6 މޭ 2021 - 12:00 3
އާމިނަތު އިބްރާހިމް
6 މޭ 2021 - 12:00 3
ކޮވިޑުގެ ހާލަތު މައިތިރިވުމުން، ތާޒާ ވެލަން ދާންވީ ރަށްރަށުގެ ލިސްޓެއް މިހާރުއްސުރެ ހަދާނަމަ އެންމެ ކުރިއަށް ލާންވީ އެއް ރަށަކީ ގދ އަތޮޅު ފިޔޯރީ އެވެ. އަތޮޅުގެ އެންމެ ދެކުނަށް، އައްޑޫ އާއި ފުވައްމުލަކާ ދިމާލަށް ބޭރަށް ނިކުމެފައި އޮންނަ ފިޔޯރީ އަކީ އެ އަތޮޅުގެ އެހެން ރަށްތަކާ އަޅާ ބަލާއިރު ކޮންކްރީޓް ތަރައްގީ އެހާ ބޮޑަށް ނުފެތުރި އޮތް އެއް ރަށެވެ. މާ ސިންގާ ފަޅެއްގައި ފަސޭހައިން ހިނގާފައި ދެވޭ އެތައް ފަޅު ރަށްތަކެއްގެ މެދުގައި އޮންނަ ފިޔޯރީ އަކީ ގުދުރަތީ ރީތިކަން ބަލާލައި ޗުއްޓީ ހޭދަކޮށްލަން ދާ މީހުންނަށް "މަރަކަށް" ވާނެ އެވެ.
މި ގެނެސްދެނީ ފިޔޯރީ އަށް ޗުއްޓީ ހޭދަކޮށްލަން ދާ މީހަކަށް އެރަށުގައި ފޫހި ނުވެ އާދަޔާ ހިލާފު ޗުއްޓީއެއް ހޭދަކޮށްލަން ކުރެވިދާނެ ބައެއް ކަންތައްތަކާއި ރަށުގައި ހުރި ބައެއް ފުރުސަތުތަކެވެ.
ގދ ފިޔޯރީ ގެ ބޮޑު ކުޅި އާ ދިމާލުން ރަށް މަތިން ނަގާފައިވާ ފޮޓޯ އެއް - ފޮޓޯ: އަހުމަދު އާސިފް
މާލޭގައި ހުރެފައި ފިޔޯރީއަށް ދެވެން އޮންނާނީ ދެ ގޮތެކެވެ. ނާލު ބޯޓެއްގައި ފިޔޯރީއަށް ދެ ރެއާއި ދެ ދުވާލުން ހެޔޮ އަގެއްގައި ދަތުރު ކޮށްލެވޭނެ އެވެ. މަތިން ދާނަމަ، ޓިކެޓެއްގެ އަގު އުޅޭނީ، 900ރ އާއި 1500 އާ ދެމެދުގަ އެވެ. ރަށާއި އެންމެ ގާތަށް އޮންނާނީ ކާޑެއްދޫ އެއާޕޯޓެވެ.
ފުވައްމުލަކު ސިޓީ އާއި ފިޔޯރީ އާއި ދެމެދު ހަފްތާއަކު ދެ ދުވަހު ލޯންޗު ދަތުރު އޮވެ އެވެ. އެއްކޮޅު ޓިކެޓެއްގެ އަގަކީ 500ރ އެވެ. ފުވައްމުލަކުން ފިޔޯރީ އަށް ލޯންޗުގައި 45 މިނިޓުން ދެވޭނެ އެވެ.
އައްޑޫ އިން ފިޔޯރީ އަށް ދާނަމަ 750 ރ އަށް ލޯންޗެއްގައި ދެވޭނެ އެވެ. ގަމުން ކާޑެއްދޫ އަށް ފްލައިޓް ދަތުރު އޮންނާތީ، މަތިން އަންނަން ބޭނުންވާ މީހުންނަށް އެއީ ވެސް ގޮތެކެވެ.
ފިޔޯރީގެ ތުނޑި އޮންނަ ދިމާލު މޫދު
ކާޑެއްދޫ އިން ފިޔޯރީ އަމިއްލަ އަށް ލޯންޗެއް ކުއްޔަށް ހިފައިގެން ދާނަމަ ހޭދަވާނެ ކަމަށް ބެލެވެނީ 1600 ވަރަކަށް ރުފިޔާއެވެ. އެކަމަކު ޕްރޮވިންސް ފެރީ އޮންނަ ދުވަހަކާ ދިމާކޮށްފައި ދަތުރުކުރާނަމަ، 25 ރުފިޔާ އަށް ހަތަރު ގަޑި އިރުން ކާޑެއްދޫ އިން ފިޔޯރީ އަށް ދެވޭނެ އެވެ.
ލޯންޗުގައި އަގުހެޔޮކޮށް އަންނަން ބޭނުން ނަމަ، ކާޑެއްދޫ އިން ފިޔޯރީ އަށް އޮންނަ ފެރީ ލޯންޗުގައި ވެސް ރަށަށް ދެވެނެ އެވެ. އޭރުން އަތުން ދައްކަން ޖެހޭނީ 260 ރުފިޔާ އެވެ.
