ބެންގަލޫރު (20 ސެޕްޓެމްބަރު) - މިހާރު ކުރިއަށްދާ އިންޑިއަން ޕްރިމިއާ ލީގު (އައިޕީއެލް)ގެ ސީޒަނަށް ފަހު، ރޯޔަލް ޗެލެންޖާސް ބެންގަލޯގެ (އާރްސީބީ)ގެ ކެޕްޓަންކަމުން ވަކިވާނެ ކަމަށް މަޝްހޫރު ބެޓްސްމަން ވިރާތު ކޯލީ ބުނެފި އެވެ.

އާރްސީބީގެ ކެޕްޓަންކަމުން ވަކިވާން ވިރާތު ނިންމިއިރު، އޭނާ ވަނީ މީގެ އިންޑިއާގެ ޓީ20 ޓީމުގެ ކެޕްޓަންކަމުން ވެސް ވަކިވާނެ ކަމަށް ބުނެފަ އެވެ. އިންޑިއާގެ ޓީ20 ކެޕްޓަންކަމުން ކޯލީ ވަކިވާނީ އަންނަ މަހު ފެށުމަށް ހަމަޖެހިފައިވާ ޓީ20 ވޯލްޑް ކަޕަށް ފަހު އެވެ.

އާރްސީބީގެ ކެޕްޓަންކަމުން ވިރާތު ވަކިވާނީ މިހާރު ކުރިއަށްދާ އައިޕީއެލްގެ ސީޒަން ނިމުމުންނެވެ. އައިޕީއެލް އަލުން ފެށީ އާދިއްތަ ދުވަހު އެވެ. އިންޑިއާގެ ކޮވިޑް ހާލަތު ގޯސްވާތީ އައިޕީއެލް ހުއްޓާލީ މިދިޔަ މެއި މަހުގެ ތެރޭގަ އެވެ

އާރްސީބީ އާއި އިންޑިއާގެ ޓީ20 ޓީމުގެ ކެޕްޓަންކަމުން ވަކިވިޔަސް، އިންޑިއާގެ ވަންޑޭ އަދި ޓެސްޓް ޓީމުގެ ކެޕްޓަންގެ ގޮތުގައި ވިރާތު ދެމިހުންނާނެ އެވެ.

އިންޑިއާގެ އެންމެ މަގްބޫލު އެއް ކުޅުންތެރިޔާ ކަމަށްވާ ވިރާތު ،32، އާރްސީބީއާ ގުޅުނީ 2008 ވަނަ އަހަރެވެ. އަދި އޭނާ އަށް ކެޕްޓަންކަން ދިނީ 2013 ވަނަ އަހަރެވެ. އައިޕީއެލްގައި އާރްސީބީ ނޫން އެހެން ޓީމަކަށް ވިރާތު ނުކުޅެ އެވެ. -- ބީބީސީ