ގަޑާންސްކް، ޕޮލެންޑް (މެއި 27) - ޔޫރޮޕާ ލީގުގެ ފައިނަލުގައި ރޭ މެންޗެސްޓާ ޔުނައިޓެޑް ބަލިކޮށް ވިޔަރެއާލަށް މުބާރާތުގެ ތާރީހީ ކާމީޔާބީ ހޯދައިދިން މެޗަށް ފަހު އެ ޓީމުގެ ކޯޗު އުނާއި އެމެރީ އޭނާގެ ކުރީގެ ކްލަބަށް އާސެނަލަށް ޝުކުރު އަދާކޮށްފި އެވެ.

ރޭ ވިޔަރެެއާލާއި ޔުނައިޓެޑް ބައްދަލުކުރި މެޗުގެ ފުރިހަމަ ވަގުތާއި އިތުރު ވަގުތުގެ ދެ ހާފް ކުޅުން ނިމުނުއިރު، އޮތީ 1-1 އިން އެއްވަރުވެފަ އެވެ. ވިޔަރެއާލް މޮޅުވީ ޕެނަލްޓީ ޖަހައިގެން 10-11 އިންނެވެ.

ސެވިއްޔާ ގޮވައިގެން ޖެހިޖެހިގެން ތިން ފަހަރު ޔޫރޮޕާ ލީގު ހޯދި އެމެރީ، ވިޔަރެއާލަށް ފުރަތަމަ ފަހަރަށް ޔޫރޮޕާ ލީގު ކާމިޔާބު ކޮށްދިނީ މުޅި މުބާރާތުގައި އެއްވެސް މެޗަކުން ބަލިނުވެ އެވެ. ޔޫރޮޕާ ލީގުގެ ފައިނަލުގައި މިހާތަނަށް އެމެރީ ބަލިވީ އެންމެ ފަހަރަކު އެވެ. އެއީ 2019 ވަނަ އަހަރު އާސެނަލް ގޮވައިގެން ކުޅުނު ފައިނަލްގަ އެވެ. އެ ފަހަރު އާސެނަލް ބަލިވީ ޗެލްސީ އަތުންނެވެ.

އާސެނަލާ އެކު ޔޫރޮޕާ ލީގު ފައިނަލުން ބަލިވިތާ ހަ މަސް ތެރޭ އެ ޓީމުގެ ކޯޗުކަން އެމެރީ އަށް ގެއްލުނެވެ. އެމެރީ އަކީ ބާވީސް އަހަރަށް ފަހު އާސެނަލްގެ ކޯޗުކަމުން އާސެން ވެންގާ ވަކިވުމުން ބަދަލުގައި ގެނައި ކޯޗެވެ. އެމެރީ ވިޔަރެއާލާ ހަވާލުވީ މިދިޔަ އަހަރުގެ ޖުލައި މަހު އެވެ.

އެމެރީ ބުނީ އާސެނަލަށް ހާއްސަ ޝުކުރެއް އަދާކުރާ ކަމަށާއި އެއީ އެ ޓީމުގައި ހޭދަކުރި ދުވަސްތަކުގަޔާއި ވަކިވުމަށް ފަހު ކޯޗެއްގެ ގޮތުގައި ޑިވެލޮޕްވާން ކަންތައްތަކެއް ދަސްވި ކަމަށެވެ. އެމެރީ މި ފަހަރުގެ ޔޫރޮޕާ ލީގުގެ ފައިނަލުން ވިޔަރެއާލަށް ފުރުސަތު ހޯދައިިދިނީ ސެމީގައި އާސެނަލް ކަޓުވާލުމަށް ފަހު އެވެ.

"ކުޅިވަރުގައި އެހާ ބޮޑަށް ބަދަލުހިފުމުގެ ރޫހެއް ނޯންނާނެ. އަހަރެން ފުޓްބޯޅައިގެ ކޮންމެ ނަތީޖާ އަކުން ވެސް ބަލަނީ ރަނގަޅު ފަޅިއަށް. ކޮންމެ ތަނެއްގައި ވެސް އަހަރެން ބަލަނީ ފުޓްބޯޅައިގެ ތަފާތު ކަންތައްތަކެއް ދަސްކުރަން. ތެދެއް. އާސެނަލް ގޮވައިގެން އަހަރެން ޔޫރޮޕާ ލީގު ފައިނަލުން ބަލިވީ. އެކަމަކު އެއީ ނާކާމިޔާބީ އަކަށް ވުރެ ބޮޑަށް މި ފައިނަލުން މޮޅުވާން ދަސްވި ކަމެއް ނޫނީ ހުޅުވުނު ދޮރެއް ކަމަށް ބަލަނީ،" އެމެރީ ބުންޏެވެ.

ކުރިން ޕީއެސްޖީ އަށް ވެސް ކޯޗުކޮށްދިން އެމެރީ ބުނީ ހަގީގަތުގައި އާސެނަލުން ވަކިވެ، ވިޔަރެއާލްގެ ހުށަހެޅުން ލިބުމާ ހަމައަށް ހޭދަކުރި މުއްދަތުގައި ވަރަށް ރަނގަޅަށް އާ ޕްރޮޖެކްޓެއްގައި ކުރިއަށްދާން ތައްޔާރުވެވުނު ކަމަށެވެ.

އެމެރީ ބުނީ އޭނާގެ ކާމިޔާބީގެ އެންމެ ބޮޑު ހިއްސާއެއް އަބަދުވެސް އޮންނާނީ ކުޅުންތެރިންނާ ގުޅިފައި ކަަމަށެެވެ. އެކަމަކު ފަރުދާގެ ފުރަގަހުގައި މަސައްކަތް ކުރާ އެކި މީހުންގެ އެހީތެރިކަން ވެސް ހަނދާން ކުރާ ކަމަށް އެމެރީ ބުންޏެވެ.

"އަހަރެންގެ ވިސްނުމަކީ އަބަދުވެސް އަހަރެންގެ ތަޖުރިބާގެ އެހީގައި މަސައްކަތް ކުރިއަށް ގެންދިއުން. ހަމައެކަނި ކޯޗަކަށް ފެންނަން މި ހުންނަނީ އަހަރެން. އެކަމަކު މި ޓީމުތައް ކާމިޔާބު ހޯދަން އަހަރެންނާ އެކު ގިނަ ބަޔަކު މަސައްކަތް ކުރޭ. އެ ގޮތަށް ވީ ސެވިއްޔާގައި. ޕީއެސްޖީގައި އަދި އާސެނަލްގައި. މިހާރު ވިޔަރެއާލްގައި ވެސް އެ ފަދަ ޓީމެއް އެބައޮތް،" އެމެރީ ބުންޏެވެ.

އެމެރީ އަކީ ޔޫރޮޕާ ލީގުގެ ޗެމްޕިއަންކަން ހަތަރު ފަހަރު ހޯދި ހަަމައެކަނި ކޯޗެެވެ. އަދި އެމެރީ ވެފައިވަނި ޔޫރަޕްގެ ބޮޑު ހަތަރު މުބާރާތެއްގެ ތަށި ހޯދި ހަތަރު ވަނަ ކޯޗަށެވެ. މީގެ ކުރިން އެކަން ހާސިލްކުރީ ހޯސޭ މޮރީނިއޯ، ބޮބް ޕެއިސްލީ އަދި ޖިއޮވާނީ ޓްރައްޕަޓޯނީ އެވެ.