ފިޔޯރީގައި މިވަގުތު އޮޕަރޭޝަނުގައި ގެސްޓް ހައުސް އެއް ނެތެވެ. އެކަމަކު ޗުއްޓީ ހޭދަކުރަން އަންނަ މީހުން ތިބުމަށް ވަރަށް ގިނަ ގެތަކުން ކުއްޔަށް ކޮޓަރި ދޫކުރެ އެވެ. އޭސީ ކޮޓަރިއެއް ކުއްޔަށް ދޫކުރަނީ ދުވާލަކަށް 450 ރުފިޔާ އަށެވެ. އޭސީ ނުކުރާ ކޮޓަރިއެއް ނަމަ 350 ރުފިޔާގެ އަގަކަށް ލިބޭނެ އެވެ.
ފިޔޯރީގެ ބޮޑު ކުޅި: މިއީ ހުވަދު އަތޮޅުން ފެންނާނެ އެންމެ ބޮޑު އަދި އެންމެ ރީތި އެއް ކުޅި
ފިޔޯރީ އަކީ ގުދުރަތީ ހިތްގައިމުކަން ތަޖުރިބާކޮށްލަން ދާ މީހަކަށް ހުސްނުވާ ފުރުސަތު ތަކެއް އޮތް ރަށެކެވެ. އެރަށުގެ ބޮޑު ކުޅި އަކީ ރާއްޖޭގެ ރަށަކުން ފެންނާނެ އެންމެ ބޮޑު އެއް ކުޅި އެވެ. ގދ އަތޮޅުގެ މީހުން ދިރިއުޅޭ އެ އަތޮޅު ރަތަފަންދޫ އާއި ނަޑެއްލާ އާއި މަޑަވެއްޔާއި އެއް ފަޅެއްގައި އޮންނަ ފިޔޯރީ އިން މަޑަވެއްޔާ ހަމައަށް ހިނގާފައި ދެވޭނެ އެވެ. އެހެންކަމުން އެ ދެމެދުގައި ހުރި ފަޅު ރަށްތަކަށް އެރަށުން ފަސޭހައިން ހިނގާފައި ދެވޭނެ އެވެ.
ކުޅީގައި ބަޔަކު ކެނޯ ދުއްވަނީ: މިއީ މިރަށަށް ޗުއްޓީ ގހޭދަކޮށްލަން އަންނަ މީހުންގެ މެދުގައި މަގުބޫލު ކަމެއް
ފޮޓޯ: އަހުމަދު އާސިފް
ރާއްޖޭގެ އެންމެ ތަފާތު އެއް ރަށުގެ ގޮތުގައި ފާހަގަކޮށް، ހިމާޔަތް ކޮށްފައިވާ ދިގު ލާބަދޫ އަށް ފިޔޯރީ އިން ޑިންގީ ގައި ހަތަރު ވަރަކަށް މިނިޓުން ދެވޭނެ އެވެ.
ފިޔޯރީ އަށް ލިބިފައިވާ އެންމެ ހާއްސަ އެއް ސިފަ އަކީ އެ ރަށުގެ ޗަސްބިންތަކެވެ. ރަށުގެ މެދު ތެރޭގެ ބޮޑު ސަރަހައްދަކަށް ދެމިލައިފައި އޮންނަ ޗަސްބިންތަކުގައި ކާބަފައިންގެ ޒަމާނުއްސުރެ އޮޅު އަލަ ހައްދައި އުޅެ އެވެ. މި ޗަސް ބިންތަކުގައި އަލައިގެ އިތުރަށް ދިވެހި ކުނާ ވިޔަން ބޭނުންކުރާ ހައު ހައްދަ އެވެ. ރާއްޖޭން ހައު ލިބެން ހުންނަ ހަމައެކަނި ރަށަކީ ވެސް ފިޔޯރީ އެވެ.
ފިޔޯރީގެ އަލަ އޮޅު - ފޮޓޯ: އަހުމަދު އާސިފް
ފޮޓޯ: އަހުމަދު އާސިފް
އާބާދީގެ 500 އެއްހައި މީހުން ދިރިއުޅޭ ފިޔޯރީ އަކީ ބިމުގެ ގޮތުން ތަނަަވަސް ރަށެކެވެ. އެރަށުގެ ބިމުގެ 80 ޕަސެންޓަށް ވުރެ ބޮޑު ބަޔަކަށް އޮންނަނީ ވަލެވެ. ރަށުގެ ބޮޑު ބައެއް ދަނޑުވެރިކަމަށް ވެސް ބޭނުންކުރެ އެވެ.
ފޮޓޯ: އަހުމަދު އާސިފް
ފިޔޯރީގެ ތުނޑި އާއި ފުއްޓަރު ފަރާތުން މޫދުން ބޭރަށް ދެމިލައިފައި އޮންނަ ގުދުރަތީ ތޮއްޓާއި ރަށް ވަށައިގެން ހުރި ރަށްތަކާއެކު ސަންސެޓް ފެންނަ ހިތްގައިމު މަންޒަރުތަކަކީ ކޮންމެހެން ބަލައިލަން "އަރާމު" މަންޒަރުތަކަކަށް ވާނެ އެވެ. އެހެންވީމަ އެންމެ އަވަހަށް ދެން ދަތުރެއް ރާވަންވީ ފިޔޯރީ އަށެވެ.
ފިޔޯރީގެ ހުޅަނގު ފަރާތު ބީޗުން އިރު އޮއްސޭ މަންޒަރު ފެންނަ ފޮޓޯ އެއް
Comment