ސަރުކާރުން ހިންގާ ސޯޝަލް ހައުސިން ސްކީމްތަކުގެ ދަށުން ލިބިފައިވާ ފްލެޓްތަކުގެ ފިނިޝިންއަށާއި މަރާމާތަށް ބީއެމްއެލް އިސްލާމިކްއިން ދޫކުރާ ހޯމް އިމްޕްރޫވްމަންޓް ފައިނޭންސިން އިން ނަގުދު ފައިސާ ވެސް ލިބޭނެ ކަމަށް އެ ބޭންކުން ބުނެފި އެވެ.

ބީއެމްއެލް އިސްލާމިކް ހޯމް އިމްޕްރޫވަމަންޓް ފައިނޭންސިން އަކީ ރަހުނަކާ ނުލާ، 150،000ރ. އާ ހަމަަޔަށް ފައިނޭންސިން ލިބޭ ފެސިލިޓީއެކެވެ. މާލެ އާއި އަތޮޅުތެރެއިން ސޯޝަލް ހައުސިން ލިބުނު މީހުންނަށް ވެސް ބައިވެރިވެވޭ މި ފެސިލިޓީ ނަގާ މީހުންނަށް ފައިސާ އަނބުރާ ދައްކަން ފަސް އަހަރުގެ މުއްދަތެއް ލިބޭނެ އެވެ.

މީގެ އިތުރުން އިސްލާމިކް ފައިނޭންސްގެ އުސޫލުތަކުގެ ދަށުން ފެސިލިޓީގެ މުއްދަތުގެ ކުރިން އަވަހަށް ފައިސާ ދައްކައި ހަލާސްކުރުމުގެ ފުރުސަތު ކަސްޓަމަރުންނަށް ލިބޭނެ އެވެ. އަދި އަވަހަށް ފައިސާ ދައްކާ ހަލާސް ކުރާނަމަ ބޭންކުގައި ކަނޑައެޅިފައިވާ އުސޫލުތަކާއި އެއްގޮތަށް ޑިސްކައުންޓް ލިބޭނެ ކަމަށް ބީއެމްއެލް އިސްލާމިކްއިން މައުލޫމާތު ދެ އެވެ.

މި ފެސިލިޓީ ކުރިން އޮތް ގޮތުން، ލިބެނީ ހަމައެކަނި މުދަލެވެ. އެކަމަކު ފެސިލިޓީގެ ތެރެއިން ނަގުދު ފައިސާ ލިބޭ ގޮތަށް ހަމަޖެހުމާއެކު، ބީއެމްއެލްގެ ކަސްޓަމަރުންނަށް މިވަނީ ފްލެޓު ނޫނީ އެޕާޓްމަންޓުގެ މަސައްކަތްތައް ނިންމަން އިތުރު ފަސޭހަތަކެއް ލިބިފަ އެވެ.

"އިސްލާމިކް ހޯމް އިމްޕްރޫވްމަންޓް ފައިނޭންސިންގެ ދަށުން އަމިއްލަ އަށް އެއްވެސް ހަރަދެއް ކުރަން ނުޖެހި މުދަލާއި ނަގުދު ފައިސާ ވެސް ލިބޭނެ. ހަމައެއާއެކު ފްލެޓް ނުވަތަ އެޕާޓްމަންޓްގެ ވެރިފަރާތާއެކު އިތުރު ފަރާތެއް ފައިނޭންސިންގައި ބައިވެރިކުރަން ބޭނުންނަމަ އެ ފުރުސަތުވެސް ކަސްޓަމަރުންނަށް މިވަނީ ހުޅުވާލެވިފަ." ބީއެމްއެލް އިސްލާމިކް ޑިވިޝަންގެ އިންޓެރިމް އިންޗާޖް ހަސަން ކަލާމް ވިދާޅުވި އެވެ.

ބީއެމްއެލް އިސްލާމިކް ހޯމް އިމްޕްރޫވަމަންޓް ފެސިލިޓީއަށް އެދި، އެޕްލިކޭޝަން ފޯމު ފުރިހަމަ ކުރުމަށްފަހު މާލޭންނަމަ ހުށަހަޅާނީ ބީއެމްއެލް އިސްލާމިކް މާލެ ބްރާންޗަށެވެ. އަދި މާލެ ފިޔަވައި ރާއްޖޭގެ އެހެން ސަރަހައްދެއް ނަމަ ބީއެމްއެލްގެ ކޮންމެ ބްރާންޗަކަށް ވެސް ފޯމު ހުށަހެޅޭނެ އެވެ.