ލަންޑަން (ޑިސެމްބަރު 14) - އަންނަ މަހު (ޖެނުއަރީ)ގެ ޓްރާންސްފާ މާކެޓްގައި އާސެނަލް ބިޒީވެގެން މާ ގިނަ ޓްރާންސްފާތަކެއް ކުރާނެ ކަމަށް ނުބެލެވޭ ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.

މި ސީޒަން ފެށުމުގެ ކުރިން ޓީމު ވަރުގަދަ ކުރުމަށް އާސެނަލުން ޓްރާންސްފާތަކެއް ކުރިއިރު، އާސެނަލްގެ ކޯޗުކަމާ އާޓެޓާ ހަވާލުވި ފަހުން އެ ޓީމުން ކޮންމެ ޓްރާންސްފާ މާކެޓެއްގައި ވެސް ޓީމު ވަރުގަދަ ކުރަން އިންވެސްޓްތަކެއް ކުރެ އެވެ.

އާޓެޓާ ބުނީ، އަންނަ މަހުގެ ޓްރާންސްފާގައި އާސެނަލްގެ މާ ގިނަ ހަރަކާތްތަކެއް ފެނުމުގެ ފުރުސަތު ކުޑަކަމަށެެވެ.

"އަހަރެން އެއްވެސް ވަރަކަށް އުންމީދެއް ނުކުރަން ޖެނުއަރީ (ޓްރާންސްފާގައި) ސުޕަ ބިޒީ ވާނެ ކަމަށް. އެކަަމަކު، އަބަދުވެސް ސަޕްރައިޒް ކަންތައްތަކެއް ހިނގާ، މިދިޔަ ހަފްތާތަކުގައި އެ އައި އަނިޔާގެ ކަންތައްތަކަށް ބަލާއިރު، ކުރިއަށް އޮތް ތަނުގައި ކަންކަން ރަނގަޅަށް ދާނެ ކަމުގެ އުންމީދު އެބައޮތް،" އާޓެޓާ ބުންޏެވެ.

އަނިޔާއާ ހެދި އާސެނަލްގެ ގިނަ ކުޅުންތެރިންތަކަކަށް ސީޒަނުގެ މިހާ ހިސާބަށް އައިއިރު ވެސް ވަނީ ގިނަ މެޗުތަކެއް ގެއްލިފަ އެވެ. އާޓެޓާ ބުނީ، ސީޒަނުގެ ބާކީބައިގައި އެ ކަމަށް ސަމާލުވެގެން މެޑިކަލް ޑިޕާޓްމަންޓްގެ ލަފާ ވަރަށް ރަނގަޅަށް އަހައިގެން އަނިޔާއިން އެނބުރި އަންނަ ކުޅުންތެރިން ބޭނުންކުރުމުގައި އަމަލުކުރާނެ ކަމަށެވެ.

އާސެނަލް ޓީމު ވަރުގަދަ ކުރުމަށްޓަކައި ކުރަން ޖެހޭ ކަންކަމަށް އަބަދުވެސް ވިސްނާ ކަމަށާއި ޓްރާންސްފާ މާކެޓްގައި އަންނަ މަހު ވެސް ހަރަކާތްތެރިވާނީ އެ ފަދަ ހާލަތެއް ކުރިމަތިވެއްޖެނަމަ ކަމަށް އާޓެޓާ ވަނީ ބުނެފަ އެވެ.

އިނގިރޭސި ޕްރިމިއާ ލީގުގެ ތިން ވަނައިގައި އޮތް އާސެނަލުން މިރޭ އަމިއްލަ ދަނޑުގައި ކުޅޭނީ އެވަޓަންއާ އެވެ.