގޮސް ޗެކިން ކައުންޓަރާ ހަމައަށް ވެސް ގޮސްފައި އަނބުރާ ދާން ޖެހުނީ ގެޔަށެވެ. ޓީމުގައި ކޮވިޑްގެ ކަންކަން އެބަހުރި ކަމަށް ބުނެ، ކޮންމެ ވެސް ބައެއް ކުރި "ޝަކުވާ" ތަކެއްގެ ސަބަބުން ޓީމަށް ޖެހުނީ މާލޭގައި މަޑުކުރާށެވެ.

ކަމާބެހޭ ފަރާތްތަކާ މަޝްވަރާ ކޮށްގެން ވީއޭއެމާއި ޓީމުގެ އޮފިޝަލުން ކުރި މަސައްކަތުން ފިރިހެން ވޮލީ ޓީމަށް މިދިޔަ ދެ ދުވަހުން އެކި ގޮތްގޮތުން ވަނީ ބަންގްލަދޭޝަށް އާދެވިފަ އެވެ. ކޮވިޑްގެ ސަބަބުން ނާދެވުނީ ސެޓަރު، ހުސެއިން ވިޝާމް (ބުޅިކެ) އާއި ލިބަރޯ، މުހައްމަދު ނައީމް (ނައިންޓެ) އަށެވެ. އެހެން ކުޅުންތެރިންނާއި އޮފިޝަލުން އަންނަން ވެސް ކުރީ އުނދަގޫ ދަތުރެކެވެ.

"އަޅުގަނޑުމެންގެ އެއްބަޔަކު، ތިން ކުދިން އެއް ބޯޓެއްގައި، ހަތަރު ކުދިން އެއް ބޯޓެއްގައި ގަތަރު މަގުންނާއި ލަންކާ މަގުންނާއި އެކި ގޮތްގޮތުން މި ތިބީ މި ކޮޅަށް (ބަންގްލަދޭޝަށް) އައިސްފައި. މިއަދު (އިއްޔެ) އަޅުގަނޑު މިތަނަށް އައިސް މި ހުރީ ވެސް އަޅުގަނޑާ ހުޒާމާ ކުޅެން އައި ގަޑީގައި ޓީމަށް ޖޮއިން މި ކުރީ. އަޅުގަނޑުމެން ވެސް ނުނިދާ ހުންނަތާ 24 ގަޑިއިރު މި ވީ،" އިއްޔެ ހެނދުނު ބަންގްލަދޭޝަށް އައިސް ހޮޓަލުގައި ދޮޅު ގަޑިއިރު މަޑުކޮށްފައި މެޗަށް އަންނަން ޖެހުމަށް އިޝާރާތްކޮށް ކާއްޓޭ ބުންޏެވެ.

"ހުޒާމް ވެސް ކުޅުނީ ރޭވެސް އެއްވެސް ވަަރަކަށް ނުނިދައި ހުރެ. ދެން ބާކީ ތިބި ކުދިން މެޗު ފަށައިގެން މެޗުގެ މެދުތެެރެއިން އައިސް ޓީމަށް ޖޮއިން އެ ކުރީ. އެހެންވީމަ އެކުދިންނަށް ވެސް (މި މެޗުގައި) ކުޅޭކަށް ފުރުސަތެއް ނުލިބުނު،"

ފިރިހެން ވޮލީ ޓީމުގެ ސްކޮޑު ފައިނަލްކުރިއިރު، ޓީމުގައި ހިމެނީ އެންމެ ލިބަރޯ އެކެވެ. އެއީ ނައިންޓެ އެވެ. އެކަމަކު، ކޮވިޑް-19ގެ ސަބަބުން ނައިންޓެ އަށް ދަތުރުނުކުރެވޭތީ އެންމެ ފުރަތަމަ 12 ކުޅުންތެރިންގެ ސްކޮޑު ފައިނަލްކުރިއިރު، ބާކީވި ލިބަރޯ ޖަވާމް އަލީ އަލުން ޓީމަށް ނެގި އެވެ.

