މެޑްރިޑް (ސެޕްޓެމްބަރު 21) - ސްޕެނިޝް ލީގުގައި މިރޭ ލުއިސް ސުއަރޭޒްގެ ދެ ގޯލާ އެކު ފަހަތުން އަރައި 2-1 އިން ގެޓަފޭ ބަލިކޮށް އެންމެ ފަހުގެ ޗެމްޕިއަން އެތުލެޓިކޯ މެޑްރިޑް ލީގުގެ އެއް ވަނަ އަށް ޖެހިލައިފި އެވެ.

އެތުލެޓިކޯ އެއް ވަނަ އަށް އެރީ ހަ މެޗުން 14 ޕޮއިންޓާ އެކު އެވެ. ދެ ވަނައިގައި އޮތް ރެއާލް މެޑްރިޑަށް ފަސް މެޗުން ވަނީ 13 ޕޮއިންޓް ލިބިފަ އެވެ. މާދަމާރޭ ރެޔާލް މަޔޯކާ އަތުން މޮޅުވެގެން ރެއާލަށް އަލުން އެއް ވަނަ އަށް އެރޭނެ އެވެ.

ގެޓަފޭ ދަނޑުގައި މިރޭ ކުޅުނު މެޗުގެ 45 ވަނަ މިނިޓްގައި އެ ޓީމަށް ލީޑުނަގައިދިނީ ފަހަތަށް ކުޅޭ ސްޓެފަން މިޓްރޮވިޗް އެވެ. އޭނާ މި ގޯލު ޖެހީ ބޮލުންނެވެ. އޭގެ ފަހުން އެތުލެޓިކޯ އަށް އެއްވަރުކޮށްދޭން ސުއަރޭޒާއި އެންޓޮއިން ގްރީޒްމަން އަށް ލިބުނު ފުރުސަތުތަކުން ގޯލަށް ބޯޅަ ޖެހޭގޮތެއްނުވި އެވެ.

ގެޓަފޭ އަށް މި މެޗުގައި މައްސަލަ ދިމާވީ މެޗުގެ 74 ވަނަ މިނިޓްގަ އެވެ. އެ ޓީމުގެ އަލޭނާ އަށް ދެ ވަނަ ރީނދޫ ކާޑާ އެކު ރަތް ކާޑެއް ދެއްކުމުން ގެޓަފޭ ޕްރެޝަރަށް ވެއްޓުނެވެ. ގެޓަފޭގެ ކުޅުންތެރިއަކު މަދުވިތާ ހަަތަރު މިނިޓް ތެރޭ މާރިއޯ ހާމޯސޯ ނަގައިދިން ބޯޅައަކުން ސުއަރޭޒް ވަނީ ލަނޑު ޖަަހައި އެތުލެޓިކޯ އަށް އެއްވަރުކޮށްދީފަ އެވެ. ސުއަރޭޒް އެތުލެޓިކޯ މޮޅުކޮށްދިން ގޯލު ޖެހީ މެޗުގެ އިތުރު ވަގުތުގަ އެވެ. ސީމް ވިސާއިކޯ ދިން ބޯޅަ ސުއަރޭޒް ވަނީ ހަމަޖެހިލާފައި ގޯލުގެ ތެރެއަށް ފޮނުވާލައިފަ އެވެ.

ސުއަރޭޒް ވަނީ ލީގުގައި މިހާތަނަށް އެތުލެޓިކޯގެ ފުރަތަމަ އެގާރައިގައި ހިމެނިގެން ކުޅުނު ތިން މެޗުގައި ތިން ގޯލު ޖަހައިފަ އެވެ. އަލުން އެތުލެޓިކޯ އަށް ބަދަލުވި ގްރީޒްމަން އަށް އަދިވެސް އެ ޓީމަށް ގޯލެއް ޖަހައިދެވޭ ގޮތެއް ނުވެ އެވެ.

އެތުލެޓިކޯގެ ކޯޗު ޑިއޭގޯ ސިމިއޯނީ ބުނީ ފުރަަތަމަ ހާފު ދިޔައީ ވަރަށް ދަށްކޮށް ކަމަށާއި ދެ ވަަނަ ހާފްގައި އެތުލެޓިކޯ އިން ރަނގަޅަށް ކުޅެ ނަތީޖާ ނެރެވޭވަރަށް މަސައްކަތް ކުރި ކަމަށެވެ. މެޗުގެ ނަތީޖާ އެނބުރުނީ ހަަމައެކަނި ރަތް ކާޑުގެ ސަބަބުން ކަމަށް ބުނުމަކީ އެންމެ ރަނގަޅު ގޮތަށް ނުވާނެ ކަމަށް ސިމިއޯނީ ވަނީ ބުނެފަ އެވެ.