ޓީމުގެ ބައެެއް ކުޅުންތެރިންނާއި ތިން އޮފިޝަލުންނާ އެކު އިއްޔެ މެންދުރު ބަންގްލަދޭޝަށް ޖަވާމަށް އާދެވުނު ނަމަވެސް މެޗު ފަށަން ވާއިރަށް ސްޓޭޑިއަމަށް ނާދެވުމުން އޭނާ އަށް މެޗުގައި ނުކުޅެވުނެވެ. އެހެންވެ، އިއްޔެގެ މެޗުގައި ރާއްޖޭގެ ޓީމުން ކުރަން ޖެހުނީ ކޯޓު މަތީގައި ވެސް އާ ތަޖުރިބާ އެކެވެ. ޕްރެކްޓިސް ވެސް ނުކުރާ ގޮތަކަށް، ލިބަރޯ އެއް ނެތި ކުޅެން ޖެހުނީ އެެވެ.

"ލިބަރޯ އަކީ އަސްލު ވަރަށް މުހިއްމު މީހެއް މި ވޮލީ ކުޅޭއިރު، އެހެންވީމަ ލިބަރޯ އެއް ނުލައި މި ކުޅުނީ ދެ ސެންޓަ ބަހައްޓައިގެން ކޯޓުގައި. އެއީ އެ ކުޅުންތެރިންނަށް ވެސް ޗެލެންޖެއް. އަޅުގަނޑުމެންނަށް ވަރަށް ބޮޑު ޗެލެންޖެއް. (ލިބަރޯ ނެތިގެން) ނުފައިބައި މި ކަހަލަ އިންޓަނޭޝަނަލް މެޗެއް އެ ކުޅުނީ ސެންޓަ ދެ މީހުން އެހެން ތިބެގެން،" ލިބަރޯ އެއް ނުލައި ކުޅެން ޖެހުމުން އެކަމަށް އިޝާރާތްކޮށް ކާއްޓޭ ބުންޏެވެ.

ކާއްޓޭ ބުނީ މިދިޔަ ހަތް ވަރަކަށް ދުވަހު ގައުމީ ޓީމުގެ އެއްވެސް ކުޅުންތެރިއަކު ވޮލީބޯޅައެއްގައި އަތް ވެސް ނުލައި ހުރެފައި ކުއްލިއަކަށް ކޯޓަށް ނުކުމެ، އިންޓަނޭޝަނަލް މެޗެއް ކުޅެން ކުޅުންތެރިންނަށް ފަސޭހަނުވާނެ ކަމަށެވެ.

"މި މާހައުލާއި މި ތަނުގައި ހުރި ފިނިހޫނުމިނާއި ކުއްލިއަކަށް އެޖަސްޓްވާން ވަގުތު ނަގާނެ. ފެންނާނެ ސެޓަކަށް ފަހު ސެޓެއް ރާއްޖެ ޓީމު އައީ ރަނގަޅަށް ކުޅެމުން. އައިސް އެންމެ ފަހު ސެޓުގައި ބަންގްލަދޭޝް ޕްރެޝަރަށް އެ ދިޔައީ. އެހެންވީމަ އެބަ އެނގޭ. އަޅުގަނޑުމެން އެ ފޯމުގައި ތިބެފައި ދިމާވި ކަންތައްތަކުގެ ސަބަބުން މި އޮތީ ޓީމަށް އަސަރު ކޮށްފައިކަން،" ކާއްޓޭ ބުންޏެވެ.

"މިއީ މި ދިދަ އަށް ޓަކައިވީ ގުރުބާނީއެއް"

ގައުމީ ފިރިހެން ވޮލީ ޓީމު ނުލައި ވެސް ސެންޓްރަލް ޒޯން މި ފަހަރުގެ މުބާރާތުގެ ޝެޑިއުލެއް އާންމުވި އެވެ. އެކަމަކު، ކެނޑިނޭޅި އެކި ފަރާތްތަކުން ކުރި ބުރަ މަސައްކަތުން ޓީމަށް ވަނީ މުބާރާތުގައި ކުޅެން ފުރުސަތު ލިބިފަ އެވެ. ކިތަންމެ އުނދަގޫ ހާލަތެއް ކުރިމަތިވެފައި އޮއްވައި ވެސް ގައުމީ ފިރިހެން ވޮލީ ޓީމުގެ އަޒުމަކަށްވީ މުބާރާތުގައި ބައިވެރިވެފައި އޮތުމާއި ހުރި ގޮންޖެހުންތަކުގެ ތެރެއިން ވެސް މުބާރާތުގައި ކުޅެން އައުމެވެ.

"ވަރަށް ހިތާމަވެރި ގޮތެއް މިވީ. އަޅުގަނޑުމެން ކުދިން، މުޅި ޓީމުގެ ވެސް އުއްމީދަކަށްވީ މި މުބާރާތުގައި ބައިވެރިވެފައި އޮތީމަ ކޮންމެ ވެސް ގޮތެއްގައި ހަ ކުޅުންތެރިން ހަމަކޮށްގެން އައިސް ވެސް މި މެޗު (ބަންގްލަދޭޝް މެޗު) ކުޅެން. ﷲ އިރާދަކުރެއްވިއްޔާ އެކަން މިއަދު (އިއްޔެ) ކުރެވިއްޖެ،" ކާއްޓޭ ބުންޏެވެ.

"އަސްލު މި ދިދަ އަށް ޓަކައި މި ހުރިހާ ގުރުބާނީއެއް މިވީ. އެހެން ނޫންނަމަ މިހާ ބުރަ މަސައްކަތެއް ކޮށްފައި ނާންނާނެ ދެއްތޯ މިތަނަކަށް. އަޅުގަނޑުމެން މި އައީ ގައުމު ދެކެ ލޯބިވާތީ ގައުމަށް ޓަކައި އައިސް ހުރިހާ ކުދިން ވެސް މި މަަސައްކަތް ކުރީ،"

ކާއްޓޭ ބުނީ މި މުބާރާތުގައި ކުޅެން އަންނަން ކުޅުންތެރިންނާއި އޮފިޝަލުން ކުރި މަސައްކަތް ހެޔޮހިތުން ފާހަގަކުރާ ކަމަށާއި ވަރަށް ބޮޑަށް ޝުކުރު އަދާކުރާ ކަމަށެވެ. ކުޅުންތެރިން ތައްޔާރީ ހާލަތުގައި ކޮންމެ ވަގުތެއްގައި ވެސް ބަންގްލަދޭޝަށް ފުރަން ޖެހިދާނެކަން ދަނެގެން މި ވޭތުވެދިޔަ ހަތަރެއް ނޫނީ ފަސް ދުވަހު ތިބީ "ނުނިދާ ހޭލައި" ކަން ކާއްޓޭ ފާހަގަކުރި އެވެ.

"އަލްހަމްދުލިއްލާހި ވަރަށް ބޮޑު ކާމިޔާބެއް މިއަދު މި މެޗަށް އައިސް ކުޅެލުމަކީ ވެސް،" ކާއްޓޭ ބުންޏެވެ.

ގައުމީ ފިރިހެން ވޮލީ ޓީމުން ދެ ވަނަ މެޗުގައި މިއަދު ހަވީރު އުޒްބެކިސްތާނާ ބައްދަލުކުރާނެ އެވެ. އިއްޔެ ނުކުޅެވުނު ކުޅުންތެރިންނާ އެކު މިއަދު ގައުމީ ޓީމުން ކުރިއަށް ވުރެ ވަރުގަދަ ރޫހެއްގައި މެޗަށް ނުކުންނާނެ އެވެ.